កូដកម្មនិងបាតុកម្មដ៏ធំធេងប្រឆាំងទល់នឹងនយោបាយត្បិតត្បៀតរបស់រដ្ឋាភិបាល
ប្រទេសអេស្ប៉ាញបានធ្លាក់ទៅក្នុងស្ថានភាពនៃសេដ្ឋកិច្ចដើរថយក្រោយសាជាថ្មី។ ឧនភាពថវិកាជាតិអេស្ប៉ាញបានធ្លាក់ចុះដុនដាប ទោះបីជាមាននយោបាយត្បិតត្បៀតកាត់បន្ថយការចំណាយដោយរដ្ឋាភិបាលរបស់លោកMariano Rajoy យ៉ាងណាក្តី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
កូដកម្មនិងបាតុកម្មដ៏ធំធេងនៅថ្ងៃព្រហស្បតិ៍ទី២៩មីនានេះគឺប្រជាជនអេស្ប៉ាញចង់សម្ដែងឲ្យឃើញនូវការប្រឆាំងរបស់ពួកគេទល់នឹងកំណែទម្រង់ក្នុងវិស័យការងារ និងនយោបាយត្បិតត្បៀតរបស់រដ្ឋាភិបាលដែលនឹងត្រូវដាក់បង្ហាញ “ថវិកាឆ្នាំ២០១២”នៅពេលដ៏ខ្លីខាងមុខនេះ។
គួរបញ្ជាក់ថា តាំងពីក្រុមអភិរក្សនិយមឬស្តាំនិយមអេស្ប៉ាញរបស់លោកនាយករដ្ឋមន្ត្រី Mariano Rajoy បានឡើងមកកាន់អំណាចតាំងពីខែធ្នូឆ្នាំ២០១១មកទល់ពេលនេះ មានរយៈកាលប្រមាណ១០០ថ្ងៃ ស្ថានភាពសេដ្ឋកិច្ចនិងស្ថានភាពសង្គមនៃប្រទេសអេស្ប៉ាញពុំបានស្គាល់ការរីកចម្រើនសោះឡើយ។ ផ្ទុយទៅវិញ អ្នកឥតការងារធ្វើមានកាន់តែច្រើន សេដ្ឋកិច្ចអេស្ប៉ាញដើរថយក្រោយ។ ទាំងនេះបានបណ្តាលឲ្យផ្ទុះចេញជាកំហឹងប្រជាជនមួយដ៏គួរឲ្យបារម្ភ។
មូលហេតុទាំងនេះហើយដែលបានជំរុញឲ្យរដ្ឋាភិបាលរបស់លោកនាយករដ្ឋមន្ត្រី Mariano Rajoy ខិតខំធ្វើការកែទម្រង់ ដោយបានកាត់បន្ថយការចំណាយ និងកែទម្រង់ក្នុងវិស័យការងារ ដោយពុំបានទទួលការយល់ព្រមពីសំណាក់ក្រុមសហជីពអេស្ប៉ាញសំខាន់ៗ ដែលភាគច្រើនមានទំនោរទៅរកអ្នកសង្គមនិយម។
នៅចំពោះមុខវិបត្តិសេដ្ឋកិច្ចនិងវិបត្តិសង្គមដ៏សែនធ្ងន់ធ្ងរបែបនេះ កម្មវត្ថុចម្បងនៃរដ្ឋាភិបាលអភិរក្សនិយមរបស់លោកនាយករដ្ឋមន្ត្រី Mariano Rajoy គឺធ្វើការប្រយុទ្ធទប់ទល់នឹងបញ្ហាឥតការងារធ្វើដែលបានកើនឡើងដល់កម្រិតកំពូលគឺប្រមាណជាង២២%នៃប្រជាជនសកម្ម។ ចំណែកឯយុវជនអេស្ប៉ាញវិញ មានដល់ទៅជិត៤០%ឯណោះដែលគ្មានការងារធ្វើ។
ពាក់ព័ន្ធនឹងការប្រយុទ្ធទល់នឹងបញ្ហាឧនភាពថវិកាជាតិវិញ រដ្ឋាភិបាលអភិរក្សនិយមអេស្ប៉ាញនឹងខិតខំកាត់បន្ថយឧនភាពឲ្យធ្លាក់មកនៅ៥,៣%នៃផលិតផលដុលសរុបនៅឆ្នាំ២០១២នេះ ក្រោយពីបានស្គាល់ឧនភាព៨,៥%នៅឆ្នាំ២០១១កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ