សាលាក្តីខ្មែរក្រហមកំណត់ថ្ងៃបើកសវនាការជាថ្មី តែមេធាវីការពារជនជាប់ចោទមិនចូលរួម
មេធាវីការពារក្តី ខៀវ សំផន លោក គង់ សំអុន បានបញ្ជាក់ជាថ្មីម្តងទៀតថា រហូតមកដល់ទល់នឹងពេលនេះ ក្រុមការងាររបស់លោកនៅតែរក្សាជំហរមិនចូលរួមក្នុងការប្រជុំរៀបចំសវនាការ បើទោះបីជាមានការបង្គាប់ពីអង្គជំនុំជម្រះសាលាដំបូង នៃសាលាក្តីខ្មែរក្រហមក៏ដោយ។ ការប្រកាសជាថ្មីនេះធ្វើឡើង បន្ទាប់ពីអង្គជំនុំជម្រះសាលាដំបូងបង្គាប់ឲ្យគ្រប់ភាគីទាំងអស់ចូលរួមក្នុងសវនាការលើអង្គសេចក្តី ដែលនឹងប្រព្រឹត្តិទៅនៅថ្ងៃទី ១៧ វិច្ឆិកាខាងមុខនេះ។
ចុះផ្សាយនៅថ្ងៃ៖
ស្តាប់ - ០១:៤៧
សាលាក្តីខ្មែរក្រហម បានចេញសេចក្តីប្រកាសព័ត៌មានមួយនៅថ្ងៃទី៣ តុលាដោយបង្គាប់ឲ្យគ្រប់ភាគីទាំងអស់ នៅក្នុងសំណុំរឿង ០០២ វគ្គ២ ចូលរួមក្នុងសវនាការលើអង្គសេចក្តីនៅថ្ងៃទី ១៧ វិច្ឆិកាខាងមុខនេះ។ សាលាក្តីក៏បានជូនដំណឹងដល់ក្រុមមេធាវីការពារក្តីខៀវ សំផន និងនួន ជា ឲ្យបានដឹងជាមុនផងដែរថា អង្គជំនុំជម្រះ នឹងចាត់វិធានការយ៉ាងម៉ឺងម៉ាត់ ប្រសិនបើក្រុមមេធាវី ការពារក្តីណាមួយខកខានមិនបានគោរពតាមដីការបង្គាប់ឲ្យចូលរួមក្នុង សវនាការនាពេលខាងមុខនេះ។
ក៏ប៉ុន្តែ មេធាវីការពារក្តី ខៀវ សំផន លោក គង់ សំអុន បានបញ្ជាក់ប្រាប់វិទ្យុបារាំងថា ក្រុមការងាររបស់លោក នៅតែរក្សាជំហរមិនចូលរួមសវនាការ តាមការបង្គាប់របស់អង្គជំនុំជម្រះដដែល ដរាបណា សារណាបណ្តឹងសារទុក្ខក្នុងសំណុំរឿង០០២ វគ្គ១ មិនទាន់បានបញ្ចប់នោះ។ ចំណែកមេធាវីការពារក្តីឲ្យលោក នួន ជា ក៏ធ្លាប់បានបញ្ជាក់ជំហរច្បាស់លាស់ដែរថា ប្រសិនបើពាក្យបណ្តឹងដិតចិត្តរបស់លោក នួន ជា សុំដូរចៅក្រមកាត់ក្តីមិនត្រូវបានដោះស្រាយទេ លោកមិនអាចចូលរួមសវនាការបានឡើយ។
សូមបញ្ជាក់ថា សវនាការសំណុំរឿង ០០២ វគ្គ២ បានចាប់ផ្តើមកាលពីថ្ងៃទី១៧តុលា ប៉ុន្តែ បានជាប់គាំង ដោយសារតែសហមេធាវីការពារនួន ជា និងខៀវ សំផន បាននាំគ្នាដើរចេញពីសវនាការ។ ជនជាប់ចោទ នួន ជា បងធំទី ២ ក្នុងរបបខ្មែរក្រហមបានដាក់ពាក្យបណ្តឹងដើម្បីសុំផ្លាស់ប្តូរចៅក្រមកាត់ក្តីទាំង៤រូប គឺ លោក និល ណុន លោក យ៉ា សាខន លោក យូរ ឧត្តរា និងចៅក្រមជនជាតិបារាំងលោក Jean-Marc Lavergne។
លោក នួន ជា បានចោទចៅក្រមទាំង៤រូបនេះថាលម្អៀងនិងខ្វះឯករាជ្យភាពក្នុងការកាត់ក្តី។ ចំណែកសហមេធាវីការពារលោកខៀវ សំផន វិញសម្អាងថា ពួកគេជាប់រវល់ធ្វើសារណាបណ្តឹងសារទុក្ខសំណុំរឿង ០០២វគ្គទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ