ជប៉ុនរក្សាពាក្យ “សុំទោស” ដដែល ក្នុងសំណុំរឿង ទាសករផ្លូវភេទ
នៅថ្ងៃសុក្រទី ២០មិថុនានេះ ជប៉ុន បានប្រកាសបញ្ជាក់ជំហរជាថ្មី ថាមិនត្រលប់ទៅសើរើពាក្យសុំទោស ដែលរដ្ឋាភិបាលតូក្យូធ្លាប់ធ្វើកាលពីឆ្នាំ១៩៩៣ ពាក់ព័ន្ធនឹងសំណុំរឿងទាសករផ្លូវភេទទេ។ ការអះអាងផ្លូវការតាមរយៈអ្នកនាំពាក្យរដ្ឋាភិបាលនេះ ទំនងសារលួងលោមប្រទេសជិតខាង កូរ៉េខាងត្បូង និងចិន មិនឱ្យបញ្ចេញប្រតិកម្មអវិជ្ជមានអ្វី បន្ថែមលើទំនាក់ទំនងដ៏ស្រអាប់ក្នុងពេលបច្ចុប្បន្ននេះ។
ចុះផ្សាយនៅថ្ងៃ៖
ស្តាប់ - ០២:០៤
“ជប៉ុនមិនប្តូរជំហរទេ” ! យើងក៏ឈឺចាប់ដូចអ្នកបានរងគ្រោះដែរ! នេះជាការប្រកាសរបស់អ្នកនាំពាក្យរដ្ឋាភិបាលជប៉ុន លោក យោស្ហ៊ីហ៊ីដេ ស៊ូហ្កា Yoshihide Suga។ មិនប្តូរជំហរ បានន័យថា ពាក្យសុំទោស នៅតែ សុំទោស គ្មានការសើរើ ដកចេញវិញទេ។
នៅឆ្នាំ១៩៩៣ ជប៉ុនធ្លាប់បានចេញសេចក្តីថ្លែងការណ៍ផ្លូវការ ឈ្មោះ គូណូ (ឈ្មោះប្រមុខរដ្ឋាភិបាលជប៉ុន នៅសម័យនោះ) សុំទោសជាផ្លូវការ និងសម្តែងការសោកស្តាយចំពោះទង្វើចាប់ស្ត្រីមកធ្វើជាទាសករផ្លូវភេទ បម្រើសេចក្តីត្រូវការផ្នែកតុណ្ហារបស់ពលទាហានជប៉ុន ក្នុងសម័យសង្គ្រាមលោក។ ប៉ុន្តែតាំងពីមានរដ្ឋាភិបាលថ្មី អភិរក្សមក មានពាក្យចចាមអារាមលេចឮថារដ្ឋាភិបាលអភិរក្សរបស់លោក ស៊ីនហ្សូ អាបេ បានបង្កើតគណៈកម្មការស៊ើបអង្កេតមួយ សិក្សាឡើងវិញសក្ខីកម្មរបស់ស្ត្រីជាទាសករផ្លូវភេទជាតិកូរ៉េខាងត្បូង ថាតើការសុំទោសឆ្នាំ១៩៩៣ពិតជាសមហេតុផលឬអត់ ឬក៏ត្រូវដកពាក្យមកវិញ។ ជាហេតុធ្វើឱ្យ កូរ៉េខាងត្បូង និងចិន មានសប្បាយចិត្ត គិតថាជប៉ុននឹងដកពាក្យសុំទោសនោះ។
នៅថ្ងៃសុក្រនេះ ទំនងយល់និងមិនចង់ឃើញមានប្រតិកម្មអវិជ្ជមានអ្វីពីប្រទេសជិតខាង អ្នកនាំពាក្យរដ្ឋាភិបាលជប៉ុនបានពន្យល់ការពារខ្លួនថា ការបើកអង្កេត ដោយប្រើភ្នាក់ងារ សម្ងាត់ ជាបញ្ញាវ័ន្ត ផ្ចង់លម្អិតសិក្សាឡើងវិញ សក្ខីកម្មដែលជប៉ុនធ្លាប់ប្រើជាមូលដ្ឋាន សុំទោសនោះ គឺជាសកម្មភាពធម្មតា ក្នុងទម្លាប់ប្រទេសកាន់លទ្ធិប្រជាធិបតេយ្យ ដែលត្រូវផ្តល់តម្លាភាពដល់រដ្ឋសភា និងគឺដើម្បីបានយល់អំពីប្រវត្តិសាស្ត្រ ប៉ុណ្ណោះ។ គ្មានឡើយគំនិតចង់សើរើ ពាក្យសុំទោស។
ពាក្យចចាមអារាម សេចក្តីថ្លែងការណ៍មិនច្បាស់លាស់ ទាក់ទងនឹងសំណុំរឿងទាសករផ្លូវភេទនេះ តែងតែមកបំពុលទំនាក់ទំនងការទូតជប៉ុននិងប្រទេសជិតខាងជាពិសេសកូរ៉េខាងត្បូងចិន ល្អក់កករយ៉ាងខ្លាំង។ បើតាមអ្នកឯកទេសផ្នែកប្រវត្តិសាស្ត្រ នៅក្នុងសម័យសង្គ្រាមលោកលើកទីពីរនោះ មានស្រ្តីប្រមាណ ២សែនរងគ្រោះ ចាប់បង្ខំឱ្យធ្វើជាទាសករផ្លូវភេទបម្រើទាហានជប៉ុន។ ពួកគេភាគច្រើនជាជនជាតិកូរ៉េខាងត្បូង និងក៏មានដែរស្ត្រីចិន ឥណ្ឌូណេស៊ី ហ្វីលីពីន និងតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ