ជប៉ុនបដិសេធមិនបញ្ជូនអ្នកសង្កេតការណ៍ទៅមើលការបាញ់កាំជ្រួចមីស្ស៊ីលនៅកូរ៉េខាងជើងឡើយ
ប្រទេសជប៉ុនបានបដិសេធមិនបញ្ជូនអ្នកសង្កេតការណ៍ តាមការអញ្ជើញរបស់ទីក្រុងព្យុងយ៉ាងឲ្យទៅមើលការបាញ់កាំជ្រួចមីស្ស៊ីលនៅកូរ៉េខាងជើងឡើយ។ ដោយទីក្រុងតូក្យូនិងសម្ព័ន្ធមិត្តរបស់ខ្លួនសង្ស័យថា ប្រទេសកូរ៉េខាងជើងបន្លំធ្វើការបាញ់សាកល្បងកាំជ្រួចអន្តរទ្វីបរបស់ខ្លួន។ នេះជាការប្រកាសជាផ្លូវការនៅថ្ងៃអង្គារទី៣មេសាឆ្នាំ២០១២នេះដោយទីក្រុងតូក្យូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
“ ពេលនេះពុំមែនជាពេល ដែលអ្នកទទួលខុសត្រូវជប៉ុនណាម្នាក់ត្រូវទៅចូលរួមមើល ការបាញ់កាំជ្រួចមីស្ស៊ីលនៅប្រទេសកូរ៉េខាងជើងឡើយ។” នេះជាការឆ្លើយតបរបស់អ្នកនាំពាក្យនៃរដ្ឋាភិបាលជប៉ុន លោក Osamu Fujimura ទៅនឹងការអញ្ជើញរបស់ទីក្រុងព្យុងយ៉ាងដែលបានធ្វើទៅកាន់ទីភ្នាក់ងារជប៉ុនខាងការរុករកក្នុងវិស័យអវកាស Japan Aerospace Exploration Agency ( Jaxa )។
គួរបញ្ជាក់ថា ការបាញ់កាំជ្រួចមីស្ស៊ីលនៅកូរ៉េខាងជើងនេះគឺគ្រោងប្រព្រឹត្តទៅនៅចន្លោះថ្ងៃទី១២និង១៦មេសាឆ្នាំ២០១២ នៅឱកាសបុណ្យខួបកំណើត១០០ឆ្នាំរបស់អតីតអគ្គមគ្គុទ្ទេសក៍ស្ថាបនិកកូរ៉េខាងជើង គីម អ៊ីលស៊ុង។ បើយោងតាមអាជ្ញាធរកូរ៉េខាងជើង ការបាញ់កាំជ្រួចមីស្ស៊ីលនៅកូរ៉េខាងជើងនេះ គឺធ្វើឡើងក្នុងគោលបំណងបម្រើផលប្រយោជន៍ស៊ីវិលតែប៉ុណ្ណោះ។
ក៏ប៉ុន្តែ សម្រាប់សហរដ្ឋអាមេរិកនិងសម្ព័ន្ធមិត្តមានជាអាទិ៍ ប្រទេសកូរ៉េខាងត្បូងនិងប្រទេសជប៉ុន ទីក្រុងព្យុងយ៉ាងកំពុងបន្លំធ្វើការបាញ់សាកល្បងកាំជ្រួចអន្តរទ្វីបរបស់ខ្លួន ដែលជាទង្វើមួយរំលោភទៅលើសេចក្តីសម្រេចចិត្តរបស់ អ.ស.ប.។
គួរកត់សម្គាល់ថា ជាន់ថ្នាក់ទីមួយនៃកាំជ្រួចរបស់កូរ៉េខាងជើងនឹងត្រូវធ្លាក់ទៅក្នុងសមុទ្រលឿង ដែលឋិតនៅប៉ែកខាងលិចនៃឧបទ្វីបកូរ៉េ។ ហើយជាន់ថ្នាក់ទីពីរនឹងត្រូវធ្លាក់នៅប៉ែកខាងកើតនៃប្រទេសហ្វីលីពីន ដោយត្រូវហោះឆ្លងកាត់កោះអូគីណាវ៉ាដែលឋិតនៅប៉ែកខាងត្បូងនៃប្រទេសជប៉ុន។
ចំណែកឯនាយករដ្ឋមន្ត្រីជប៉ុនលោក Yoshihiko Noda បានចេញបញ្ជាឲ្យបាញ់កម្ទេចកាំជ្រួចមីស្ស៊ីលរបស់កូរ៉េខាងជើងនៅករណីដែលកាំជ្រួចមីស្ស៊ីលនេះអាចគំរាមដល់សន្តិសុខរបស់ប្រទេសជប៉ុន។
រីឯទីក្រុងសេអ៊ូលវិញ បានថ្លែងឲ្យដឹងថា គេនឹងបាញ់កម្ទេចកាំជ្រួចមីស្ស៊ីលរបស់ទីក្រុងព្យុងយ៉ាងនៅករណីដែលកាំជ្រួចមីស្ស៊ីលនេះហោះនៅក្នុងដែនអាកាសរបស់កូរ៉េខាងត្បូង។
សូមបញ្ជាក់ថា កាលពីខែមេសាឆ្នាំ២០០៩ ប្រទេសកូរ៉េខាងជើងធ្លាប់បានបាញ់កាំជ្រួចផ្ទុកផ្កាយរណបម្តងរួចទៅហើយ ដោយបានហោះឆ្លងកាត់ប្រទេសជប៉ុនហើយបានធ្លាក់ទៅក្នុងមហាសាគរប៉ាស៊ីហ្វិក។ កាលណោះក្រុមប្រឹក្សាសន្តិសុខនៃ អ.ស.ប.បានធ្វើការថ្កោលទោសនិងដាក់ទណ្ឌកម្មយ៉ាងធ្ងន់ធ្ងរទៅលើរបបគ្រប់គ្រងកូរ៉េខាងជើង។
នៅថ្ងៃអង្គារនេះ ទីក្រុងតូក្យូបានបន្តដាក់ទណ្ឌកម្មមួយឆ្នាំទៀតប្រឆាំងនឹងកូរ៉េខាងជើង ដោយបានធ្វើការហាមឃាត់ពុំឲ្យមានការដោះដូរពាណិជ្ជកម្មជាមួយទីក្រុងព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ