លោក កូហ្វី អាណាន់ទៅស៊ីរីដើម្បីស្វែងរកដំណោះស្រាយបិទបញ្ចប់អំពើហិង្សា
នៅថ្ងៃសៅរ៍ ទី១០ មីនា ឆ្នំា ២០១២នេះ ជំនួបរវាងលោកប្រធានាធិបតីស៊ីរី Bachar el-Assad និងលោក កូហ្វី អាណាន់ បេសកជនរបស់អង្គការសហប្រជាជាតិ និងរបស់សម្ព័ន្ធអារ៉ាប់បានផ្តើមកាលពីព្រឹកមិញនៅវិមានប្រធានាធិបតីក្នុងទីក្រុងដាម៉ាស់។ ទន្ទឹមគ្នានឹងជំនួបនេះ កម្លំាងរដ្ឋាភិបាលក៏កំពុងបន្តទម្លាក់គ្រាប់បែកលើស្រុក Idleb ដែលជាមូលដ្ឋានរបស់ក្រុមអ្នកបះបោរនៅប៉ែកពាយ័ព្យ។
ចុះផ្សាយនៅថ្ងៃ៖
ស្តាប់ - ០១:២១
បេសកកម្មរបស់លោកកូហ្វី អាណាន់បានធ្វើឡើង ចំពេលដែលកម្លំាងរដ្ឋាភិបាលកំពុងបង្កើនការវាយប្រហារទៅលើក្រុមអ្នកបះបោរយ៉ាងហិង្សា ពិសេសនៅស្រុក Idleb ស្ថិតប៉ែកពាយ័ព្យប្រទេស។ អង្គការឃ្លំាមើលសិទ្ធិមនុស្សស៊ីរីបានកត់សម្គាល់ឃើញថា ការវាយប្រហារលើស្រុក Idleb កាលពីព្រឹកមិញមានលក្ខណៈហិង្សាខ្លំាងជាងគេ ពិសេសតំាងពីមានការបញ្ជូនទ័ពបន្ថែមទៅកាន់ទីនោះមក។
គេនៅមិនទាន់អាចដឹងបានទេ អំពីខ្លឹមសារនៃជំនួបរវាងលោក កូហ្វី អាណាន់ និងលោក Bachar el-Assad។ អ្វីដែលគេដឹង លោក កូហ្វី អាណាន់គ្រោងនឹងចាកចេញពីស៊ីរីនៅល្ងាចថ្ងៃអាទិត្យស្អែក បន្ទាប់ពីបានជួបថ្នាក់ដឹកនំារដ្ឋាភិបាលផ្សេងទៀត និងអង្គការសង្គមស៊ីវិល។ លោក កូហ្វី អាណាន់នឹងបន្តដំណើរទៅកាន់ប្រទេសផ្សេងទៀតនៅក្នុងតំបន់ ដើម្បីជួបចរចាជាមួយក្រុមអ្នកប្រឆំាងរដ្ឋាភិបាលស៊ីរីនៅក្រៅប្រទេស។
យោងតាមលោកអគ្គលេខាធិការអង្គការសហប្រជាជាតិ បាន គីមូន បេសកកម្មដែលលោកអតីតអគ្គលេខាធិការអង្គការសហប្រជាជាតិ កូហ្វី អាណាន់ត្រូវបំពេញមានបី ទីមួយ៖ បញ្ឈប់ការបាញ់គ្នាជាបន្ទាន់, ទីពីរ៖ ស្វែងរកដំណោះស្រាយនយោបាយរួមសម្រាប់គ្រប់ភាគី និងទីបី៖ រៀបចំបញ្ជូនជំនួយមនុស្សធម៌។ ដោយឡែក ក្នុងពេលជាមួយគ្នានេះ គណៈកម្មាធិការនៃសម្ព័ន្ធអារ៉ាប់កំពុងរួមប្រជុំគ្នានៅក្នុងទីក្រុង Caire ប្រទេសអេហ្ស៊ីប។ បន្ទាប់មកទៀត គឺជាកិច្ចប្រជុំថ្នាក់រដ្ឋមន្រ្តីក្រសួងការបរទេសអារ៉ាប់ជាមួយលោករដ្ឋមន្រ្តីការបរទេសរុស្ស៊ី Sergueï Lavrov៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ