ម៉ិកស៊ិកគាំទ្របេក្ខភាពកម្ពុជាជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខUN
កម្ពុជាទទួលបានការគាំទ្រពីប្រទេសម៉ិកស៊ិកមួយទៀតចំពោះបេក្ខភាពខ្លួនជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។ ការប្រកាសនេះត្រូវបានធ្វើឡើងនៅក្នុងជំនួបទ្វេភាគីរវាងមេដឹកនាំជាន់ខ្ពស់កម្ពុជា និងម៉ិកស៊ិកកាលពីថ្ងៃទី១៧មិថុនាម្សិលមិញ។ ជំនួបនោះក៏បានផ្តល់ឱកាសអោយកម្ពុជានិងម៉ិកស៊ិកពិចារណាអំពីការផ្តើមទំនាក់ទំនងសហប្រតិបត្តិការទ្វេភាគីជាមួយគ្នាផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
កម្ពុជានៅបន្តស្វែងរកការគាំទ្រពីបរទេសចំពោះបេក្ខភាពរបស់ខ្លួនជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។ ក្នុងឱកាសដែលគណៈប្រតិភូកម្ពុជាកំពុងនៅក្នុងប្រទេសម៉ិកស៊ិកដើម្បីចូលរួមក្នុងកិច្ចប្រជុំកំពូលនៃប្រទេសឧស្សាហកម្មជឿនលឿនទាំង២០នោះ ប្រតិភូជាន់ខ្ពស់កម្ពុជា ក្នុងឋានៈជាប្រធានអាស៊ានផង បានជួបពិភាក្សាទ្វេភាគីជាមួយប្រធានាធិបតីម៉ិកស៊ិក លោកហ្វីលីព កាល់ដេរ៉ុន ហ៊ីណូហ្សូសា។
នៅពេលនោះហើយដែលលោកនាយករដ្ឋមន្ត្រីហ៊ុន សែនបានថ្លែងអរគុណរដ្ឋាភិបាលម៉ិកស៊ិកដែលបានគាំទ្របេក្ខភាពកម្ពុជាជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។ នេះបើយោងតាមការផ្សាយអោយដឹងរបស់ទូរទស្សន៍ជាតិកម្ពុជា។
អ្នកនាំពាក្យក្រសួងការបរទេសកម្ពុជា លោកកុយ គួងបានថ្លែងអោយដឹងថារហូតដល់ពេលនេះមានប្រទេសប្រមាណ១០០ប្រទេសហើយ ក្នុងនោះក៏មានប្រទេសមហាអំណាចធំៗផងដែរ ដែលបានថ្លែងគាំទ្រកម្ពុជាអោយកាន់តំណែងសមាជិកមិនអចិន្ត្រៃយ៍នៅក្នុងអង្គការពិភពលោកមួយនេះ។
គួរបញ្ជាក់ថា មានបេក្ខភាព៣ពីអាស៊ីដែលបានចុះឈ្មោះធ្វើជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិនេះ។ គឺប្រទេសកូរ៉េខាងត្បូង ប៊ូតាន និងកម្ពុជានេះឯង។ គូប្រជែងខ្លាំងរបស់កម្ពុជាគឺប្រទេសកូរ៉េខាងត្បូង នៅក្នុងការបោះឆ្នោតដែលនឹងប្រព្រឹត្តទៅខែតុលាខាងមុខ។
ជំនួបរវាងប្រតិភូថ្នាក់ដឹកនាំកម្ពុជា និងម៉ិកស៊ិកបានផ្តល់ពេលវេលាអោយភាគីទាំងពីរផ្តើមគិតគូរអំពីការផ្លាស់ប្តូរសហប្រតិបត្តិការទ្វេភាគីស៊ីជម្រៅផងដែរ។ គួររំលឹកថា រដ្ឋាភិបាលម៉ិកស៊ិកក្នុងនាមជាម្ចាស់ផ្ទះនៃកិច្ចប្រជុំកំពូលសេដ្ឋកិច្ច G20 បានអញ្ជើញលោកនាយករដ្ឋមន្ត្រីកម្ពុជា ហ៊ុន សែន ក្នុងឋានៈជាប្រធានអាស៊ានដើម្បីថ្លែងសុន្ទរកថាគន្លឹះសេដ្ឋកិច្ចនៅក្នុងកិច្ចប្រជុំកំពូលនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ