ចន ឃែរី៖ នយោបាយអាមេរិកនៅអាស៊ីនៅតែជាអាទិភាពទោះបីមានវិបត្តិថវិកា
ថ្ងៃសៅរ៍នេះ ឈានចូលដល់ថ្ងៃទី៥ហើយ ដែលសេវាកម្មជាច្រើននៃរដ្ឋាភិបាលសហព័ន្ធអាមេរិកត្រូវបិទទ្វារ ដោយសារតែវិបត្តិថវិកា។ វិបត្តិនេះក៏បានជំរុញឲ្យលោកអូបាម៉ាលុបចោលដំណើរទស្សនកិច្ចទៅកាន់តំបន់អាស៊ីផងដែរ។ ក៏ប៉ុន្តែ លោកចន ឃែរី រដ្ឋមន្រ្តីការបរទេសអាមេរិក បានអះអាងនៅថ្ងៃសៅរ៍នេះថា នយោបាយការបរទេសរបស់លោកអូបាម៉ា នៅអាស៊ី នៅតែមានអាទិភាពខ្ពស់ដដែល ដោយមិនមានអ្វីប្រែប្រួលនោះទេ។
ចុះផ្សាយនៅថ្ងៃ៖
ស្តាប់ - ០២:០១
លោក ចន ឃែរី រដ្ឋមន្រ្តីការបរទេសអាមេរិក កំពុងស្ថិតនៅក្នុងតំបន់អាស៊ី ដើម្បីចូលរួមក្នុងជំនួបកំពូលមួយចំនួន ជំនួសឲ្យលោកអូបាម៉ា ដែលបានសម្រេចលុបចោលដំណើរទស្សនកិច្ចទៅអាស៊ី ដោយសារតែវិបត្តិថវិកា នៅវ៉ាស្ហ៊ីងតោន។
ថ្លែងនៅចំពោះមុខអ្នកសារព័ត៌មាន ក្នុងអំឡុងវេទិកាសេដ្ឋកិច្ចអាស៊ីប៉ាស៊ីហ្វិក (ហៅកាត់ថា APEC) ដែលបើកធ្វើ នៅក្នុងប្រទេសឥណ្ឌូណេស៊ី លោក ចន ឃែរី បានអះអាងថា អ្វីដែលកំពុងតែកើតឡើងនៅវ៉ាស្ហ៊ីងតោនមិនធ្វើឲ្យមានអ្វីប្រែប្រួលសូម្បីតែបន្តិច ចំពោះអាទិភាពរបស់អាមេរិកនៅអាស៊ី។
ក៏ប៉ុន្តែ ក្នុងពេលជាមួយគ្នា ប្រមុខការទូតអាមេរិកបានទទួលស្គាល់ថា ប្រសិនបើវិបត្តិថវិកាអាមេរិកអូសបន្លាយពេលយូរតទៅទៀត វានឹងអាចធ្វើឲ្យកិច្ចការទូតអាមេរិកនៅទូទាំងពិភពលោក ត្រូវធ្លាក់ចុះខ្សោយ។ បណ្តាជននៅទូទាំងពិភពលោកអាចនឹងចាប់ផ្តើមមានមន្ទិលសង្ស័យលើឆន្ទៈ និងសមត្ថភាពរបស់អាមេរិក ក្នុងការរក្សានយោបាយការបរទេសរបស់ខ្លួន។
អ្នកវិភាគឯករាជខ្លះនៅអាមេរិកក៏បានបង្ហាញនូវការយល់ឃើញស្រដៀងគ្នានេះដែរ។ ប្រធានវិទ្យាស្ថានស្រាវជ្រាវខាងនយោបាយការបរទេសអាមេរិក (Council on Foreign Relations) យល់ថា ភាពជាប់គាំងក្នុងការអនុម័តថវិកាជាតិនៅពេលនេះកំពុងតែបង្ហាញពីភាពផុយស្រួយនៃស្ថិរភាពក្នុងដំណើរការរបស់ស្ថាប័នកំពូលៗរបស់អាមេរិក ហើយនៅលើឆាកអន្តរជាតិ នេះគឺជាចំណុចខ្សោយមួយ សម្រាប់ប្រទេសដែលជាមហាអំណាចពិភពលោក។
សម្រាប់អ្នកវិភាគម្នាក់ទៀត មកពីមជ្ឈមណ្ឌលស្រាវជ្រាវ Center for Strategic and International Studies (CSIS) ចំណុចខ្សោយរបស់អាមេរិកនៅលើឆាកអន្តរជាតិ ត្រូវបានបង្ហាញឲ្យឃើញរួចជាស្រេចទៅហើយ តាមរយៈការលុបចោលដំណើរទស្សនកិច្ចរបស់លោកអូបាម៉ា ទៅកាន់តំបន់អាស៊ី។
នៅក្នុងពេលនេះ វិបត្តិថវិកាអាមេរិកបានឈានចូលដល់ថ្ងៃទី៥ ដោយគ្មានពន្លឺនៃដំណោះស្រាយអ្វីសូម្បីតែបន្តិច ដោយសារតែភាគីទាំងពីរ គឺម្ខាង លោកអូបាម៉ា និងសមាជិកសភាមកពីគណបក្សប្រជាធិបតេយ្យ និងម្ខាងទៀត សមាជិកសភាមកពីគណបក្សសាធារណរដ្ឋ នៅតែប្រកាន់ជំហរតឹងរ៉ឹងរៀងៗខ្លួន ដោយគ្មានខាងណាសុខចិត្តធ្វើសម្បទានអ្វីទាំងអស់។ គណបក្សសាធារណរដ្ឋ ដែលមានសំឡេងភាគច្រើននៅរដ្ឋសភា បានព្យាករថា វិបត្តិថវិកានេះអាចនឹងអូសបន្លាយពេលរហូតដល់ទៅរាប់សប្តាហ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ