ប៉ាលេស្ទីនបោះមួយជំហានឆ្ពោះទៅរកការផ្សះផ្សាជាតិ
ចលនានយោបាយចំនួនពីរនៅដែនដីប៉ាលេស្ទីន គឺចលនា Fatahរបស់លោកប្រធានរដ្ឋអំណាចប៉ាលេស្ទីន Mahmoud Abbas និងចលនាអ៊ីស្លាមនិយម Hamas ដែលកាលពីថ្ងៃពុធទី២៧ មេសាម្សិលមិញ បានព្រមព្រៀងគ្នា ក្នុងការរៀបចំបង្កើតរដ្ឋាភិបាលបណ្តោះអាសន្នប៉ាលេស្ទីនមួយ រហូតដល់ការរៀបចំបោះឆ្នោតជ្រើសរើសប្រធានាធិបតីនិងសភាចាប់ពីពេលនេះ រហូតទៅដល់ ១ឆ្នាំខាងមុខ។ អេហ្ស៉ីបវិញ រំពឹងទុកថា ចលនាប៉ាលេស្ទីននឹងឈានទៅរកកិច្ចព្រមព្រៀងលើការផ្សះផ្សាជាតិរវាង ភាគីប៉ាលេស្ទីនផ្សេងៗទៀត នៅពេលឆាប់ៗនេះ។ ដំណើរស្វែងរកសន្តិភាពនេះ ត្រូវបានផ្តើមឡើងតាំងពីជាង១ឆ្នាំមកហើយ ក៏ប៉ុន្តែ ពុំសូវបានទទួលផលផ្លែ អ្វីទេមកទល់ពេលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
គឺជាកិច្ចព្រមព្រៀងជាគោលការណ៍មួយ ដែលនឹងត្រូវឲ្យសច្ចាប័នទៀត។ ពិធីចុះហត្ថលេខាលើកិច្ចព្រមព្រៀងផ្សះផ្សារជាតិប៉ាលេស្ទីននេះនឹងត្រូវប្រព្រឹត្តទៅនៅសប្តាហ៍ក្រោយនាឱកាសប្រារព្ធជាផ្លូវការនៅទីក្រុងCaire។ លោកប្រធានរដ្ឋអំណាចប៉ាលេស្ទីន Mahmoud Abbas និងIsmail Haniyeh មេដឹកនាំនៃចលនា Hamas នឹងត្រូវចូលរួមនៅក្នុងពិធីនេះដែរ ក៏ព្រមទាំង មេដឹកនាំនៃចលនាប៉ាលេស្ទីនផ្សេងៗទៀត។
ពិធីចុះហត្ថលេខារវាងចលនាហាម៉ាសនិងហ្វាតា នឹងសម្រេចដល់ ការបង្កើតរដ្ឋាភិបាលជាបណ្តោះអាសន្នមួយរបស់ប៉ាលេស្ទីននិងការរៀបចំបោះឆ្នោត។
ការរៀបចំបោះឆ្នោតដែលនឹងត្រូវធ្វើឡើងចាប់ពីពេលនេះរហូតទៅដល់មួយឆ្នាំ។
គូររំលឹកថា កិច្ចព្រមព្រៀងផ្សះផ្សាជាតិប៉ាលេស្ទីននេះ ធ្លាប់ត្រូវបានស្នើឡើងដោយប្រទេសអេហ្ស៊ីប នៅខែតុលាឆ្នាំ ២០០៩ និងត្រូវបានគណបក្ស Fatah របស់លោក Mahmoud Abbas សុខចិត្តទទួលយក។ ក៏ប៉ុន្តែ ខាងចលនាអ៊ីស្លាម ហាម៉ាសវិញ បានបដិសេធនៅក្នុងនាទីចុងក្រោយ។ ជំនាន់នោះ អេហ្ស៊ីប បានចោទប្រទេសស៊ីរី ថា បានដាក់សម្ពាធទៅលើចលនា ហាម៉ាសពីព្រោះទីបញ្ជាការរបស់ចលនា ហាម៉ាស ស្ថិតនៅ ទីក្រុង Damas ប្រទេសស៊ីរី។
ដោយសារស្ថានការណ៏នៅស៊ីរីបច្ចុប្បន្ន ធ្លាក់ចុះដុនដាបកាន់តែខ្លាំងឡើងៗនោះហើយ ដែល ជម្រុញឲ្យ ចលនានយោបាយប៉ាលេស្ទីន សម្រេចចិត្តផ្តល់សន្ទុះឡើងវិញដល់ដំណើរការផ្សះផ្សាជាតិ។ ចលនាអ៊ីស្លាមនិយម ហាម៉ាស ដោយមានវិធានការបង្កាទុកជាមុនស្រេចនោះ ក្នុងករណីយប្រទេស ស៊ីរី ដែលជាអ្នកឧត្ថម្ភការពារខ្លួន ត្រូវធ្លាក់ចេញពីអំណាច នោះ ពួកគេ ក៏ត្រូវសម្រេចចិត្តភ្លាមដែរដើម្បី ចាប់ផ្តើមធ្វើការចរចាឡើងវិញ ជាមួយនឹងរបបដឹកនាំថ្មីនៃប្រទេសអេហ្ស៊ីប ដែលពួកគេ មើលឃើញថា មានភាពស្និទ្ធស្នាលខ្លាំងជាងរបបលោកប្រធានាធិបតី មូបារ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ