តួកគី៖ច្បាប់រំលោភអនីតិជនដ៏ចម្រូងចម្រាស- អ្នករាយការណ៍អ.ស.បបារម្ភពីការបិទសិទ្ធិមតិយោបល់
សប្តាហ៍នេះ សភាតួកគីបានបោះឆ្នោតលើសំណើច្បាប់ អនុញ្ញាតអោយព្យួរការកាត់ទោសជនល្មើសដែលរំលោភអនីតិជន ករណីជនរូបនោះព្រមរៀបការជនរងគ្រោះ។ ច្បាប់ដ៏ចម្រូងចម្រាសនេះនឹងត្រូវសភាបោះឆ្នោតជាលើកទី២ទៀត ទើបអាចអនុម័តបាន។ ទន្ទឹមនេះដែរ អ្នករាយការណ៍ពិសេសរបស់អង្គការសហប្រជាជាតិបានកត់សម្គាល់ពីបញ្ហា នៃការបិទសិទ្ធិបញ្ចេញមតិយោបល់នៅតួកគី។
ចុះផ្សាយនៅថ្ងៃ៖ កែប្រែថ្ងៃទី៖
កាលពីថ្ងៃព្រហស្បតិ៍ សភាតួកគីបានបោះឆ្នោតលើសំណើច្បាប់ អនុញ្ញាតអោយព្យួរការកាត់ទោស ជនល្មើសដែលរំលោភភេទអនីតិជន ករណីជនរូបនោះព្រមរៀបការជនរងគ្រោះ។ គម្រោងច្បាប់នេះ បានបង្កភាពចម្រូងចម្រាសក្នុងស្រុក រងការបរិហាររិះគន់ពីក្រុមការពារសិទ្ធិកុមារ និងក្រុមប្រឆាំង។
រដ្ឋមន្ត្រីយុត្តិធម៌តួកគីបានរិះគន់ក្រុមប្រឆាំងថាចង់បង្វែរខ្លឹមសារពិតនៃគម្រោងច្បាប់នេះ។ យោងតាមរដ្ឋមន្ត្រីយុត្តិធម៌ គម្រោងច្បាប់នេះ ប្រើបានតែករណីពិសេសមួយចំនួនប៉ុណ្ណោះ។ ដូចជាករណីគូស្នេហ៍ដែលភាគីខាងស្រី មិនទាន់គ្រប់អាយុ។ បើភាគីខាងប្រុសព្រមរៀបការគាត់ នោះភាគីខាងប្រុសអាចរួចទោស។
ក្នុងសង្គមតួកគី មានករណីគ្រូពេទ្យជូនដំណឹងទៅរដ្ឋអាជ្ញា ពីករណីនារីអនីតិជន មានផ្ទៃពោះ។ ដូច្នេះ អាជ្ញាធរចាប់បុរសជាគូស្នេហ៍ដាក់ពន្ធនាគារ ធ្វើអោយនារីរងគ្រោះ ត្រូវរ៉ាប់រងចិញ្ចឹមកូនតែម្នាក់ឯង។ គម្រោងច្បាប់លើកលែងជនបំពានភេទនេះ គឺចង់ស្រោចស្រង់គូស្នេហ៍រងគ្រោះប្រភេទនេះ។
ប៉ុន្តែ ពាក្យថា លើកលែងជនបំពានភេទនេះហើយដែលបង្កជាភាពចម្រូងចម្រាសឡើង។ សូមបញ្ជាក់ថា តួកគីអនុញ្ញាតអោយរៀបអាពាហ៍ពិពាហ៍ ចាប់ពីអាយុ១៧ឆ្នាំទៅ។ សម្រាប់ករណីលើកលែងមួយចំនួន គេក៏អាចរៀបការពីអាយុ១៦ឆ្នាំដែរ។ ករណីរៀបការទាំងនៅជាអនិតិជននេះ កើតឡើងច្រើន នៅតាមភាគខាងកើតប្រទេស ហើយក្មេងស្រីៗបានរងសម្ពាធអោយរៀបការពីក្រុមគ្រួសារ។
ដោយឡែក ទាក់ទងនឹងសេរីភាពនៃការបញ្ចេញមតិយោបល់ អ្នករាយការណ៍ពិសេសអង្គការសហប្រជាជាតិ លោកដេវីត ខេយ David Kaye បានទៅទស្សនកិច្ចនៅតួកគី និងបានកត់សម្គាល់ពីស្ថានភាពអាប់អួរនៅតួកគីក្រោយរដ្ឋប្រហារមិនបានសម្រេចខែកក្កដា។ លោកKaye លើកឡើងថា តួកគីកំពុងប្រឈមការគំរាមសន្តិសុខ ពីក្រុមភេរវជនរដ្ឋអ៊ីស្លាមនិងក្រុមឧទ្ទាមPKK។ ប៉ុន្តែ មិនមែនមានន័យថា ដោយសារស្ថានភាពនេះ រដ្ឋាភិបាលត្រូវតែបិទសិទ្ធិក្នុងការបញ្ចេញមតិយោបល់ តាមតែចិត្តចង់នោះទេ។
ក្នុងការបោសសម្អាតរដ្ឋប្រហារកន្លងមក តួកគីបានចាប់ខ្លួនរឺព្យួរការងារមនុស្សជាង១សែននាក់ ក្នុងនោះមានអ្នកសារព័ត៌មានកាសែតប្រឆាំងជាច្រើននាក់។ សារព័ត៌មានជាច្រើនត្រូវបានអាជ្ញាធរបិទទ្វារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ