កម្មករខ្មែរ ២៤នាក់ត្រូវបានរំដោះចេញពីការជួញដូរ
កម្មករខ្មែរ២៤ នាក់ ដែលត្រូវគេជួញដូរឲ្យទៅបម្រើការនៅលើទូកនេសាទថៃ បានវិលត្រឡប់មកដល់ភ្នំពេញវិញហើយ នៅព្រឹកថ្ងៃទី៥វិច្ឆិកានេះ។ យុវជនដែលជាកម្មករទាំងនោះបានចាញ់បោកមេខ្យល់ ទៅធ្វើការជាកម្មករនេសាទ នៅលើទូកនេសាទសមុទ្រក្នុងប្រទេសថៃ ហើយត្រូវចាប់ខ្លួន នៅប្រទេសម៉ូរីស (Maurice)។ បន្ទាប់ពីកិច្ចអន្តរាគមន៍ពីរដ្ឋាភិបាលភ្នំពេញ ដោយសហការជាមួយអង្គការអន្តោប្រវេសន៍អន្តរជាតិ ពួកគេត្រូវបានបញ្ជូនមកដល់កម្ពុជាវិញ។
ចុះផ្សាយនៅថ្ងៃ៖
ស្តាប់ - ០២:២០
ពលករខ្មែរ ២៤ នាក់ ដែលសុទ្ធតែជាយុវជនពេញកម្លាំង បានមកដល់ព្រលានយន្តហោះអន្តរជាតិភ្នំពេញ នៅព្រឹកថ្ងៃទី៥វិច្ឆិកានេះ បន្ទាប់ពីទទួលការសង្គ្រោះពីការជួញដូរ។ ឧត្តមសេនីយ៍ ជីវ ផល្លី អនុប្រធាននាយកដ្ឋានប្រឆាំងការជួញដូរមនុស្សនិងការពារអនីតិជន នៃក្រសួងមហាផ្ទៃ ដែលបានទៅទទួលពលករទាំងនោះ បានថ្លែងប្រាប់ក្រុមអ្នកកាសែតថា សមត្ថកិច្ចនឹងស្រាវជ្រាវ ដើម្បីស្វែងរកចាប់មេខ្លោងដែលបាននាំពលករទាំងនោះទៅក្រៅប្រទេស។
នៅពេលមកដល់ភ្លាម ពួកគេត្រូវបានគេបញ្ជូនទៅពិនិត្យសុខភាព មុននឹងបញ្ជូនទៅក្រសួងមហាផ្ទៃ ដើម្បីសាកសួររកមេខ្លោងដែលជាមេខ្យល់នាំកម្មករទាំងនោះទៅកាន់ប្រទេសថៃ។ ជនរងគ្រោះទាំង ២៤នាក់នោះ សុទ្ធតែជាយុវជនវ័យក្មេង ដែលមានអាយុចាប់ពី១៥ឆ្នាំទៅជាង២០ឆ្នាំ។ អ្នកទាំងនោះភាគច្រើនមានស្រុកកំណើតនៅបណ្តាខេត្តជាប់ព្រំដែនប្រទេសថៃ។ ពួកគេបានរងគ្រោះដោយការអូសទាញពីសំណាក់មេខ្យល់ និងទីបំផុតក៏ត្រូវគេជួញដូរឲ្យទៅធ្វើការនៅលើទូកនេសាទក្នុងប្រទេសថៃ។ ប៉ុន្តែ នៅពេលធ្វើដំណើរតាមទូកនេសាទ ពួកគេក៏បានជ្រុលដំណើរទៅនេសាទដល់ប្រទេសម៉ូរីស ដែលជាប្រទេសដែនកោះមួយស្ថិតក្នុងមហាសមុទ្រឥណ្ឌា។
កម្មករទូកនេសាទទាំងនោះ ក៏ត្រូវបានអាជ្ញាធរប្រទេសម៉ូរីសចាប់ខ្លួន កាលពីថ្ងៃទី២៨មិថុនាឆ្នាំ២០១១ ដោយមូលហេតុឆ្លងដែនចូលក្នុងសមុទ្រប្រទេសនោះដោយខុសច្បាប់។ ក្រោយពីទទួលបានព័ត៌មាននេះ ក្រសួងមហាផ្ទៃកម្ពុជា ដោយសហការជាមួយអង្គការអន្តោប្រវេសន៍អន្តរជាតិ (IOM) ក៏បានទាក់ទងទៅរដ្ឋាភិបាលម៉ូរីស ដើម្បីដោះស្រាយ និងនាំពលករទាំងនោះត្រឡប់មកប្រទេសវិញ។ ទីបំផុត ពួកគេបានវិលមកដល់ប្រទេសវិញ ក្រោមការជួយជ្រោមជ្រែងពីអង្គការអន្តោប្រវេសន៍អន្តរជាតិ និងរដ្ឋាភិបាលម៉ូរីស។ក្រុមយុវជនរងគ្រោះបានសម្តែងការរីករាយនៅពេលដែលបានមកដល់ប្រទេសវិញ បន្ទាប់ពីបានផ្សងព្រេងនិងរសាត់អណ្តែតគ្មានទិសដៅមួយរយៈមក។
នេះមិនមែនជាលើកដំបូងទេ ដែលយុវជន និងស្ត្រីខ្មែរបានចាញ់បោកគេហើយទទួលរងគ្រោះដោយសារការចាកចេញទៅធ្វើការនៅក្រៅប្រទេស។ កាលពីពេលថ្មីៗនេះ រដ្ឋាភិបាលទើបតែបានផ្អាកការនាំស្ត្រីខ្មែរទៅធ្វើការជាអ្នកបម្រើតាមផ្ទះនៅប្រទេសម៉ាឡេស៊ី បន្ទាប់ពីមានសេចក្តីរាយការណ៍ជាច្រើន អំពីការរំលោភបំពានសិទ្ធិនៅឯកន្លែងធ្វើការ។ ធ្ងន់ធ្ងរជាងនេះ កម្មករទូកនេសាទនៅប្រទេសថៃ ត្រូវគេរាយការណ៍ថា ទទួលរងការបំពានដូចទាសករដាច់ថ្លៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ