ជប៉ុនបានពង្រីកប្រព័ន្ធការពារខ្លួនប្រឈមនឹងចិន
នៅថ្ងៃសៅរ៍ ទី២០ មេសា ជប៉ុនបានចាប់ផ្តើមសាងសង់ស្ថានីយ៍រ៉ាដាយោធានៅលើកោះយ៉ូណាហ្គុយនី។ បើគិតតាមភូមិសាស្រ្ត កោះយ៉ូណាហ្គុយនីរបស់ជប៉ុនដែលស្ថិតក្នុងសមុទ្រចិនខាងកើតមួយនេះមានចម្ងាយជិតជាងប្រទេសចិន ជាងទីក្រុងតូក្យូ។ លោករដ្ឋមន្រ្តីក្រសួងការពារជាតិជប៉ុនអ៊ីតស៊ូណូរី អូណូដឺរ៉ាបានចូលរួមដោយផ្ទាល់នៅក្នុងពិធីបើកសម្ពោធការដ្ឋានសាងសង់ស្ថានីយ៍រ៉ាដាយោធានៅលើកោះយ៉ូណាហ្គុយនីនោះ។ ថ្លែងនាឱកាសនោះ លោកអូណូដឺរ៉ាបានប្រាប់ឲ្យដឹងពីការពង្រីកការសាងសង់ស្ថានីយ៍រ៉ាដាយោធានៅកន្លែងផ្សេងៗទៀត។
ចុះផ្សាយនៅថ្ងៃ៖
ស្តាប់ - ០២:០៦
សម្រាប់ជប៉ុន នេះជាស្ថានីយ៍រ៉ាដាយោធាលើកទីមួយដែលខ្លួនបានសាងសង់ តំាងពីក្រោយសហរដ្ឋអាមេរិកបានប្រគល់កោះអូគីណាវ៉ាឲ្យជប៉ុនក្នុងឆ្នំា ១៩៧២។ តែវិធានការការពាររបស់រដ្ឋាភិបាលជប៉ុនពេលនេះបានកើតមានឡើង ចំពេលដែលទំនាក់ទំនងរវាងទីក្រុងតូក្យូ និងប៉េកំាងកំពុងឡើងតានតឹងខ្លំាងជុំវិញជម្លោះទីប្រជុំកោះសេនកាគុ។ ទីប្រជុំកោះសេនកាគុដែលសព្វថ្ងៃស្ថិតក្រោមការគ្រប់គ្រងរបស់ជប៉ុន តែចិនកំពុងទាមទារថាជារបស់ខ្លួន។ លោករដ្ឋមន្រ្តីក្រសួងការពារជាតិជប៉ុនអូណូដឺរ៉ាបានបញ្ជាក់ថា ជប៉ុននឹងបន្តសាងសង់ស្ថានីយ៍រ៉ាដាយោធារបៀបនេះនៅកន្លែងផ្សេងៗទៀតក្នុងគោលដៅការពារទីប្រជុំកោះទំាងអស់ដែលជាកម្មសិទ្ធិរបស់ជប៉ុន។
គួរជម្រាបជូនថា ជម្រើសសាងសង់ស្ថានីយ៍រ៉ាដាលើកោះយ៉ូណាហ្គុយនីពេលនេះមិនមែនជារឿងចៃដន្យទេ ព្រោះថា កោះដែលមានផ្ទៃក្រឡាដី ៣០គីឡូម៉ែត្រក្រឡា និងមានប្រជាជនជប៉ុនរស់នៅប្រមាណជា ១ ៥០០នាក់នោះ មានចម្ងាយពីទីប្រជុំកោះសេនកាគុតែប្រមាណជា ១៥០គីឡូម៉ែត្រប៉ុណ្ណោះ។ ដូច្នេះ វាពិតជាងាយស្រួលសម្រាប់ជប៉ុនក្នុងការតាមឃ្លំាមើលសកម្មភាពរបស់យន្តហោះចិន និងកប៉ាល់ចិនដែលឧស្សាហ៍ចូលមកក្បែរទីប្រជុំកោះសេនកាគុរបស់ជប៉ុន។ ការសម្រេចចិត្តរបស់លោកនាយករដ្ឋមន្រ្តីជប៉ុនស៊ីន ហ្សូអាបេនេះ ជាសក្ខីកម្មមួយដែលបញ្ជាក់ពីក្តីបារម្ភរបស់ជប៉ុនចំពោះទីប្រជុំកោះ និងកោះមួយចំនួនរបស់ខ្លួនដែលកំពុងទទួលការគំរាមកំហែងចង់បានរបស់ចិន។ ជាមួយនឹងប្រព័ន្ធរ៉ាដានេះ ជប៉ុននឹងអាចប្រឈមទប់នឹងគ្រប់គ្រាប់មីស៊ីល ព្រមទំាងអាចឃ្លំាមើលនូវសកម្មភាពចល័តទ័ពរបស់ចិន។
កាលពីខែធ្នូ ឆ្នំា ២០១៣ រដ្ឋាភិបាលជប៉ុនបានប្រកាសពីការដំឡើងថវិកាយោធាក្នុងគោលដៅប្រឈមទប់នឹងឥទ្ធិពលយោធារបស់ប្រទេសចិន។ ចិនដែលជប៉ុនបានចោទពីបទបាន និងកំពុងពង្រឹងកម្លំាងយោធាជើងគោក ជើងទឹក និងជើងអាកាសនៅក្នុងសមុទ្រចិនខាងត្បូង និងសមុទ្រចិនខាងកើត។ ជាក់ស្តែងថ្មីៗនេះ គឺការបង្កើតតំបន់ការពារដែនអាកាសដែលបានគ្របដណ្តប់លើទីប្រជុំកោះសេនកាគុរបស់ជប៉ុនទៀតផង។ តំបន់ការពារដែនអាកាសដែលចិនបានទទួលរងការរិះគន់ ទិតៀនពីជប៉ុន កូរ៉េខាងត្បូង និងពីសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ