អ៊ីស្រាអែលត្រៀមខ្លួនដោះលែងអ្នកទោសប៉ាលេស្ទីន ជាថ្នូរនឹងការដោះលែងទាហានអ៊ីស្រាអែលGilad Shalit
អ៊ីស្រាអែលត្រៀមដោះលែងអ្នកទោសប៉ាលេស្ទីន ១០០០នាក់ដើម្បីឲ្យទាហានអ៊ីស្រាអែលឈ្មោះ Gilad Shalit សព្វថ្ងៃ អាយុ ២៣ ឆ្នាំ បានសេរីភាព។ Gilad Shalit ត្រូវបានចលនាប៉ាលេស្ទីន អ៊ីស្លាមនិយមជ្រុល Hamas ចាប់ឃុំឃាំង ចាប់ ពីខែ មិថុនា ២០០៦ មក។ នេះហើយ ជាសេចក្តីថ្លែងការណ៍របស់លោកនាយករដ្ឋមន្រ្តីអ៊ីស្រាអែល Benjamin Nétanyahu នៅក្នុងសុន្ទរកថា ថ្លែងទៅកាន់ប្រជាជាតិ ផ្សាយបន្តផ្ទាល់ តាមទូរទស្សន៍ នៅថ្ងៃព្រហស្បតិ៍ ម្សិលមិញ ទី១ កក្កដា។ ចាប់តាំងពីជាច្រើនខែមកហើយ មធ្យោបាយឃោសនាមហាជន អ៊ីស្រាអែលលើកឡើងអំពីការដោះលែងអ្នកទោសជាច្រើននាក់ ប៉ុន្តែ រហូតមកដល់ពេលនេះ ពុំទាន់មានការបញ្ជាក់អះអាងពីខាងរដ្ឋាភិបាលអ៊ីស្រាអែល នៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ការរាយការណ៍របស់Christian BRUNELប្រែសម្រួលដោយវីនស្តុន រតនា
ក្រុមអ្នកធ្វើអត្ថាធិប្បាយ គូសបញ្ជាក់គ្រប់គ្នាថា លោក Benjamin Netanyahu ពុំព្រមចុះញ៉មការគាបសង្កត់ ពុំមែនគ្រាន់តែ ពីខាងចលនា Hamas ប៉ុណ្ណោះទេ ប៉ុន្តែក៏ទាំងពីខាងគ្រួសារទាហាន Gilad Shalit ពីខាងមតិសាធារណជន និង ពីខាងមធ្យោបាយឃោសនាមហាជនភាគច្រើនដែលចង់ឲ្យដោះលែងអ្នកទោសទាមទារតម្រូវដោយ ប៉ាលេស្ទីន អ៊ីស្លាមនិយមជ្រុល។
ប៉ុន្តែបទវិចារណកថា សំដែងគោលជំហរអល់អែក នឹងលើកឡើង អំពីការស្ទាក់ស្ទើរ ក្នុងចិត្តពុំដឹងត្រូវជ្រើសរើសយកមួយណាដែលលោកនាយករដ្ឋមន្រ្តី អ៊ីស្រាអែលកំពុងប្រឈមមុខ។ ដោះលែងអ្នកទោសទាំងអស់ដែលចលនា Hamas ទាមទារតម្រូវអាចនឹងមានគ្រោះថ្នាក់ផ្តល់សន្ទុះថ្មីឲ្យពួកភេរវជន និងគឺជាជោគជ័យនយោបាយមួយពុំធ្លាប់ដែលមានសំរាប់ពួកអ៊ីស្លាមនិយមជ្រុល។
ទឡ្ហីករណ៍ទាំងនេះ ពុំអាចបញ្ចុះបញ្ចូលទឹកចិត្ត លោក Noam Shalit ជាឪពុក របស់ទាហាន Gilad Shalit បានឡើយ។ លោក Noam Shalit ទិតៀនរិះគន់កង្វះសេចក្តីក្លាហានរបស់លោក Benjamin Netanyahu ដែលគាត់បង្ហាញថា ជាអ្នកទទួលខុសត្រូវតែម្នាក់គត់ ចំពោះជោគវាសនា របស់ កូនប្រុសគាត់។
ទំនាស់គោលជំហររវាងបុរសទាំងពីរនាក់នេះ ត្រូវមធ្យោបាយឃោសនាមហាជន ចុះផ្សាយនៅទំព័រ ទី ១របស់ខ្លួន។ ដំណាលពេលគ្នានេះ បាតុកររាប់ជាច្រើនពាន់នាក់ ដឹកនាំដោយឪពុករបស់ Shalit នៅតែបន្តដំណើរខ្លួនពីតំបន់ខាងជើងអ៊ីស្រាអែលឆ្ពោះទៅកាន់ទីក្រុង Jérusalem ជានិមិត្តរូបរបស់ពួកគេនៅថ្ងៃសុក្រនេះហើយនិងនាំគេទៅកាន់Cesarai នៅពីមុខផ្ទះលោក Benjamin Netanyahu ប្រកបដោយគោលដៅនៅតែបន្តគាបសង្កត់ទៅលើលោកនាយករដ្ឋមន្ត្រីដោយបោះជំរំសំពត់មួយនៅសប្តាហ៍ក្រោយនៅចំពីមុខ ដំណាក់របស់លោកនាយករដ្ឋមន្រ្តីតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ