តើការចរចាដោយផ្ទាល់ដើម្បីសន្តិភាពនៅដើមបូព៌ានឹងត្រូវបរាជ័យនៅពេលនេះឬយ៉ាងណា ?
ទោះបីជាមានសម្ពាធពីសហរដ្ឋអាមេរិក ឲ្យបន្តផ្អាកការសាងសង់លំនៅដ្ឋាននៅតំបន់ អាណានិគម juive នៅស៊ីហ្ស័កដានី ក្តី ក៏មកទល់ពេលនេះ រដ្ឋាភិបាលអ៊ីស្រាអែល នៅតែមិនដឹងធ្វើឮទាំងអស់។ ការសាងសង់ បានចាប់ផ្តើមវិញភ្លាម នៅថ្ងៃនេះ ថ្ងៃគម្រប់១០ខែគត់នៃការផ្អាកធ្វើអាណានិគមនកិច្ចមួយរយៈ ។ លោក ប្រធានរដ្ឋអំណាចប៉ាលេស្ទីន Mahmoud Abbas ដែលកំពុងស្ថិតនៅក្នុងប្រទេសបារាំងបានអំពាវនាវជាថ្មីម្តងទៀត ឲ្យលោកនាយករដ្ឋមន្ត្រីអ៊ីស្រាអែល Benyamin Netanyahu បញ្ឈប់ការផ្អាកសាងសង់លំនៅដ្ឋាននេះ បើពុំនោះសោតទេ លោកនឹងបញ្ចប់នូវកិច្ចចរចាសន្តិភាពផ្ទាល់ជាមួយអ៊ីស្រាអែល ។ ការចរចាដែលទើបបានចាប់ផ្តើមបានបីសប្តាហ៍ប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
នាពេលបញ្ចប់ជំនួបក្រៅផ្លូវការ ជាមួយបណ្តាអ្នកតំណាង សហគមន៍ Juif ប្រមាណជាង ២០នាក់រួចមក លោកប្រធានរដ្ឋអំណាចប៉ាលេស្ទីន នៅតែទន្ទេញពាក្យដដែលៗ ថា អ៊ីស្រាអែលត្រូវតែបញ្ឈប់ការសាងសង់លំនៅដ្ឋានទាំងស្រុងនៅក្នុងតំបន់ Cisjordanie។
លោក Mahmoud Abbas បានដំឡើងសំឡេងយ៉ាងម៉ឺងម៉ាត់ថា ប៉ាលេស្ទីនពុំអាចធ្វើការចរចាជាមួយអ៊ីស្រាអែលបានទេ បើអ៊ីស្រាអ៊ែលនៅតែចចេសមិនព្រមបញ្ចប់អាណានិគមកិច្ចរបស់ខ្លួននោះទេ ព្រោះវាជាការខាតបង់ពេលវេលាឥតប្រយោជន៍តែប៉ុណ្ណោះ។ មិនតែប៉ុណ្ណោះ លោកប្រធានរដ្ឋអំណាចប៉ាលេស្ទីន បានសង្កត់ធ្ងន់បន្ថែមទៀតថា ឥឡូវនេះ អ៊ីស្រាអែល មានជម្រើសតែពីរប៉ុណ្ណោះ ឬមួយ ត្រូវជ្រើសយកការធ្វើអាណានិគមកិច្ច ឬមួយ ក៏ត្រូវជ្រើសយកសន្តិភាព ដោយ លោកបន្តទៀតថា « បើសិន អ៊ីស្រាអ៊ែល ជ្រើសយក សន្តិភាព នោះយើង នឹងបន្តកិច្ចចរចាជាមួយអ៊ីស្រាអែល ទៀត តែ បើ អ៊ីស្រាអ៊ែល មិនជ្រើសយកសន្តិភាពទេ នោះ នោះ គឺជាឱកាសខកខានមួយសម្រាប់អ៊ីស្រាអ៊ែល។
យោងតាមបណ្តាអ្នកចូលរួម ក្នុងជំនួបនេះ-លោក Mahmoud Abbas បានអំពាវនាវផងដែរ សុំឲ្យ បណ្ដាប្រទេសនៅអឺរ៉ុប ចូលរួបរួមឲ្យបានច្រើនថែមទៀត នៅលើ ដំណើរអភិក្រមសន្តិភាពនៅតំបន់ដើមបូព៌ា ។ ដំណើរអភិក្រមសន្តិភាពនៅដើមបូព៌ានេះ គឺជាប្រធានរឿងមួយ ដែល លោក Mahmoud Abbas នឹងត្រូវលើកពិភាក្សាទល់មុខគ្នាក្នុងថ្ងៃច័ន្ទទី២៧កញ្ញានេះជាមួយលោកប្រមុខរដ្ឋបារាំង នីកូឡាសាកូហ្ស៊ី នៅ វិមាន « Elysée »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ