ក្រុមកួដស៊ីរី ប្រកាសដែនដីខ្លួនជាតំបន់សហព័ន្ធស្វយ័ត
ក្រុមជនជាតិកួដនៅស៊ីរី បានបង្ករការភ្ញាក់ផ្អើល ដោយបានប្រកាសនៅថ្ងៃព្រហស្បតិ៍ ទី១៧ មីនាម្សិលមិញ ថាដែនដីរបស់ពួកគេនៅភាគខាងជើងស៊ីរី ត្រូវបានប្រកាសឲ្យក្លាយជាដែនដីសហព័ន្ធស្វយ័តរបស់ស៊ីរី។ ការប្រកាសនេះស្របពេលដែលការចរចាសន្តិភាពនៅស៊ីរី កំពុងតែធ្វើទៅយ៉ាងសកម្មនៅក្រុងហ្សឺណែវ ប៉ុន្តែក្រុមជនជាតិកួដ មិនត្រូវបានគេរាប់បញ្ចូលទៅក្នុងការចរចាទេ។ តែយ៉ាងណាក៏ដោយ នេះគឺជាការប្រកាសជាឯកតោភាគី គ្មានការទទួលស្គាល់ជាផ្លូវការ រឺគាំទ្រពីភាគីណាទាំងអស់។
ចុះផ្សាយនៅថ្ងៃ៖
ស្តាប់ - ០២:២៧
តំបន់បីនៅភាគខាងជើងស៊ីរី គឺតំបន់ Afrine Kobané និង Jaziré ដែលស្ថិតនៅក្រោមការកាន់កាប់របស់កងកម្លាំងជនជាតិកួដ ត្រូវបានប្រកាស ឲ្យក្លាយជាតំបន់សហព័ន្ធស្វយ័ត។ ប៉ុន្តែអ្នកតំណាងក្រុមជនជាតិកួដ បានបញ្ជាក់ថា ការបែងចែងតំបន់ទាំងបីនេះជាតំបន់ស្វយត័ មិនមែនសំដៅទៅលើកត្តាប្រជាជនទេ តែគឺគេបែងចែងដោយយោងទៅតាមកត្តាភូមិសាស្ត្រ។ តំបន់នីមួយៗ មានអ្នកតំណាងសហគមន៍ជនជាតិកួដផង និងជនជាតិអារ៉ាប់ផងដែរ។ អ្នកតំណាងគណបក្សសម្ព័ន្ធប្រជាធិបតេយ្យកួដបាននិយាយថា ការធ្វើបែបនេះ គឺជាអ្វីដែលសហគមន៍ជនជាតិកួដចង់បាន ហើយថ្ងៃអនាគតទៅ គឺស៊ីរីត្រូវតែក្លាយជារដ្ឋសហព័ន្ធ ដោយផ្តល់សិទ្ធិទៅឲ្យតំបន់ស្វយ័តនីមួយ។
ទោះជាយ៉ាងនេះក្តី នេះគឺជាការប្រកាស និងជាការសម្រេចចិត្តរបស់ក្រុមជនជាតិកួដតែម្នាក់ឯង ដោយគ្មានការទទួលស្គាល់ជាផ្លូវការទេ។ អ្នកនាំពាក្យរដ្ឋាភិបាលស៊ីរី ក៏ដូចជាអ្នកនាំពាក្យក្រុមប្រឆាំង ដែលកំពុងតែមានមុខចរចានៅហ្សឺណែវ បានបញ្ជាក់នៅថ្ងៃព្រហស្បតិ៍ថា ការប្រកាសបែងចែកតំបន់សហព័ន្ធជាឯកតោភាគីបែបនេះ គឺគ្មានប្រសិទ្ធភាពផ្លូវច្បាប់ទេ ហើយមិនត្រឹមតែប៉ុណ្ណោះ វាធ្វើឲ្យរាំងស្ទះដល់ការចរចាសន្តិភាព។ ដោយឡែកសហរដ្ឋអាមេរិក ដែលធ្លាប់គាំទ្រទំនុកបំរុងក្រុមកួដ ក្នុងការប្រុយុទ្ធជាមួយក្រុមជីហាដអង្គការរដ្ឋអ៊ីស្លាម បានប្រកាសឲ្យដឹងហើយថា គេមិនគាំទ្រការបង្កើតរដ្ឋកួដអធិបតេយ្យជាដាច់ខាត ហើយគេក៏មិនចង់ឃើញដែនដីស៊ីរី ត្រូវបែងចែកជាពីរជាបីដែរ។
សូមបញ្ជាក់ថា ជនជាតិកួដមានប្រមាណជា១០% នៃប្រជាជនស៊ីរីសរុប។ បច្ចុប្បន្ននេះ ក្រុមកួដ គ្រប់គ្រងដែនដីចំនួន១៤% ដោយមួយចំនួនធំគឺពួកគេបានធ្វើការប្រយុទ្ធយ៉ាងស្វិតស្វាញ ជាមួយនឹងក្រុមជីហាដអង្គការរដ្ឋអ៊ីស្លាម។ តាំងពីដើមមក ក្រុមកួដបានប្រកាន់គោលជំហរនៅកណ្តាល មិនគាំទ្រខាងរដ្ឋាភិបាលស៊ីរី ហើយក៏មិនគាំទ្រខាងក្រុមឧទ្ទាមប្រឆាំងដែរ។ តែក្រុមកួដបានដើរតួនាទីយ៉ាងសំខាន់ ក្នុងយុទ្ធនាការកម្ទេចក្រុមជីហាដអង្គការរដ្ឋអ៊ីស្លាម។ ព្រំដែនប្រវែង៨០០គីឡូមែត្ររវាង តួកគី និងស៊ីរី គឺ៣ភាគ៤ ស្ថិតក្នុងការគ្រប់គ្រងរបស់ជនជាតិកួដ។ ហេតុដូច្នេះហើយ បានជារដ្ឋាភិបាលតួកគី ប្រឆាំងដាច់ខាត ព្រោះមិនចង់ឃើញក្រុមកួដស៊ីរី មានឥទ្ធិពលកាន់តែខ្លាំងទៅលើក្រុមកួដនៅតួកគី។
យ៉ាងណាក៏ដោយ ការប្រកាសតំបន់ភាគខាងជើងស៊ីរី ជាតំបន់សហព័ន្ធស្វយ័ត ដោយឯកឯងនាពេលនេះ គឺត្រូវបានអ្នកវិភាគយល់ថា គឺក្រុមជនជាតិកួដចង់ផ្ញើរសារនយោបាយ ទៅកាន់ក្រុងហ្សឺណែវ ដែលជាទីចរចាសន្តិភាពដើម្បីស៊ីរី។ គេទុកក្រុមកួដចោលគ្រលៀតជញ្ជាំង មិនឲ្យចូលទៅចរចាជាមួយគេទេ។ ដូច្នេះតាមរយៈសារនេះ ជនជាតិកួដចង់ប្រាប់ទៅភាគីចរចា ក៏ដូចជាអង្គការសហប្រជាជាតិថា បើអ្នកឯងមិនគិតគូរពីវាសនាពួកខ្ញុំទេ គឺទុកឲ្យពួកខ្ញុំគិតគូរដោយខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ