លោកចន ឃែរី បានរៀបចំកិច្ចប្រជុំជាសំងាត់ដើម្បីរកសន្តិភាពរវាងអ៊ីស្រាអ៊ែល និងប៉ាឡែស្ទីន
លោកអតីតរដ្ឋមន្ត្រីការបរទេសអាមេរិក ចន ឃែរី បានរៀបចំកិច្ចប្រជុំ៤ភាគីជាសម្ងាត់ កាលពីខែកុម្ភៈ ឆ្នាំ២០១៦ ជាមួយនឹងលោកណេតាន់យ៉ាហ៊ូ នាយករដ្ឋមន្ត្រីអ៊ីស្រាអ៊ែល លោកអាល់ស៊ីស៊ី ប្រធានាធិបតីអេហ្ស៊ីប និងព្រះចៅអាប់ដាឡា នៃព្រះរាជាណាចក្រហ្សកដានី ដើម្បីរិះរកដំណោះស្រាយសន្តិភាព រវាងប៉ាឡេស្ទីន និងអ៊ីស្រាអែល។ នេះបើតាមការចុះផ្សាយរបស់កាសែតអ៊ីស្រាអែលមួយ។ យ៉ាងណាក៏ដោយ ដំណោះស្រាយសន្តិភាពរវាងប៉ាឡេស្ទីន និងអ៊ីស្រាអែល នៅតែជាក្តីស្រម៉ៃ ដែលគ្មានថ្ងៃចេញរូបរាងពិតប្រាកដដដែល។
ចុះផ្សាយនៅថ្ងៃ៖ កែប្រែថ្ងៃទី៖
ដោយយោងតាមសម្តីរបស់អតីតមន្ត្រីក្រសួងការបរទេសអាមេរិកម្នាក់ ដែលសុំមិនបញ្ចេញឈ្មោះ កាសែតអ៊ីស្រាអែល ឈ្មោះ Haaretz បានចុះផ្សាយថា កាលពីខែកុម្ភៈ ឆ្នាំ២០១៦ លោកចន ឃែរី ដែលកាលណោះ នៅជារដ្ឋមន្ត្រីក្រសួងការបរទេសអាមេរិក បានរៀបចំកិច្ចប្រជុំមួយជាសំងាត់ រវាងអ៊ីស្រាអែល អេហ្ស៊ីប និងហ្សកដានី។ កិច្ចប្រជុំនេះ បានប្រព្រឹត្តិធ្វើទៅនៅទីក្រុងAqaba ក្នុងប្រទេសហ្សកដានី។
សារព័ត៌មានអ៊ីស្រាអែល បានបន្តថា ក្នុងឱកាសប្រជុំនោះ លោកចន ឃែរី បានស្នើឡើងនូវចំណុចជាគោលការណ៍ធំៗ ចំនួន៦ ទៅកាន់ថ្នាក់ដឹកនាំទាំង៣ប្រទេស ឲ្យយល់ព្រមទទួលយក។ ក្នុងចំណោមចំណុចទាំង៦នោះ គឺមានដូចជា ការដកចេញពីដែនដីប៉ាឡេស្ទីន របស់អ៊ីស្រាអែល ដែលបានចូលទៅគ្រប់គ្រងដោយខុសច្បាប់ ចាប់តាំងពីឆ្នាំ១៩៦៧មក។ បន្ទាប់មកទៀត គឺលទ្ធភាពនៃការដោះដូរដែនដីគ្នា រវាងអ៊ីស្រាអែល និងប៉ាឡេស្ទីន។
ហើយជាចុងក្រោយ នឹងសំខាន់បំផុតនោះ គឺលោក ចន ឃែរី ទៀមទារ ឲ្យបង្កើតរដ្ឋឯករាជ្យពីរស្មើភាពគ្នា ប៉ាឡេស្ទីន និងអ៊ីស្រាអែល ដោយមានហ្សេរូសាឡឹម ជាទីក្រុង នៃប្រទេសទាំងពីរ។ ក្នុងន័យនេះ មានន័យថា អ៊ីស្រាអ៊ែល ត្រូវទទួលស្គាល់ ប៉ាឡេស្ទីន ជាប្រទេសឯករាជ្យពេញសិទ្ធិ រឺឯប៉ាឡេស្ទីនវិញ ត្រូវទទួលស្គាល់អ៊ីស្រាអែល ជាប្រទេសជ្វីហ្វ ពេញសិទ្ធិដូចគ្នាដែរ។ គឺចំណុចចុងក្រោយនេះ ហើយអ៊ីស្រាអែល និងប៉ាឡេស្ទីន មិនព្រម ហើយធ្វើឲ្យសំណើរដំណោះស្រាយសន្តិភាពនេះ ជួបបរាជ័យ។ ប៉ាឡេស្ទីន មិនព្រមទទួលស្គាល់អ៊ីស្រាអែល ជាប្រទេសេជ្វីហ្វជាដាច់ខាត ឯចំណែកអ៊ីស្រាអែលវិញ មិនព្រមដកថយចេញពីក្រុងហ្សេរូសាឡឹមខាងកើតជាដាច់ខាត។
គួរបញ្ជាក់ថា លោក ចន ឃែរី ក្នុងរដ្ឋាភិបាលរបស់លោកអូបាម៉ា បានសម្តែងគោលជំហរយ៉ាងច្បាស់លាស់ ចង់ទទួលស្គាល់ប៉ាឡេស្ទីន ជារដ្ឋអធិបតេយ្យពេញឯករាជ្យ ដើម្បីជាជំហានដំបូងក្នុងការបញ្ចប់ជំលោះ ដែលមានចំណាស់ជាងគេក្នុងប្រវត្តិសាស្ត្រមនុស្សជាតិ។ ក៏ប៉ុន្តែរហូតមកដល់ពេលនេះ ក្តីសង្ឃឹមសន្តិភាព រវាងអ៊ីស្រាអែលនិងប៉ាឡេស្ទីន កាន់តែនៅឆ្ងាយ ដោយសារតែរដ្ឋាភិបាលថ្មីរបស់សហររដ្ឋអាមេរិក ដឹកនាំដោយលោកដូណាល់ ត្រាំ មិនបានផ្តល់អាទិភាព ដល់ការទទួលស្គាល់ប៉ាឡេស្ទីន ជាប្រទេសឯករាជ្យទេ។ ជាងនេះទៅទៀត សភាអ៊ីស្រាអែល ទើបតែបានអនុម័តច្បាប់ថ្មីមួយ ដែលអនុញ្ញាតិឲ្យប្រជាជននិងអាជ្ញាធរអ៊ីស្រាអែល បន្តសង់ផ្ទះ លើដីប៉ាឡេស្ទីន បានដោយស្របច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ