បោះឆ្នោតអ៊ីរ៉ង់៖ ក្រុមកណ្តាលនិយម និងកំណែទម្រង់និយម ឈ្នះច្រើនតែមិនទាន់បានសម្លេងភាគច្រើន
លទ្ធផលបោះឆ្នោតសភាអ៊ីរ៉ង់ បានចេញជាបណ្តើរៗហើយ។ ក្រុមកណ្តាលនិយម និងក្រុមកំណែទម្រង់និយម ដែលមាននិន្នាការគាំទ្រលោកប្រធានាធិបតីហាសាន់ រ៉ូហានី បានប្រមូលយកសម្លេងឆ្នោតយ៉ាងច្រើន។ ប៉ុន្តែបើយោងតាមលទ្ធផលបឋមនេះ ក្រុមទាំងពីរនៅមិនទាន់បានសម្លេងភាគច្រើន នៅក្នុងសភាជាតិនៅឡើយ។ ទោះជាយ៉ាងណាក៏ដោយ បរិបទនយោបាយអ៊ីរ៉ង់ កំពុងតែផ្លាប់ប្តូរទាំងស្រុង ដោយសារក្រុមអភិរក្សនិយម ដែលផ្តល់តំលៃកំពូលទៅលើសាសនាអ៊ីស្លាម បានបាត់បង់សម្លេងរបស់ខ្លួន ក្នុងសភាជាតិ និងសភាសាសនា យ៉ាងសន្ធិកសន្ធាប់។
ចុះផ្សាយនៅថ្ងៃ៖
ស្តាប់ - ០៦:១៧
ការបោះឆ្នោតកាលពីថ្ងៃទី ២៦ កុម្ភៈគឺជាការបោះឆ្នោតជ្រើសរើសសមាជិកសភាអ៊ីរ៉ង់ ពីរផ្សេងគ្នា។ មួយគឺសភាជាតិ និងមួយទៀតគឺសភាសាសនា ដែលមានតួនាទីតែងតាំងមគុទេសសាសនាកំពូលរបស់អ៊ីរ៉ង់។
ក្រុមលោករ៉ូហានី មិនទាន់ប្រាកដថាបានសម្លេងភាគច្រើនក្នុងសភាជាតិ៖
សភាជាតិអ៊ីរ៉ង់ មាន២៩០អាសនៈ។ យោងតាមលទ្ធផលដែលទទួលបានជាបណ្តោះអាសន្នគឺក្រុមកណ្តាលនិយម និងក្រុមកំណែទម្រង់និយមទទួលបាន៨៩អាសនៈ។ ចំណែកក្រុមអភិរក្សនិយមទទួលបាន៨៦អាសនៈ។ ក្រៅពីនេះ បេក្ខជនដែលជាបេក្ខជនឯងរាជ្យ មិនមាននៅក្នុងក្រុមណាមួយ ក៏ទទួលបាន១០អាសនៈដែរ។ សម្រាប់ពេលនេះគេនៅមិនទាន់ច្បាស់ថា បេក្ខជនឯករាជ្យទាំង១០នេះ ចូលខាងក្រុមណាមួយឲ្យប្រាកដទេ។
ការរាប់សន្លឹកឆ្នោតនៅតែបន្ត ហើយលទ្ធផលសម្រាប់៦០អាសនៈទៀត អាចនឹងត្រូវប្រកាសឲ្យដឹងនៅថ្ងៃអង្គារទី១ មីនា។ ក្រៅពីនេះ គឺនៅមាន៥១អាសនៈទៀត ដែលនឹងត្រូវរៀបចំឲ្យបោះឆ្នោតឡើងវិញនៅជុំទីពីរ ព្រោះដោយសារបេក្ខជនឈរឈ្មោះដែលឈ្នះ បានសម្លេងមិនគ្រប់២៥% នៃសម្លេងឆ្នោតក្នុងមណ្ឌលខ្លួន។ តាមការគ្រោងទុក ការបោះឆ្នោតជុំទីពីរសម្រាប់៥១អាសនៈនេះ អាចនឹងរៀបចំធ្វើឡើង នៅរវាងចុងខែមេសា ដើមខែឧសភា។
ដូច្នេះ គេមិនទាន់អាចនិយាយបានថា ក្រុមកំណែទម្រង់ និងក្រុមកណ្តាលនិយមរបស់លោកប្រធានាធិបតីហាសាន់ រ៉ូហានី ឈ្នះបានសម្លេងភាគច្រើនក្នុងសភាជាតិទេ។ ប៉ុន្តែយ៉ាងណាក៏ដោយ វាក៏ជាជ័យជំនះមួយដ៏ធំផងដែរ ព្រោះថាសភាជាតិអាណត្តិមុន ក្រុមកណ្តាលនិយមនិងក្រុមកំណែទម្រង់និយម មានអាសនៈរួមគ្នាបានតែ៣០ប៉ុណ្ណោះ ចំណែកក្រុមអភិរក្សសាសនានិយមវិញ គឺមានអាសនៈដល់ទៅ២០០ឯណោះ។ យើងឃើញថា យោងតាមលទ្ធផលបណ្តោះអាសន្ននេះ ក្រុមកណ្តាលនិយមនិងក្រុមកំណែទម្រង់និយម បានកើនអាសនៈមួយគុណជាបី ឯណោះ។ ជាក់ស្តែងនៅមណ្ឌលរដ្ឋធានីតេអេរ៉ង់ ដែលមាន៣០អាសនៈ គឺក្រុមទាំងពីរនេះបានប្រមូលយកទាំងអស់។
លោកហាសាន់ រ៉ូហានីជាប់ជាសមាជិកសភាសាសនា៖
សម្រាប់លទ្ធផលសម្លេងឆ្នោតនៅសភាសាសនា គឺនៅមិនទាន់ដឹងច្រើននៅឡើយទេ។ សូមបញ្ជាក់ថា សភាសាសនាអ៊ីរ៉ង់ ជាសភាមួយមានឥទ្ធិពលណាស់ ព្រោះសភានេះហើយ ដែលជាអ្នកសម្រេចតែងតាំងប្រមុខមគុទេសសាសនារបស់អ៊ីរ៉ង់។ អាសនៈទាំង៨៨នៃសភានេះ គឺសម្រាប់មនុស្សមានឥទ្ធិពលធំៗ ក្នុងនយោបាយនិងសាសនារបស់អ៊ីរ៉ង់។
នៅមណ្ឌលរដ្ឋធានីតេអេរ៉ង់ ដែលមាន១៦អាសនៈ គឺ១៥អាសនៈបានទៅក្រុមកំណែទម្រង់និយម និងក្រុមកណ្តាលនិយម។ ខាងក្រុមអភិរក្សនិយមបានតែមួយកៅអីគត់ នៅតេអេរ៉ង់។ ជោគជ័យមួយទៀតរបស់ក្រុមកណ្តាលនិយម គឺលោកប្រធានាធិបតី ហាសាន់រ៉ូហានី និងដៃគូជំនិតរបស់គាត់ម្នាក់ទៀត គឺលោកអតីតប្រធានាធិបតី រាហ្វសាន់ចានី ទាំងពីរនាក់បានទទួលអាសនៈនៅក្នុងសភាសាសនាអាណត្តិថ្មីនេះ។
យុទ្ធសាស្ត្ររបស់ក្រុមអភិរក្សនិយម ដើម្បីរក្សាឥទ្ធិពលក្នុងសភាសាសនា៖
មានមនុស្សសំខាន់ៗខាងក្រុមអភិរក្សនិយមច្រើននាក់ ដែលសុទ្ធជាមនុស្សមានឥទ្ធិពលក្នុងនយោបាយសាសនាអ៊ីរ៉ង់ ដែលបានបាត់បង់អាសនៈនៅក្នុងសភាសាសនា តួយ៉ាងដូចជាលោក មហាម៉ាដ យ៉ាហ្សឌី ដែលជាប្រធានសភាសាសនាបច្ចុប្បន្ន។ ប៉ុន្តែលោក អាម៉ាដ ចាណាទី ប្រធានក្រុមប្រឹក្សាការពាររដ្ឋធម្មនុញ្ញ បច្ចុប្បន្ន បានសម្លេងគ្រប់ដើម្បីឈរឈ្មោះក្នុងសភាសាសនាមួយអាណត្តិទៀត។
សូមរំលឹកដែរថា ក្រុមប្រឹក្សាការពាររដ្ឋធម្មនុញ្ញនេះហើយ ដែលជាអ្នកសម្រេចអនុញ្ញាតិឲ្យបេក្ខជនណា អាចឈរឈ្មោះបោះឆ្នោតបាន។ សម្រាប់បេក្ខជនឈរឈ្មោះបោះឆ្នោតសភាសាសានា គឺមានអ្នកដាក់ពាក្យ១២០០នាក់ តែក្រុមប្រឹក្សានេះ សម្រេចលុបចោលសល់តែ១៦១នាក់ទេ។ ឃើញថា បេក្ខជនឈរឈ្មោះ លើសចំនួនកៅអីមិនដល់២ដងផង។ អញ្ចឹងហើយបានជានៅតាមមណ្ឌលខ្លះ គឺមានបេក្ខជនតែម្នាក់ប៉ុណ្ណោះ ហើយភាគច្រើនជាបេក្ខជនខាងក្រុមអភិរក្សនិយមទៀត។ នេះជាយុទ្ធសាស្ត្រមួយ ដើម្បីរក្សាអាសនៈរបស់ក្រុមអភិរក្សនិយម នៅក្នុងសភាជាតិ។
យុវជននឿយណាយនឹងសាសនា ត្រូវការសេដ្ឋកិច្ច ៖
លទ្ធផលនេះ សបង្ហាញពីផលវិជ្ជមាននៃកិច្ចព្រមព្រៀងស្តីពីនុយក្លេអ៊ែអ៊ីរ៉ង់។ កិច្ចព្រមព្រៀងដែលរដ្ឋាភិបាលលោកហាសាន់ រ៉ូហានីបានព្យាយាមចរចាជាមួយអាមេរិក និងប្រទេសមហាអំណាចផ្សេងទៀត ដើម្បីរំដោះអ៊ីរ៉ង់ចេញពីទណ្ឌកម្មសេដ្ឋកិច្ច។ សម្រាប់ពេលនេះ ការបើកចំហរទទួលទីផ្សារអន្តរជាតិរបស់អ៊ីរ៉ង់ គឺជាក្តីសង្ឃឹមរបស់ប្រជាជនអ៊ីរ៉ង់ ជាទូទៅ ជាពិសេសគឺក្រុមយុវជនក្មេងៗ ដែលកំពុងតែត្រៀមខ្លួនប្រឡូកក្នុងវិស័យសេដ្ឋកិច្ច។ មនុស្សអាយុក្រោម៣០ឆ្នាំ នៅអ៊ីរ៉ង់ មានជិត២ភាគ៣ នៃប្រជាជនសរុប។ ពួកគេទាំងនេះហើយ ដែលត្រូវការការផ្លាស់ប្តូរថ្មី ពួកគេនឿយណាយនឹងពួកអភិរក្សនិយម ដែលងប់ងល់តែជាមួយនឹងសាសនា យកលេសសាសនាជាធំ រិតបន្តឹងសេរីភាព ព្រមទាំងបិទទ្វារសេដ្ឋកិច្ច មិនព្រមត្រូវជាមួយប្រទេសដ៏ទៃ។
តាមរយៈលទ្ធផលនេះយើងឃើញហើយថា ក្រុមកណ្តាលនិយម និងក្រុមកំណែទម្រង់និយម បានឈ្នះសម្លេងច្រើននៅតាមទីក្រុងធំៗ ពោលគឺកន្លែងណាមានមនុស្សវ័យក្មេងៗច្រើន ដោយសារពួកគេដឹងឮច្រើន ស្វែងយល់បានច្រើនតាមរយៈបណ្តាញអ៊ីនធើនែតជាដើម។ ក្រុមអភិរក្សនិយម ឈ្នះសម្លេងច្រើន បានតែនៅតាមមូលដ្ឋាន ភូមិស្រុកឆ្ងាយៗ ដែលភាគច្រើនអ្នកបោះឆ្នោតសុទ្ធជាមនុស្សចាស់ ហើយពួកគាត់មានគំនិតចាស់គំរិល និងមិនមានការយល់ឃើញឲ្យទូលំទូលាយ។
ទោះបីជាយ៉ាងណា លទ្ធផលនេះគឺជាការត្រេកអរសម្រាប់ក្រុមលោកប្រធានាធិបតីរ៉ូហានីមែន តែវាក៏ជាការដាក់បន្ទុកមួយលើក្រុមនេះផងដែរ។ គឺថាក្រុមនេះត្រូវធ្វើឲ្យបានជោគជ័យ ត្រូវធ្វើកំណែទម្រង់ ស្រោចស្រង់សេដ្ឋកិច្ចអ៊ីរ៉ង់ ដើម្បីកុំឲ្យអ្នកម្ចាស់ឆ្នោតគេខកចិត្ត។ លោកមគុទេសសាសនាអ៊ីរ៉ង់ អាលី ខាមឺណី បានថ្លែងសារជាលក្ខណៈព្រមានកាលពីល្ងាចថ្ងៃទី២៨កុម្ភៈ ថាទិដ្ឋភាពនយោបាយថ្មីរបស់អ៊ីរ៉ង់ ដែលហុចអំណាចទៅឲ្យក្រុមកំណែទម្រង់ និងក្រុមកណ្តាលនិយម គឺក្រុមនេះត្រូវតែប្រយ័ត្ន គឺ ប្រយ័ត្នកុំធ្វើតែការអភិវឌ្ឍន៍ ឲ្យបានតែល្អមើលនៅពីខាងក្រៅ តែធាតុពិតធ្វើឲ្យអ៊ីរ៉ង់ បាត់បង់អធិបតេយ្យភាព ហើយនៅក្រោមក្លៀកមហាអំណាចបច្ចិមលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ