លោកកូហ្វ៊ីអាណាន់ទៅស៊ីរីដើម្បីព្យាយាមសង្រ្គោះផែនការសន្តិភាព៦ចំណុច
លោកកូហ្វ៊ី អាណាន់ ប្រេសិតពិសេសរបស់អ.ស.ប. និងសម្ព័ន្ធអារ៉ាប់ កំពុងស្ថិតក្នុងប្រទេសស៊ីរី ដើម្បីព្យាយាមសង្រ្គោះផែនការសន្តិភាពរបស់លោក។ មុនពេលទៅដល់ស៊ីរី លោកកូហ្វ៊ី អាណាន់ខ្លួនឯងបានទទួលស្គាល់ថា ផែនការសន្តិភាព ៦ចំណុច របស់លោក ដែលបានដាក់ចេញ កាលពីខែកុម្ភៈ មិនមានប្រសិទ្ធភាពក្នុងការបញ្ចប់អំពើហិង្សានៅស៊ីរីបានទេ មកទល់ពេលនេះ។
ចុះផ្សាយនៅថ្ងៃ៖
ស្តាប់ - ០១:៣៤
លោកកូហ្វ៊ី អាណាន់ បានទៅដល់ប្រទេសស៊ីរី កាលពីថ្ងៃអាទិត្យ ម្សិលមិញ ក្នុងដំណើរទស្សនកិច្ចលើកទី៣ ចាប់តាំងពីត្រូវបានតែងតាំងជាប្រសិតទទួលបន្ទុកដោះស្រាយវិបត្តិស៊ីរី។ នៅក្នុងដំណើរទស្សនកិច្ចពេលនេះ លោកកូហ្វ៊ី អាណាន់ គ្រោងនឹងជួបជជែកជាមួយលោកបាស្ហា អាល់អាសាដ ដើម្បីជជែកអំពីផែនការសន្តិភាព ៦ចំណុចរបស់លោក។
ផែនការសន្តិភាព ដែលទទួលបាននូវការគាំទ្រពីសំណាក់ក្រុមប្រឹក្សាសន្តិសុខអ.ស.ប. ទាមទារឲ្យមានបទឈប់បាញ់ មុននឹងឈានទៅចរចារកដំណោះស្រាយតាមផ្លូវនយោបាយ ដើម្បីបញ្ចប់អំពើហិង្សា ដែលបានអូសបន្លាយពេល ១៦ខែកន្លងមកហើយ។ ក៏ប៉ុន្តែ រហូតមកទល់ពេលនេះ ការវាយប្រយុទ្ធគ្នារវាងកងកម្លាំងរបស់លោកអាសាដ និងកងកម្លាំងឧទ្ទាម ព្រមទាំងអំពើហិង្សាទៅលើបាតុករស៊ីវិល នៅតែបន្តកើតមានជារៀងរាល់ថ្ងៃ។ សូម្បីតែក្រុមអ្នកសង្កេតការណ៍បទឈប់បាញ់របស់អ.ស.ប.ក៏ត្រូវប្រឈមមុខនឹងការប៉ុនប៉ងវាយប្រហារជាច្រើនលើកដែរ ធ្វើឲ្យពួកគេត្រូវសម្រេចផ្អាកបេសកកម្មសង្កេតការណ៍រហូតមកទល់ពេលនេះ។ លោកកូហ្វ៊ី អាណាន់ ខ្លួនឯង ដែលជាអ្នករៀបចំផែនការ ៦ចំណុចនេះ បានទទួលស្គាល់អំពីបរាជ័យនៃផែនការនេះ។
លោកបាស្ហា អាល់អាសាដវិញ បានលើកឡើងថា ផែនការ ៦ចំណុច របស់លោកកូហ្វ៊ី អាណាន់ មិនមានប្រសិទ្ធភាព គឺដោយសារតែមានប្រទេសមួយចំនួន រួមមាន អារ៉ាប៊ីសាអ៊ូឌីត កាតា តួកគី និងសហរដ្ឋអាមេរិក បាននាំគ្នាផ្តល់អាវុធ លុយកាក់ ព្រមទាំងការគាំទ្រផ្នែកនយោបាយ ដល់ក្រុមប្រឆាំង ដែលលោកចាត់ទុកថាជា “ក្រុមភេរវជន”។
នៅក្នុងបទសម្ភាសន៍ជាមួយកាសែតបារាំង ឈ្មោះ Le Monde លោកកូហ្វ៊ី អាណាន់ ក៏បានលើកឡើងផងដែរថា មានប្រទេសជាច្រើននាំគ្នានិយាយទម្លាក់កំហុសតែទៅលើរុស្ស៊ី និងអ៊ីរ៉ង់ថាជាអ្នកធ្វើឲ្យអាក់ខានដល់ដំណោះស្រាយវិបត្តិស៊ីរី ក៏ប៉ុន្តែ មិនសូវមានអ្នកណានិយាយដល់ករណីប្រទេសមួយចំនួនផ្សេងទៀត ដែលបានបញ្ជូនគ្រឿងសព្វាវុធ លុយកាក់ និងមនុស្សទៅជួយក្រុមប្រឆាំងស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ