តាមដងផ្លូវនៅមមាញឹក ខណៈដែលកម្ពុជាកំពុងរៀបចំកិច្ចប្រជុំកំពូលអាស៊ាន
ចុះផ្សាយនៅថ្ងៃ៖
ស្តាប់ - ០៨:២២
ការធ្វើដំណើររបស់មហាជននៅតែមមាញឹកតាមមហាវិថីសហព័ន្ធរុស្ស៊ី ពីអាកាសយានដ្ឋានអន្តរជាតិភ្នំពេញ ឆ្ពោះទៅកាន់វិមានសន្តិភាព ឬទីស្តីការគណៈរដ្ឋមន្ត្រី ដែលជាកន្លែងប្រារព្ធកិច្ចប្រជុំកំពូលអាស៊ាន លើកទី២០ ចាប់ពីថ្ងៃទី៣០មីនា ដល់ថ្ងៃទី៤មេសា។ តាមអមសងខាងផ្លូវ ដែលតុបតែងដោយទង់ជាតិប្រទេសសមាជិកអាស៊ានទាំង ១០ ប្រទេស រួមទាំង មានបដា ចងកាត់ទទឹងផ្លូវផងនោះ ក៏មានកម្លាំងប៉ូលិស ប៉េអឹម និងកងអង្គរក្សរបស់លោកនាយករដ្ឋមន្ត្រី ត្រូវបានដាក់ពង្រាយ ដើម្បីការពារសន្តិសុខ និងធ្វើសណ្តាប់ធ្នាប់ ទទួលដំណើរមកដល់របស់គណៈប្រតិភូ សម្រាប់ចូលរួមកិច្ចប្រជុំកំពូលអាស៊ាន។ ក៏ប៉ុន្តែទោះជាក្បួនអមដំណើរគណៈប្រតិភូ ឆ្លងកាត់ ដែលមានប៉ូលិសបើកម៉ូតូហែហម និងបិទផ្លូវ រាប់មិនអស់ក្នុងមួយថ្ងៃ គឺមិនបានរំខានដល់អ្នកលក់ដូរតាមផ្លូវ និងអ្នករកទទួលទានលើដងផ្លូវដ៏សំខាន់មួយនេះទេ៕