ប្រជាជនអ៊ីរ៉ង់បោះឆ្នោតរើសសមាជិកសភា និងសមាជិកសភាសាសនា
ប្រជាជនអ៊ីរ៉ង់ប្រមាណជា៥៥លាននាក់ កំពុងតែនាំគ្នាទៅបោះឆ្នោត នៅថ្ងៃសុក្រទី ២៦កុម្ភៈនេះ ដើម្បីជ្រើសរើសសមាជិកសភាជាតិ ព្រមទាំងសមាជិកសភាសាសនា ដែលជាស្ថាប័នកំពូលទាំងពីរនៃសាធារណរដ្ឋអ៊ីស្លាមអ៊ីរ៉ង់។ នេះជាការបោះឆ្នោតដ៏មានសារៈសំខាន់ សម្រាប់អនាគតនយោបាយរបស់លោកប្រធានាធិបតីអ៊ីរ៉ង់បច្ចុប្បន្ន ដែលជាមនុស្សកណ្តាលនិយម ហើយបានបើកទ្វារអ៊ីរ៉ង ឲ្យមានទំនាក់ទំនងជាមួយអន្តរជាតិឡើងវិញ។ បើប្រជាជនអ៊ីរ៉ង់ពេញចិត្តនឹងនយោបាយនេះ នោះសមាជិកសភាមកពីក្រុមកណ្តាលនិយម អាចនឹងទទួលបានសម្លេងភាគច្រើន លើសក្រុមអភិរក្សនិយម នៅក្នុងសភាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៣១
ការបោះឆ្នោតមួយ សម្រាប់សភាពីរ៖
ការបោះឆ្នោតនៅអ៊ីរ៉ង់ ក្នុងថ្ងៃនេះ គឺជាការបោះឆ្នោតជ្រើសរើសសមាជិកសភាពីរ ក្នុងពេលតែមួយ។ ពោលគឺជ្រើសរើសសមាជិកសភាជាតិ និងសមាជិកសភាសាសនា។ សភាជាតិ ដែលជាស្ថាប័ននិតិបញ្ញត្តិ មានអាសនៈចំនួន២៩០ សម្រាប់អាណត្តិចំនួន៤ឆ្នាំ។ ឯចំណែកសភាសាសនា គឺមានអាសនៈចំនួន៨៨ ដែលទុកសម្រាប់តែប្រមុខសាសនាអ៊ីស្លាមអ៊ីរ៉ង់តែប៉ុណ្ណោះ។
សម្រាប់សភាជាតិ គឺមានបេក្ខជនឈរឈ្មោះចំនួន ៤៨៤៤នាក់ ដែលក្នុងនោះមានមនុស្សស្រីចំនួនជិត៥០០នាក់ ដែលនេះជារឿងមួយគួរឲ្យភ្ញាក់ផ្អើលដែរ សម្រាប់អ៊ីរ៉ង់ ដែលជាប្រទេសប្រកាន់សាសនាអ៊ីស្លាមតឹងរឹង។ នៅក្នុងប្រទេសផ្សេង កុំថាឡើយដល់ទៅឈរឈ្មោះជាតំណាងរាស្ត្រ សូម្បីតែសិទ្ធិបោះឆ្នោតក៏មនុស្សស្រីគ្មានផងទេ។ ឯចំណែកសភាសាសនាវិញ គឺមានបេក្ខជនឈរឈ្មោះចំនួន១៥៩នាក់ ដែលសុទ្ធសឹងតែជាមនុស្សប្រុសទាំងអស់។
បេក្ខជនឈរឈ្មោះជាឯកត្តនាម គ្មានឈ្មោះគណបក្ស៖
បេក្ខជនឈរឈ្មោះបោះឆ្នោតទាំងអស់ គឺឈរឈ្មោះជាលក្ខណៈឯកត្តនាម មានន័យថាឈរឈ្មោះតែម្នាក់ឯង ក្នុងនាមបុគ្គលដោយមិនមានប្រើឈ្មោះគណបក្សទេ។ ក៏ប៉ុន្តែធម្មតាទេ អ្នកដែលឈរឈ្មោះម្នាក់ៗ តែងតែមាននិន្នាការនយោបាយ ទៅតាមចរន្តនយោបាយធំៗរបស់អ៊ីរ៉ង់។ តាមពិតអ្នកដែលត្រូវបានគេអនុញ្ញាតិ ឲ្យឈរឈ្មោះបោះឆ្នោតសភាជាតិនៅថ្ងៃនេះ មានដល់ទៅ៦១០០នាក់ឯណោះ ក៏ប៉ុន្តែកាលពីថ្ងៃម្សិលមិញ មុនបោះឆ្នោតមួយថ្ងៃ មានបេក្ខជនជាង១៤០០នាក់ បានសម្រេចដកខ្លួនចេញ ដើម្បីកុំឲ្យបែកសម្លេងឆ្នោតច្រើនពេក។
អ្នកដែលសម្រេចថាបេក្ខជនណាអាចឈរឈ្មោះបាន គឺក្រុមប្រឹក្សាការពាររដ្ឋធម្មនុញ្ញ។ ក្រុមប្រឹក្សានេះ មានសមាជិក១២នាក់ ក្នុងនោះមានប្រមុខសាសនា និងអ្នកច្បាប់ ដែលតែងតាំងដោយមគុទេសន៍សាសនាអ៊ីរ៉ង់ និងអាជ្ញាធរយុត្តិធម៌របស់អ៊ីរ៉ង់។ ក្រុមប្រឹក្សានេះមានអំណាចខ្លាំងណាស់ ព្រោះជាអ្នកសម្រេចថា អ្នកណាអាចចូលរួមឈរឈ្មោះបោះឆ្នោតបាន។ ជាក់ស្តែង មានការតវ៉ាជាច្រើនដោយសារ បេក្ខជនមកពីក្រុមកំណែទម្រង់និយម ស្ទើរតែទាំងអស់ត្រូវបានក្រុមប្រឹក្សានេះ ច្រានបេក្ខភាពចោល មិនឲ្យចូលរួមបោះឆ្នោត។ បញ្ហានេះ គឺជាចំណោទមួយធំណាស់ បើសិនជាយើងចង់បាននូវការបោះឆ្នោតមួយដោយសេរីពេញលេញ។
តើសភាសាសនាអ៊ីរ៉ង់ ជាអ្វី?
យើងតែងតែឮ ជួនកាលគេនិយាយពី លោកប្រធានាធិបតីអ៊ីរ៉ង់ តែជួនកាលគេនិយាយពីលោកប្រមុខមគុទេសន៍សាសនា រឺលោកអាយ៉ាតូឡាអ៊ីរ៉ង់។ គឺជាមនុស្សពីរនាក់ខុសគ្នា ប៉ុន្តែមានអំណាចកំពូលធំម្យ៉ាងម្នាក់។ ប្រមុខមគុទេសន៍សាសនាអ៊ីរ៉ង់ គឺត្រូវបានតែងតាំងឡើងដោយ សភាសាសនានេះឯង។ សមាជិកសភាសាសនានេះ គឺសុទ្ធជាមេដឹកនាំសាសនាអ៊ីស្លាមធំៗ នៅអ៊ីរ៉ង់ ដែលមានអាណត្តិ៨ឆ្នាំ ហើយមានតួនាទីតែងតាំង និងដកដំណែងប្រមុខមគុទេសន៍សាសនា។
បច្ចុប្បន្ននេះប្រមុខមគុទេសន៍សាសនា គឺលោកអាយ៉ាតូឡា អាលី ខេមណី ដែលមានអាយុ៧៦ឆ្នាំហើយ។ ដូច្នេះតាមការស្មាន សភាសាសនាថ្មី ដែលនឹងកើតចេញពីលទ្ធផលបោះឆ្នោតនៅថ្ងៃនេះ គឺអាចនឹងត្រូវតែងតាំងលោកអាយ៉ាតូឡាថ្មី ក្នុងពេលឆាប់ៗខាងមុខនេះហើយ។
លោកអាយ៉ាតូឡា រឺប្រមុខមគុទេសន៍សាសនានេះ មានតួនាទីធំណាស់នៅអ៊ីរ៉ង់ ពោលគឺសឹងតែធំជាងប្រធានាធិបតីទៀត បើទោះបីជាគាត់មិនលូកដៃចូលក្នុងកិច្ចការរបស់រដ្ឋាភិបាលដោយផ្ទាល់ក៏ដោយ។ អាយ៉ាតូឡា គឺជាអ្នកឃ្លាំមើលដំណើរការគោរពគន្លងប្រពៃណីសាសនាអ៊ីស្លាមដ៏តឹងតែង ហើយជានិច្ចជាកាល សមាជិករដ្ឋាភិបាល និងរដ្ឋសភាទទួលឥទ្ធិពលដោយប្រយោលពីលោកអាយ៉ាតូឡា ដែរ។
ក្រុមអភិរក្សនិយម រឺក្រុមកណ្តាលនិយម?
ចរន្តនយោបាយធំៗនៅអ៊ីរ៉ង់ គឺមាន ៣ គឺទីមួយគឺក្រុមអភិរក្សនិយមដែលជាក្រុមប្រកាន់ខ្ជាប់ នូវតំលៃកំពូលរបស់សាសនាអ៊ីស្លាម។ ចរន្តទីពីរគឺចរន្តកណ្តាលនិយម ដែលមានលោកប្រធានាធិបតីអ៊ីរ៉ង់បច្ចុប្បន្ន លោកហាសាន់ រូហានី ជាមេដឹកនាំ។ ចរន្តចុងក្រោយ គឺក្រុមអ្នកកំណែទម្រង់និយម ដែលយើងអាចហៅបានថាជាក្រុមប្រឆាំង ដែលទាមទារឲ្យធ្វើកំណែទម្រង់ ធ្វើការផ្លាស់ប្តូរថ្មី។
ចរន្តអភិរក្សនិយមនេះ គឺជាក្រុមនយោបាយរបស់លោកអាយ៉ាតូឡា អាលី ខេមណី ដែលតែងតែប្រុងប្រយ័ត្ន មិនចង់ឲ្យអ៊ីរ៉ង់ បើកទ្វារចំហរទទួលបរទេសទេ ជាពិសេសសហរដ្ឋអាមេរិកតែម្តង។ ក្រុមអ្នកអភិរក្សនិយមនេះ ចាត់ទុកបចិ្ចមលោក ប្រទេសមហាអំណាចសេរី មានអាមេរិក បារាំង អង់គ្លេសជាដើម ជាប្រទេសកេងចំណេញ ជិះជាន់អ្នកទន់ខ្សោយដើម្បីប្រយោជន៍ខ្លួន។ បច្ចុប្បន្នក្រុមនេះ មានសម្លេងភាគច្រើន ទាំងក្នុងសភាជាតិ ទាំងក្នុងសភាសាសនា។
ក៏ប៉ុន្តែគេកំពុងតែចាំសង្កេតមើល ថាតើប្រជាជនអ៊ីរ៉ង់ នឹងបោះឆ្នោតឲ្យក្រុមមួយណា នៅថ្ងៃនេះ។ បើក្រុមអភិរក្សនិយមឈ្នះ មានន័យថាប្រជាជនអ៊ីរ៉ង់ មិនពេញចិត្តនឹងនយោបាយបើកទ្វារចំហរសេដ្ឋកិច្ច ជាមួយលោកខាងលិច របស់លោករ៉ូហានីទេ។
បើកទ្វារសេដ្ឋិកិច្ច បើកទ្វារអនាគតសម្រាប់ប្រជាជនអ៊ីរ៉ង់៖
យើងត្រូវទទួលស្គាល់ថា ដោយសារតែទំនោរមិនជ្រុលនិយម របស់លោកប្រធានាធិបតីហាសាន់ រ៉ូហានី ទើបបានឈានទៅដល់ ការចុះហត្ថលេខាលើកិច្ចព្រមព្រៀងស្តីពីកម្មវិធីនុយក្លេអ៊ែរអ៊ីរ៉ង់ ជាមួយមហាអំណាច កាលពីខែកក្កដាឆ្នាំទៅ។ កិច្ចព្រមព្រៀងនេះ បានធ្វើឲ្យមហាអំណាចដកទណ្ឌកម្មចេញពីអ៊ីរ៉ង់ កាលពីខែមករាដើមឆ្នាំនេះ។ សម្រាប់អ្នកសេដ្ឋវិទូ ការដកទណ្ឌកម្មចេញពីអ៊ីរ៉ង់ គឺមិនខុសពីប្រោសសេដ្ឋកិច្ចអ៊ីរ៉ង់ ឲ្យរស់ឡើងវិញទេ។ អ៊ីរ៉ង់ មិនអាចបន្តបិទទ្វារនៅតែម្នាក់ឯងបានទេ។ សម្តីអ្នកនយោបាយ ដែលស្រែកក្តែងៗថា អ៊ីរ៉ង់មិនត្រូវចុះញ៉មអាមេរិក អ៊ីរ៉ង់មានកំលាំង ទាំងអស់នេះគ្រាន់តែឲ្យបានពិរោះប៉ុណ្ណោះ តែតថៈភាពជាក់ស្តែងគឺប្រជាជនអ៊ីរ៉ង់ រស់ទាំងលំបាក ដោយសារតែគ្មានច្រកសេដ្ឋកិច្ចជាមួយគេដ៏ទៃ។
សម្រាប់ពេលនេះ ថ្វីបើការបើកចំហរសេដ្ឋកិច្ច នៅមិនទាន់ហុចផលនៅឡើយក្តី ថ្វីបើអត្រាអ្នកអត់ការងារនៅតែមានកម្រិតខ្ពស់ ប្រមាណជា៣០%ក្តី ក៏ប៉ុន្តែការបើកចំហរសេដ្ឋកិច្ចអ៊ីរ៉ង់ ដែលជាគំនិតរបស់ក្រុមកណ្តាលនិយម គឺជាក្តីសង្ឃឹមថ្មីរបស់ប្រជាជនអ៊ីរ៉ង់។ ដង្ហើមសេដ្ឋកិច្ច គឺការចង់បានចំបងរបស់ប្រជាជន។ លំហូរវិនិយោគបរទេស នឹងចូលទៅអ៊ីរ៉ង់ ជាបន្តបន្ទាប់។
ទាំងនេះហើយ ជាចំណុចសង្ឃឹមរបស់ក្រុមកណ្តាលនិយមរបស់លោកប្រធានាធិបតីហាសាន់ រ៉ូហានី។ បើក្រុមលោកបានសម្លេងភាគច្រើនក្នុងសភាជាតិ និងសភាសាសនា ហើយអាចមានលទ្ធភាពជ្រើសរើសអាយ៉ាតូឡាថ្មីដែលមិនសូវជ្រុលនិយមទៀតនោះ គឺអ្វីៗកាន់តែប្រសើរ។ យ៉ាងណាក៏ដោយ លទ្ធផលបោះឆ្នោតនេះ វាជាការសម្រេចចិត្តរបស់ប្រជាជនអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ