សហគមន៍ខ្មែរកម្ពុជាក្រោមធ្វើបាតុកម្មតាមការគ្រោងទុកជាលើកទីបី
នៅព្រឹកថ្ងៃទី១១ សីហា នេះ ក្រុមយុវជនសហគមន៍ខ្មែរក្រោម បានធ្វើបាតុកម្មជាលើកទី៣ ដើម្បីទាមទារឲ្យអ្នកនាំពាក្យស្ថានទូតវៀតណាម សុំទោសជាសាធារណៈ ចំពោះអ្វីដែលខ្លួនអះអាងថា ទឹកដីកម្ពុជាក្រោម ជាទឹកដីរបស់រៀតណាមតាំងពីយូរយារណាស់មកហើយ។ សហគមន៍ខ្មែរកម្ពុជាក្រោម ធ្លាប់បានធ្វើបាតុកម្មចំនួនពីរលើកមកហើយ ក៏ប៉ុន្តែគ្មានការឆ្លើយតបណាមួយនោះទេ។ បាតុកម្មថ្ងៃនេះបានធ្វើឡើងនៅឯទីលានប្រជាធិបតេយ្យបន្ទាប់ពីទីលាននេះត្រូវបានបើកឲ្យប្រើប្រាស់ឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ក្រុមយុវជន ព្រះសង្ឃ និងប្រជាពលរដ្ឋជាច្រើនរយនាក់ បាននាំគ្នាកាន់ទង់ជាតិខែ្មរ ទង់ជាតិខ្មែរកម្ពុជាក្រោម និងទង់ព្រះពុទ្ធសាសនា ហើយខ្លះទៀតកាន់បដារដែលសរសេរថា «ខ្មែររួមគ្នា ខ្មែររស់» និងថា «រដ្ឋាភិបាលវៀតណាមត្រូវគោរពគោលការណ៍អាស៊ានឲ្យបានត្រឹមត្រូវ» ជាដើម។ ពួកគេបានជួបជុំគ្នា នៅម៉ោងប្រហែលជាង៨ ព្រឹកថ្ងៃទី១១ សីហា នៅទីលានប្រជាធិបតេយ្យ មុននឹងហែក្បួនទៅដាក់ញ្ញត្តិតាមស្ថានទូតប្រទេសអាស៊ានឲ្យជួយធ្វើអន្តរាគមន៍។
លោក ថាច់ សេដ្ឋា ប្រធានសហគមន៍ខ្មែរកម្ពុជាក្រោម បានឲ្យដឹងថា បាតុកម្មនេះ ធ្វើឡើងដើម្បីទាមទារឲ្យក្រសួងការបរទេសខ្មែរ កោះហៅឯកអគ្គរដ្ឋទូតវៀតណាម ធ្វើកំណត់ហេតុការទូត អំពីរឿងដែលមន្ត្រីស្ថានទូតរៀតណាម លោក ត្រឹង វ៉ាន់ថុង បានលើកឡើងថា ទឹកដីខ្មែរកម្ពុជាក្រោម ជាទឹកដីរបស់វៀតណាមតាំងពីយូរមកហើយ។ ក្រុមបាតុករបានដង្ហែក្បួនទៅដាក់ញ្ញត្តិតាមស្ថានទូតបណ្តាប្រទេសអាស៊ានឲ្យជួយធ្វើអន្តរាគមន៍ ឲ្យប្រទេសវៀតណាមគោរពគោលការណ៍អាស៊ាន មិនជ្រៀតជ្រែកកិច្ចការផ្ទៃក្នុងកម្ពុជា ដូចជាការថ្លែងប៉ះពាល់ដល់កម្ពុជាជាដើម។
សូមបញ្ជាក់ដែរថា បាតុកម្មនៅព្រឹកមិញនេះ ក៏មានការចូលរួមផងដែរ ពីតំណាងរាស្ត្រគណបក្សសង្គ្រោះជាតិ សម្ព័ន្ធនិស្សិតបញ្ញវន្តកម្ពុជា ប្រជាពលរដ្ឋ ព្រះសង្ឃ និងដោយមានការឃ្លាំមើលពីកងសន្តិសុខខណុ្ឌ និងអាជ្ញាធរជាច្រើននាក់។
លោក ណៃ វ៉ង់ដា អនុប្រធានផ្នែកស៊ើបអង្កេតនិងជំនួយផ្នែកច្បាប់ នៃសមាគមការពារសិទ្ធិមនុស្ស អាដហុក ដែលសង្កេតការណ៍ជុំវិញការប្រមូលផ្តុំនោះ យល់ឃើញថា វត្តមានរបស់សន្តិសុខនៅទីលានប្រជាធិបតេយ្យ មិនមានអ្វីប្លែកនោះទេ។ លោកបន្ថែមថា វាជារឿងល្អ ប្រសិនបើសន្តិសុខមករៀបចំសណ្តាប់ធ្នាប់ និងរក្សាសុវត្ថិភាពជូនបាតុករ ក៏ប៉ុន្តែប្រសិនបើពួកគាត់មករារាំង ហាមឃាត់ដោយប្រការណាមួយ នោះជាការបំបិទសិទ្ធិប្រជាពលរដ្ឋ។
សូមរម្លឹកដែរថា បាតុកម្មដែលធ្វើឡើងដោយសមាគមខ្មែរកម្ពុជាក្រោម ជាបាតុកម្មលើកទីបីហើយ បន្ទាប់ពីការធ្វើបាតុកម្មចំនួនពីរលើក ដោយគ្មានលទ្ធផល។ ជាងនេះទៅទៀត បាតុកម្មនេះ ធ្វើឡើងប៉ុន្មានថ្ងៃ ក្រោយពីទីលានប្រជាធិបតេយ្យបើកឲ្យប្រើប្រាស់ឡើងវិញ។ ក្បួនដង្ហែបានចេញពីទីលានប្រជាធិបតេយ្យនៅម៉ោងប្រមាណ១០ព្រឹក ហើយពុំមានអំពើហិង្សាណាមួយកើតឡើងនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ