អ៊ីស្រាអែលនៅតែបន្តបិទខ្ទប់គមនាគមន៍ផ្លូវទឹកចូលទៅតំបន់ហ្កាហ្សា
សកម្មជនបរទេសគាំទ្រប៉ាលេស្ទីនជាង៥០០នាក់ ដែលភាគច្រើនជាជនជាតិទួរគី និងដែលត្រូវអ៊ីស្រាអែលចាប់ឃុំខ្លួន ចាប់ពី ថ្ងៃចន្ទ ត្រូវបានអ៊ីស្រាអែលបញ្ជូនចេញពីប្រទេស កាលពីយប់ថ្ងៃពុធ ចូលដល់ថ្ងៃព្រហស្បតិ៍។ វិធានការណ៍នេះ ធ្វើឡើង បន្ទាប់ពីប្រទេសទួរគីបានគំរាមថា នឹងសើរើឡើងវិញ នូវទំនាក់ទំនងជាមួយអ៊ីស្រាអែល ប្រសិនបើអ៊ីស្រាអែលមិនដោះលែងប្រជាជនរបស់ខ្លួនឲ្យបានមុនថ្ងៃពុធ។ ក្រោយការវាយប្រហារទៅលើនាវាដឹកជំនួយមនុស្សធម៌ អ៊ីស្រាអែលទទួលការរិះគន់ខ្លាំងពីសហគមន៍ អន្តរជាតិ ជាពិសេស សហរដ្ឋអាមេរិកដែលអំពាវនាវឲ្យអ៊ីស្រាអែលបញ្ឈប់ការបិទខ្ទប់ផ្លូវចូល ទៅតំបន់ហ្កាហ្សាដែលជាទឹកដីរបស់ប៉ាលេស្ទីន។
ចុះផ្សាយនៅថ្ងៃ៖
សេចក្តីរាយការណ៍របស់ឈាង បុប្ផា
សហរដ្ឋអាមេរិកផ្ទាល់ដែលជាប្រទេសសម្ព័ន្ធមិត្តរបស់អ៊ីស្រាអែល វាយតំលៃថា វាជារឿងមួយដែលមិនអាចទទួលយកបានទេដែលអ៊ីស្រាអែលបិទខ្ទប់ផ្លូវចេញចូលទៅតំបន់ហ្កាហ្សា។ តាមរយៈរដ្ឋមន្រ្តីការបរទេសរបស់ខ្លួន អាមេរិកបានស្នើឲ្យអ៊ីស្រាអែលដកចេញនូវបំរាម និងអនុញ្ញាតិឲ្យគេអាចដឹកជំនួយជាសម្ភារៈដើម្បីកសាងតំបន់ហ្កាហ្សាឡើងវិញ។ តំបន់ហ្កាហ្សាដែលអ៊ីស្រាអែលបានបាញ់បំផ្លាញ កាលពីឆ្នាំចុងឆ្នាំ ២០០៨ ដើមឆ្នាំ២០០៩មុននេះ។
លោក Ban Ki-Moon អគ្គលេខាធិការអង្គការសហប្រជាជាតិក៏បានវាយតម្លៃផងដែរថា ការបិទខ្ទប់ដំណើរផ្លូវទឹកចូលទៅតំបន់ហ្កាហ្សា ដែលអ៊ីស្រាអែលរៀបចំឡើង ជារឿងមួយគ្មានសីលធម៌ និងបន្ទុចបង្អាក់ដំណើរអភិវឌ្ឍន៍។ ដូច្នេះ លោក Ban Ki-Moon បានបញ្ជាក់ប្រាប់ឲ្យអ៊ីស្រាអែលលើកបម្រាមនេះជាបន្ទាន់។
ការអំពាវនាវទាំងនេះមិនបានធ្វើឲ្យអ៊ីស្រាអែលដូរជំហររបស់ខ្លួនទេ។ លោក Benjamin Netanyahu នាយករដ្ឋមន្រ្តីអ៊ីស្រាអែលបានបញ្ជាក់ នៅថ្ងៃនេះថា អ៊ីស្រាអែលនៅតែបន្តរាំងខ្ទប់មិនឲ្យមាននាវាចេញចូលទៅតំបន់ហ្កាហ្សា។ នាយករដ្ឋមន្រ្តីអ៊ីស្រាអែលបាន ការពារជំហររបស់ខ្លួន ដោយបង្ហាញថា ការរាំងខ្ទប់ផ្លូវទឹកចូលទៅតំបន់ហ្កាហ្សា ជាយុទ្ធសាស្រ្តដើម្បីកុំឲ្យឆ្នេរទឹកហ្កាហ្សាធ្លាក់ទៅក្នុងដៃអៀរ៉ង់។ កន្លងមក អ៊ីស្រាអែលចោទអៀរ៉ង់ថា ជាអ្នកផ្គត់ផ្គង់អាវុធដល់ក្រុមសកម្មប្រយុទ្ធHamas ក្នុងតំបន់ហ្កាហ្សាដើម្បីប្រឆាំងអ៊ីស្រាអែល។
គួររំលឹកថា អ៊ីស្រាអែលបានបិទខ្ទប់ផ្លូវទឹកចូលតំបន់ហ្កាហ្សា ចាប់តាំងពីឆ្នាំ២០០៦មកម៉្លេះ។ រាល់នាវាដឹកទំនិញសំដៅតំបន់ហ្កហ្សា ត្រូវចូលចតនៅផែអ៊ីស្រាអែល ដោយអ៊ីស្រាអែលសន្យាសុខចិត្តបញ្ជូនបន្តតាមផ្លូវគោកទៅតំបន់ហ្កាហ្សា។ ធ្វើដូច្នេះ គឺដើម្បីត្រួតពិនិត្យយ៉ាងម៉ត់ចត់ មិនឲ្យមានការលួចដឹកអាវុធសម្រាប់ផ្គត់ផ្គង់ក្រុមប្រយុទ្ធHamas នៅតំបន់ហ្កាហ្សា ក្នុងទឹកដីប៉ាលេស្ទីន។
នៅថ្ងៃពុធទី ៣ មិថុនា ២០១០នេះ អ៊ីស្រាអែលបានបដិសេធមិនព្រមសហការធ្វើការស៊ើបអង្កេតទៅលើការបាញ់ប្រហាររបស់អ៊ីស្រាអែលទៅលើនាវាដឹកជំនួយមនុស្សធម៌។ ពោល គឺអ៊ីស្រាអែលមិនព្រមគោរពតាមសេចក្តីសម្រេចរបស់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិដែលបានអនុម័ត កាលពីថ្ងៃពុធម្សិលមិញ។ អ៊ីស្រាអែលចោទថា សេចក្តីសម្រេចនេះធ្វើឡើងដោយលំអៀង ព្រោះវាបានបោះឆ្នោតដោយប្រទេសដែលស្អប់អ៊ីស្រាអែល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ