សន្និបាតដើម្បីស្វែងរកសន្តិភាពរងការវាយប្រហារពីក្រុមតាលីបង់
ក្រុមឧទ្ទាមតាលីបង់បានបាញ់គ្រាប់រ៉ុក្កែត នៅព្រឹកថ្ងៃពុធនេះ សំដៅរោងប្រជុំដែលមានប្រធានាធិបតីអាហ្វហ្កានិស្តង់កំពុងថ្លែង សន្ទរកថាបើកសន្និបាតJirga de la paix ឬសន្និបាតដើម្បីសន្តិភាព។ សន្និបាតដែលមានរយៈពេល៣ថ្ងៃ សំដៅស្វែងរកដំណោះស្រាយដើម្បី បំបាត់ចលនាបះបោក្នុងប្រទេស។ ក្នុងការវាយប្រហារដែលបណ្តាលឲ្យមានអ្នករបួស ២ កងរក្សាសន្តិសុខសម្លាប់បានភេរវករអត្តឃាត ២រូប និងចាប់បានមួយរូប។
ចុះផ្សាយនៅថ្ងៃ៖
សេចក្តីរាយការណ៍របស់ឈាង បុប្ផា
គ្រាប់រ៉ុក្កែតបានផ្ទុះធ្លាក់ក្បែររោងសន្និបាតដែលគេរៀបចំក្នុងក្រុងកាប៊ូល។ ក្រុមភេរវជនអត្តឃាតតាលីបង់បានបន្លំខ្លួន ចូលទៅក្នុងបរវេណដែលគេរៀបចំសន្និបាត និងការពារសន្តិសុខដោយកំលាំងអន្តរជាតិជាង ១២០០នាក់។ ការផ្ទុះគ្រាប់នេះ មិនបានបង្អាក់ការងាររបស់សន្និបាតសន្តិភាពដែលប្រធានាធិបតីអាហ្វហ្កនិស្តង់ផ្ទាល់ជាអ្នកដឹកនាំ។ លោក Hamid Karzaï បាននិយាយប្រាប់ទៅអ្នកចូលរួមប្រមាណ ១៦០០នាក់ មិនឲ្យភ័យខ្លាច និងនៅបន្តកិច្ចប្រជុំ នៅពេលសំលេងគ្រាប់បានផ្ទុះឡើង។ ។ ប៉ុន្តែមួយស្របក់ក្រោយមក ក្បួនរថយន្តទាហានបានដឹកជំលៀសប្រធានាធិបតីចេញទីកន្លែងប្រជុំ។
សន្និបាតលើកនេះ ជាសន្និបាតទី៣ ដែលគេរៀបចំជាប្រពៃណីចាប់តាំងពីការធ្លាក់របបតាលីបង់ ក្នុងឆ្នាំ ២០០១។ សន្និបាតនេះមានយុទ្ធសាស្រ្តស្វែងរកការព្រមព្រៀងគ្នា និងស្រោចស្រង់ប្រទេសចេញពីសង្រ្គាមដ៏រ៉ាំរ៉ៃ។ អ្វីដែលសំខាន់នោះ គឺគេមានបំណងបញ្ចុះបញ្ចូលក្រុមតាលីបង់ឲ្យមកចូលរួមតុចរចា។ វាជាដំណើរតស៊ូដ៏វែងឆ្ងាយ នៅពេលដែលពួកតាលីបង់មិនបញ្ឈប់វាយប្រហារ និងពង្រឹងកំលាំងកាន់តែច្រើន ក្តោបក្តាប់តំបន់ ក្នុងប្រទេសអាហ្វហ្កានិស្តង់។
ដោយពិតទៅ សន្និបាត Jirga de la paix និងមិនផ្តល់លទ្ធផលជាដុំកំភួនពោលគឺគេគ្រាន់តែពិភាក្សាគ្នាតែមិនធ្វើសេចក្តីសម្រេចចិត្តអ្វីទាំងអស់។ ប៉ុន្តែ ក្រុមតាលីបង់បានវាយតម្លៃថា សន្និបាតសន្តិភាពនេះគ្រាន់តែជាឧបករណ៍ឃោសនា របស់កំលាំងអន្តរជាតិ ដែលកំពុងឈ្លានពានអាហ្វហ្កានិស្តង់ ប៉ុណ្ណោះ។ ក្នុងរយៈពេល ២ឆ្នាំនេះ ក្រុមតាលីបង់បានបង្កើនវាយប្រហារមកលើរដ្ឋធានីកាប៊ូល ជាទីដែលមានកងទាហានអន្តរជាតិតាំងនៅ។
ជារួម សហគមន៍អន្តរជាតិគាំទ្រកិច្ចប្រជុំលើកនេះដែលសំដៅផ្សះផ្សាគ្នារវាងក្រុមតាលីបង់ និងប្រធានាធិបតី Hamid Karzaï។ ប៉ុន្តែ សន្និបាតដែលផ្តើមគំនិតដោយប្រធានាធិបតីអាហ្វហ្កានិស្តង់ នឹងមិនលើកនិយាយពីការចូលរួបរួមរបស់ក្រុមតាលីបង់ក្នុងនយោបាយប្រទេស នៅមុនពេលដែលកំលាំងទ័ពអន្តរជាតិកំពុងមានវត្តមានក្នុងប្រទេសនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ