ឃាតកម្មលើស្ត្រីបារាំងនៅកំពត មិនទាន់រកឃើញជនដៃដល់ទេ
រឿងក្តីឃាតកម្មលើស្ត្រីជនជាតិបារាំងនៅខេត្តកំពត នៅមិនទាន់រកឃើញជនដៃដល់ពិតប្រាកដនៅឡើយទេ បើទោះណាជាជនសង្សយ័ជនជាតិប៊ែលហ្ស៊ិកមួយរូប ត្រូវបានសមត្ថកិច្ចឃាត់ខ្លួនក៏ដោយ កាលពីខែមេសា កន្លងទៅនេះ។ ជាមួយនឹងការបដិសេធរាល់ការសាកសួរមេធាវីការពារក្តីជនជាប់ចោទ បានអះអាងថា លោកបានដាក់ស្នើរួចហើយកាលពីសប្តាហ៍មុន ដើម្បីអោយកូនក្តីរបស់លោក ស្ថិតនៅក្រៅឃុំ។ ក៏ប៉ុន្តែ តុលាការបានបដិសេធដោយសាររឿងនេះជាបទល្មើសព្រហ្មទណ្ឌ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
ចៅក្រមស៊ើបអង្កេតតុលាការខេត្តកំពត នៅពេលនេះ បានបដិសេធចោលសំណើសុំនៅក្រៅឃុំរបស់មេធាវីការពារក្តីឲ្យជនជាប់ចោទសញ្ជាតិប៊ែលហ្ស៊ិក បន្ទាប់ពីមេធាវីការពារក្តីជនជាតិខ្មែររូបនេះ ដាក់ពាក្យស្នើសុំទៅតុលាការ កាលពីសប្តាហ៍មុន។ ជនជាតិប៊ែលហ្ស៊ិក ឈ្មោះ Oliver, ម្ចាស់ផ្ទះសំណាក់ Olly’ Place នៅខេត្តកំពត ត្រូវបានប៉ូលីសចាប់ខ្លួន កាលពីខែមេសា ឆ្នាំ២០១៣ ពីបទជាប់សង្ស័យ ថាបានសម្លាប់ស្ត្រីជនជាតិបារាំងម្នាក់ នៅក្នុងខេត្តមាត់សមុទ្រមួយនេះ។
លោក ឃុន សុផល, មេធាវីការពារក្តីជនជាតិប៊ែលហ្ស៊ិក បានប្រាប់វិទ្យុបារាំង RFI នៅថ្ងៃនេះថា លោកនឹងបន្តធ្វើលិខិតមួយទៀតទៅសភាស៊ើបសួរនៃសាលាឧទ្ធរណ៍ ដើម្បីសុំអោយកូនក្តីលោកនៅក្រៅឃុំជាបន្តទៀត។ ជាមួយគ្នានេះ លោកមេធាវី ឃុន សុផល ក៏បានបញ្ជាក់ផងដែរថា លោកកំពុងខិតខំស្វែងរកភស្តុតាងបន្ថែមទៀត ដើម្បីដោះបន្ទុក។ ទាក់ទងទៅនឹងការចាប់ខ្លួនកូនក្តីរបស់លោក លោកមេធាវីបានហៅសាក្សីនិងភស្តុតាងសម្រាប់ចោទប្រកាន់ថា មានលក្ខណៈខ្សោយ មិនមានមូលដ្ឋានច្បាស់លាស់ សម្រាប់ដាក់បន្ទុកនោះទេ ដោយសារពេលវេលា និងទីកន្លែងវាមិនមានការសមស្របនឹងគ្នា។
ក៏ប៉ុន្តែ លោកឧត្តមសេនីយ៍ឯក ម៉ក់ ជីតូ, ប្រធាននាយកដ្ឋានកណ្តាលនគរបាលយុត្តិធម៌ បានថ្លែងបញ្ជាក់ម្តងទៀតថា ការចាប់ខ្លួនជនសង្ស័យគឺធ្វើឡើងដោយមានសាក្សី និងភស្តុតាង
ត្រឹមត្រូវ ហើយពេលខ្លះ ជាធម្មតា ជនល្មើសមិនដែលឆ្លើយថាខ្លួនបានប្រព្រឹត្តនោះទេ។
លោក ម៉ក់ ជីតូ រំលឹកថា ជនសង្ស័យជនជាតិប៊ែលហ្ស៊ិករូបនេះ ក្រៅពីបានប្រព្រឹត្ត
បទល្មើសនៅប្រទេសកម្ពុជា គេធ្លាប់មានប្រវត្តិមិនល្អផងដែរ នៅប្រទេសរបស់គេ។
ជាមួយគ្នានេះ មេប៉ូលិសកណ្តាលយុត្តិធម៌បញ្ជាក់ថា នៅមិនទាន់មានការបង្គាប់ពីតុលាការ
ដើម្បីឲ្យប៉ូលិសស្វែងរកភស្តុតាងបន្ថែមទៀតនោះទេ មកទល់ពេលនេះ។ ទោះជាយ៉ាងនេះក្តី
លោកក៏បានចាត់ឲ្យសមត្ថកិច្ចបន្តតាមដាននូវដំណើររឿងនេះ ក្រែងលោមានភស្តុតាងថ្មីៗបន្ថែមទៀត ដោយសារចំលើយសាក្សីកន្លងមក បានបង្ហាញថាជនសង្ស័យមានគ្នាដល់ទៅ ២នាក់។
ទោះជាយ៉ាងនេះក្តី ជនសង្ស័យសញ្ជាតិប៊ែលហ្ស៊ិក អូលីវ័រ នៅមិនទាន់សារភាព ថាខ្លួនបានប្រព្រឹត្តដូចការចោទប្រកាន់នៅឡើយ ខណៈដែលរូបគេត្រូវបានឃុំឃាំងបន្ទាប់ពីការចាប់ខ្លួន
ដោយប៉ូលិសក្រសួងមហាផ្ទៃ កាលពីខែមេសា។
មន្ត្រីការពារសិទ្ធិមនុស្សអង្គការលីកាដូ ប្រចាំខេត្តកំពត លោក ម៉ម ពិសី បានកត់សម្គាល់ថា
សំណុំរឿងដែលធ្វើឲ្យប៉ះពាល់ដល់កេរ្តិ៍ឈ្មោះខេត្តទេសចរណ៍មួយនេះ ត្រូវបានយកចិត្តទុកដាក់យ៉ាងសកម្ម ពីសំណាក់សមត្ថកិច្ចនិងមន្ត្រីតុលាការ ហើយនឹងឈានបើកសវនាការនៅពេលខាងមុខ។
សូមរំលឹកថា ស្ត្រីជនជាតិបារាំងឈ្មោះ Ophélie Begnis អាយុ ២៥ឆ្នាំ ត្រូវបានគេរកឃើញថាស្លាប់ទាំងអាក្រាត ដោយសាកសពអណ្តែតទឹក នៅដៃសមុទ្រមួយ ក្នុងខេត្តកំពត កាលពីថ្ងៃទី១០ ខែកុម្ភៈឆ្នាំ ២០១៣ កន្លងទៅនេះ ដោយមានស្នាមវាយត្រង់ក្បាលទៀតផង។ ឃាតកម្មនេះបានធ្វើឲ្យភ្ញាក់ផ្អើលដល់សមត្ថកិច្ច និងមានការចូលរួមស៊ើបអង្កេតរួមគ្នារវាងប៉ូលីសកម្ពុជា និងប៉ូលីសបារាំងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ