រដ្ឋមន្ត្រីក្រសួងការងារបំភ្លឺរដ្ឋសភាពីបញ្ហាកម្មករកាត់ដេរនិងពលករក្រៅប្រទេស
នៅថ្ងៃព្រហស្បតិ៍នេះ លោក វង សូត រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ចូលឆ្លើយបំភ្លឺដោយផ្ទាល់មាត់ នៅក្នុងកិច្ចប្រជុំរដ្ឋសភា ជុំវិញបញ្ហាកម្មករកាត់ដេរ និងការគ្រប់គ្រងពលករខ្មែរ ទៅធ្វើការនៅក្រៅប្រទេស។ ការឆ្លើយបំភ្លឺរបស់រដ្ឋមន្ត្រីក្រសួងការងារនេះ បានធ្វើឡើង តបនឹងលិខិតសំណួររបស់លោក សុន ឆ័យ អ្នកតំណាងរាស្ត្រគណបក្សសមរង្ស៊ី។ ក៏ប៉ុន្តែ នៅពេលឆ្លើយបំភ្លឺ ក្រុមអ្នកតំណាងរាស្ត្រគណបក្សសមរង្ស៊ីបែរជាដើរចេញពីរដ្ឋសភាទៅវិញ។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហួរ ពីភ្នំពេញ
ក្រុមអ្នកតំណាងរាស្ត្រគណបក្សប្រឆាំង ២០ រូប សម្រេចចិត្តដើរចេញពីកិច្ចប្រជុំសភា នៅព្រឹកមិញនេះ ដោយសារតែលោក សុន ឆ័យ ដែលជាម្ចាស់សំណួរបានសូមអានសំណួរទាំង ១៨ សំណួរ សួរទៅកាន់លោករដ្ឋមន្ត្រីក្រសួងការងារឡើងវិញ តែត្រូវបានបដិសេធ។
លោក សុន ឆ័យ បានថ្លែងក្នុងសន្និសីទកាសែត នៅប៉ុន្មាននាទីក្រោយថា លោកមិនអាចទទួលយកបានទេ ចំពោះការរំលោភសិទ្ធិរបស់អ្នកតំណាងរាស្ត្រនេះ។ ម្យ៉ាងទៀត លោក សុន ឆ័យ ចាត់ទុកថា ស្ថាប័នរដ្ឋសភា អត់ឯករាជ្យ ហើយរដ្ឋសភា ទៅជាកម្មសិទ្ធិដាច់ថ្លៃរបស់គណបក្សមួយ ឬក្រុមមួយ។
ក៏ប៉ុន្តែលោក ងួន ញ៉ិល ប្រធានស្តីទីរដ្ឋសភា បានផ្តល់ហេតុផលថា កម្រងសំណួរ របស់លោក សុនឆ័យ ត្រូវបានផ្តល់ឲ្យលោករដ្ឋមន្ត្រី វង សូត្រ រួចរាល់ហើយ។ ម្យ៉ាងទៀត ដោយសារតែសំណួរច្រើន ហើយបើអានឡើងវិញ អាចខាតពេល។
យ៉ាងណាក៏ដោយ អង្គប្រជុំរដ្ឋសភានៅតែបន្តធ្វើ ដោយលោក វង សូត រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអាននូវចម្លើយ ដែលបានរៀបចំទុក ដោយចំណាយពេលជាងមួយម៉ោង ដើម្បីបំភ្លឺជូនអង្គប្រជុំរដ្ឋសភា អំពីប្រាក់ឈ្នួលអប្បបរមារបស់កម្មករកាត់ដេរ និងការគ្រប់គ្រងពលករខ្មែរ ទៅធ្វើការនៅបរទេស។
លោក វង សូត បានលើកឡើងពីប្រវត្តិសាវតារ នៃការបង្កើតគណៈកម្មការប្រឹក្សាការងារ ដែលមានភាគីថៅកែរោងចក្រ សហជីពតំណាងកម្មករ និងក្រសួងការងារ ដើម្បីប្រជុំសម្រចដំឡើងប្រាក់ខែកម្មករកាត់ដេរ។ ក្នុងនោះ កាលពីថ្ងៃទី៨ ខែកក្កដា ឆ្នាំ២០១០ គណៈកម្មការនេះ បានប្រជុំសម្រេចដំឡើងប្រាក់ខែកម្មករកាត់ដេរ ៦១ ដុល្លារក្នុងមួយខែ ដោយអនុវត្តចាប់ពីខែតុលានេះ។ ចំណែកប្រាក់អត្តប្រយោជន៍មួយចំនួនទៀត ដល់កម្មករ នឹងត្រូវប្រជុំជជែកបន្តទៀត។
លោក វង សូត បានបញ្ជាក់ថា ការដំឡើងប្រាក់ឈ្នួលអប្បបរមាដល់កម្មករកាត់ដេរ និងផលិតស្បែកជើង ចំនួន ៦១ ដុល្លារ គឺធ្វើឡើងដោយសមរម្យ និងស្របតាមបណ្តាប្រទេសមួយចំនួន។ នោះគឺនៅប្រទេសឥណ្ឌូនេស៊ី ប្រាក់ខែកម្មករកាត់ដេរមានចន្លោះពី ៥១ ទៅ ៨៨ ដុល្លារ, ប្រទេសសិរីលង្កា ចំនួន ៥១ ដុល្លារ និងប្រទេសឥណ្ឌា ចំនួន ៦៥ ដុល្លារ។
ចំពោះការគ្រប់គ្រងពលករខ្មែរ ដែលធ្វើការនៅក្រៅប្រទេស លោក វង សូត លើកឡើងថា ក្រសួងការងារ ក៏ដូចជារដ្ឋាភិបាល និងក្រសួងការបរទេស បានពិនិត្យតាមដាន និងបង្កើតគោលនយោបាយ ដើម្បីធ្វើយ៉ាងណា ឲ្យដំណើរការជ្រើសរើសបញ្ជូនពលករ ទៅធ្វើការនៅក្រៅប្រទេស បានល្អប្រសើរ និងចៀសវាងការរំលោភបំពាន ដូចដែលសេចក្តីរាយការណ៍លើកឡើងកន្លងមក។
លោក វង សូត ក៏បានបន្ថែមថា មកដល់ពេលនេះ ក្រុមហ៊ុនបញ្ជូនពលករឯកជន ទៅធ្វើការបរទេស មានចំនួន ៣១ ក្រុមហ៊ុន។ ចំណែកពលករខ្មែរ ធ្វើការនៅបរទេស សរុបមានចំនួន ១២២.៧៣១ នាក់ នៅប្រទេសម៉ាឡេស៊ី ថៃ ជប៉ុន និងកូរ៉េខាងត្បូង។
ក្រៅពីពលករស្របច្បាប់ទាំងនេះ លោក វង សូត ក៏បានបញ្ជាក់ថា មានពលករខ្មែរខុសច្បាប់ នៅប្រទេសថៃ ជាង១សែននាក់ផ្សេងទៀត។ ក្រសួងកំពុងរៀបចំបណ្ណការងារ សម្រាប់ពលរដ្ឋខ្មែរឆ្លងដែនទៅធ្វើការតាមទល់ដែន ពិសេសទៅប្រទេសថៃ។
លោក វង សូត បានបន្ថែមថា ពលករនៅបរទេស បានរួមចំណែកយ៉ាងសំខាន់ក្នុងការអភិវឌ្ឍន៍សេដ្ឋកិច្ចជាតិ ពោលគឺប្រសិនបើពួកគេបានផ្ទេរប្រាក់ចំណូលមកក្នុងស្រុក ប្រមាណតែ ៥០% នៃប្រាក់បៀវត្សរ៍របស់ខ្លួន នោះជាមធ្យម យើងទទួលបានចំណូលប្រមាណជា ១៥០លានដុល្លារ ក្នុងមួយឆ្នាំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ