នាយករដ្ឋមន្ត្រីអ៊ីរ៉ាក់សុខចិត្តស្វែងរកដំណោះស្រាយតាមផ្លូវនយោបាយ
នៅចំពោះមុខការវាយលុកកាន់តែខ្លាំងទៅៗរបស់ពួកឧទ្ទាមជីហាតនៅអ៊ីរ៉ាក់ ព្រមទាំងបរាជ័យជាបន្តបន្ទាប់របស់កងទ័ពអ៊ីរ៉ាក់ចំពោះការវាយលុកនេះ លោកនាយករដ្ឋមន្ត្រី ម៉ាលីគី បានថ្លែងឲ្យដឹងថា ដំណោះស្រាយតាមផ្លូវនយោបាយមួយនឹងត្រូវដាក់ចេញ។ នេះគឺជាការផ្លាស់ប្តួរឥរិយាបថដ៏លឿនរហ័សរបស់នាយករដ្ឋមន្ត្រីម៉ាលីគី ព្រោះថាមុននេះគាត់បានបដិសេធយ៉ាងដាច់អហង្ការ ថាគាត់នឹងមិនព្រមបង្កើតរដ្ឋាភិបាលបង្រួបបង្រួមជាតិ ដោយមានក្រុមស៊ុនីតចូលរួមទេ។
ចុះផ្សាយនៅថ្ងៃ៖
ស្តាប់ - ០២:២៦
ក្រុមរបស់លោកនាយករដ្ឋមន្ត្រីអ៊ីរ៉ាក់បច្ចុប្បន្ន បានឈ្នះការបោះឆ្នោតសភា កាលពីខែមេសាកន្លងទៅ។ ប៉ុន្តែជ័យជម្នះដែលមិនបានទទួលសំឡេងភាគច្រើននេះ បានរារាំងមិនអាចឲ្យលោក ម៉ាលីគី រៀបចំរដ្ឋាភិបាលបាននៅឡើយទេ។ ស្របពេលជាមួយគ្នានេះ ក្រុមឧទ្ទាមអ៊ីស្លាមនិកាយស៊ុនីត បានធ្វើការវាយលុកកាន់តែខ្លាំងនាប៉ុន្មានសប្តាហ៍ចុងក្រោយនេះ ដោយបានដណ្តើមកាន់កាប់ដែនដីមួយភាគធំនៅភាគខាងជើង។ លោកនាយករដ្ឋមន្ត្រី ម៉ាលីគី និងក្រុមរបស់គាត់ដែលជាអ្នកកាន់សាសនាអ៊ីស្លាមនិកាយស្ហីអ៊ីត ធ្លាប់បានបដិសេធថាគ្មានដំណោះស្រាយតាមផ្លូវនយោបាយណាមួយ ក្រៅពីការវាយបកដោយកម្លាំងយោធានោះទេ។
លោក ម៉ាលីគីធ្លាប់ត្រូវបានគេរិះគន់ថាជានាយករដ្ឋមន្តី្រផ្តាច់ការ ដែលគិតតែពីបក្សពួកគ្នាឯង និង មិនព្រមស្តាប់គេ ហើយធ្វើការរួបរួមជាមួយក្រុមដ៏ទៃទេ។ សូម្បីតែក្នុងក្រុមរបស់គាត់ក៏មាន អ្នកមិនពេញចិត្តនិងចរិកអត្តនោម័តរបស់គាត់ដែរ។ ទន្ទឹមពេលដែលកងទ័ពអ៊ីរ៉ាក់របស់លោក ម៉ាលីគី បានទទួលបរាជ័យជាបន្តបន្ទាប់នាពេលនេះ លោក ម៉ាលីគី បានផ្លាស់ប្តូរការសម្រេចចិត្តយ៉ាងរហ័ស ដោយថាលោកសុខចិត្តស្វែងរកដំណោះស្រាយតាមផ្លូវនយោបាយ។ ដំណោះស្រាយនោះ អាចជាការបង្កើតរដ្ឋាភិបាលបង្រួបបង្រួមជាតិមួយ ដោយមានអ្នកតំណាងក្រុមអ៊ីស្លាមនិកាយស៊ុនីតចូលរួម។
មួយសប្តាហ៍មុនមានការសម្រេចចិត្តនេះ មានពាក្យចចាមអារ៉ាមថានឹងមានការផ្លាស់ប្តូរនាយករដ្ឋមន្ត្រី ព្រោះថាលោក ម៉ាលីគី មានអ្នកមិនពេញចិត្តច្រើនពេក ហើយថាលោកគ្មានសមត្ថភាព ក្នុងការបញ្ឈប់ការបះបោររបស់របស់ពួកឧទ្ទាមស៊ុនីត។ កន្លងមកលោកប្រធានាធិបតីអាមេរិកធ្លាប់បានថ្លែងថា អាមេរិកគ្មានសិទ្ធិអ្វីទៅលូកដៃ ជ្រើសរើសនាយករដ្ឋមន្ត្រីអ៊ីរ៉ាក់ទេ។ ប៉ុន្តែថ្មីៗនេះកាសែតញូវយ៉កថែមបានសរសេរថា អគ្គរដ្ឋទូតអាមេរិកបានពិភាក្សាជាមួយក្រុមនិកាយស្ហីអ៊ីត និងអ្នកតំណាងក្រុមជនជាតិគួដ ដើម្បីស្វែងរកនរណាម្នាក់ផ្សេងទៀត មកជំនួសលោកម៉ាលីគី។ បើពិតមែននោះ មានន័យថាការផ្លាស់ប្តូរឥរិយាបថរបស់លោកម៉ាលីគី គឺដើម្បីឆ្លើយតបទៅនឹងការរិះគន់ ហើយមានន័យថា លោកនឹងមិនសុខចិត្ត ឲ្យនរណាមកជំនួសកន្លែងលោកដោយងាយៗទេ។
គួរបញ្ជាក់ថាឥទ្ធិពលរបស់ប្រទេសអ៊ីស្លាមធំៗនៅក្បែរខាងអ៊ីរ៉ាក់ក៏មានសារៈសំខាន់ណាស់ដែរ ក្នុងដំណើរស្វែងរកសន្តិភាពនៅអ៊ីរ៉ាក់។ អ៊ីរ៉ង់ដែលជាប្រទេសសម្បូរអ្នកកាន់និកាយស្ហីអ៊ីតពិតជាពិបាកសម្រេចចិត្តថាតើ ត្រូវគាំទ្រការរួបរួមគ្នារវាងក្រុមឈីអ៊ីតនិងក្រុមស៊ុនីត នៅអ៊ីរ៉ាក់ ឬយ៉ាងណា។ មួយវិញទៀត គេមិនច្បាស់ថា បណ្តាប្រទេសធំៗផ្សេងទៀតដូចជា អារ៉ាប៊ីសាអ៊ូឌីត ហ្សកដានី និងប្រទេសអារ៉ាប់រួម ដែលប្រទេសទាំងនោះសុទ្ធសឹង ជាប្រទេសសម្បូរអ្នកកាន់និកាយស៊ុនីត និងឈប់គាំទ្រក្រុមឧទ្ទាមជីហាតស៊ុនីតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ