ទីក្រុងតេអេរ៉ង់៖ គ្មានអំពើភេរវកម្មប្រឆំាងលោកប្រធានាធីបតីទេ
ប្រទេសអៀរ៉ង់បានច្រានចោលព័ត៌មានដែលថា មានការប៉ុនប៉ងធ្វើភេរវកម្មប្រឆំាងលោកប្រធានាធិបតី Mahmoud Ahmadinejad តាមរយៈការបំផ្ទុះលើក្បួនរថយន្តរបស់លោកកាលពីថ្ងៃពុធ ទី៤ សីហានៅក្នុងស្រុក Hamedan ស្ថិតប៉ែកខាងលិចប្រទេស។ បើយោងតាមគេហទំព័រមួយ ឧម្បត្តិហេតុនោះបានកើតមានឡើងដោយការបំផ្ទុះគ្រាប់បែកដៃមួយគ្រាប់។ តែបើយោងតាមព័ត៌មានផ្លូវការផ្តល់ដោយអាជ្ញាធរ គឺជាសម្លេងផ្ទុះដែលកើតឡើងពីការដុតផាវទៅវិញទេ។
ចុះផ្សាយនៅថ្ងៃ៖
សេចក្តីរាយការណ៍របស់ គួច គន្ធារ៉ា
ជាការបំផ្ទុះគ្រាប់បែក ឬមួយក៏ជាការដុតផាវ ទំាងនេះសុទ្ធសឹងជាព័ត៌មានផ្ទុយគ្នាដែលបានលើកឡើងនៅក្រោយព្រឹត្តការណ៍ផ្ទុះនោះ។ តែយ៉ាងណាក៏ដោយ វិមានប្រធានាធិបតីអៀរ៉ង់បានច្រានចោលព័ត៌មានដែលថា មានការប៉ុនប៉ងធ្វើភេរវកម្មប្រឆំាងលោកប្រមុខរដ្ឋ Mahmoud Ahmadinejad នាឱកាសដែលលោកកំពុងធ្វើដំណើរតាមរថយន្តទៅកាន់ស្រុក Hamedan ស្ថិតប៉ែកខាងជើងប្រទេស។ មន្រ្តីជាន់ខ្ពស់ម្នាក់នៅវិមានប្រធានាធិបតីថែមទំាងបានបញ្ជាក់ថា សម្លេងផ្ទុះនោះបានកើតឡើងពីការដុតផាវ។
តែក្នុងពេលជាមួយគ្នានេះ ទីភ្នាក់ងារសារព័ត៌មានឈ្មោះ Fars ដែលជំនិតនឹងក្រុមអភិរក្សនិយមបាននិយាយថា ការផ្ទុះនោះបានកើតឡើងដោយការបំផ្ទុះគ្រាប់បែកអាយមួយគ្រាប់។ ចំណែកឯទីភ្នាក់ងារសារព័ត៌មានឈ្មោះ Mehr ដែលជំនិតនឹងក្រុមអភិរក្សនិយមដែរនោះបានលើកឡើងថា ការផ្ទុះនោះបានកើតមាននៅឆ្ងាយពីរថយន្តរបស់លោក Mahmoud Ahmadinejad។ យោងតាមទីភ្នាក់ងារសារព័ត៌មាន Mehr ដដែល ឧម្បត្តិហេតុផ្ទុះនោះមិនបណ្តាលឲ្យមានមនុស្សស្លាប់ និងរបួសទេ តែមានជនសង្ស័យជាច្រើននាក់ត្រូវបានប៉ូលីសចាប់ខ្លួន។
ព្រឹត្តិការណ៍ផ្ទុះនេះបានកើតមានឡើង ចំពេលដែលលោកប្រធានាធីបតីអៀរ៉ង់ Ahmadinejad ធ្លាប់បានប្រកាសកាលពី២ថ្ងៃមុន ថាប្រទេសអ៊ីស្រាអែលបានព្យាយាមសម្លាប់លោកចំនួន៣ដងរួចមកហើយនារយៈពេលប៉ុន្មានឆ្នំាចុងក្រោយនេះ។ អ្នកនំាពាក្យក្រសួងការបរទេសអៀរ៉ង់លោក Ramin Mehmanparast បានថ្លែងថា លោក Ahmadinejad គឺជាឥស្សរជនម្នាក់នៅក្នុងពិភពអ៊ីស្លាមដែលអ៊ីស្រាអែលចង់សម្លាប់ចោល។
យ៉ាងណាក៏ដោយ ឧម្បត្តិហេតុនៅថ្ងៃម្សិលមិញបានកើតមានឡើង ចំពេលដែលភាពតានតឹងកំពុងបន្តមានរវាងអៀរ៉ង់ សហរដ្ឋអាមេរិក និងប្រទេសអ៊ីស្រាអែល ទាក់ទងនឹងកម្មវិធីនុយក្លេអ៊ែររបស់ប្រទេសអៀរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ