ជប៉ុនរំលឹកខួប៣ឆ្នាំនៃរលកយក្សស៊ូណាមីនិងមហន្តរាយនុយក្លេអ៊ែរហ្វ៊ូគូស្ហ៊ីម៉ា
នៅជប៉ុន ថ្ងៃអង្គារ១១មីនានេះ វេលាម៉ោង២និង៤៦នាទីរសៀល ប្រជាជនជប៉ុនបាន ស្ងប់ស្ងាត់រយៈពេលមួយនាទី ដើម្បីរំលឹកវិញ្ញាណក្ខន្ធមនុស្ស២ម៉ឺននាក់ ដែលបានបាត់បង់ជីវិត កាលពីថ្ងៃ១១មីនា ឆ្នាំ២០១១ ក្នុងមហន្តរាយរលកយក្សស៊ូណាមី។ រដ្ឋាភិបាលជប៉ុនបានរៀបពិធីរំលឹកខួប៣ឆ្នាំនៃមហន្តរាយនេះ ដោយមានវត្តមានចូលរួមរបស់ព្រះចៅអធិរាជ អាគីហ៊ីតូ អធិរាជនីមីឈីកូ និងនាយករដ្ឋមន្ត្រីជប៉ុន ស្ហ៊ីនហ្សូ អាបេ។
ចុះផ្សាយនៅថ្ងៃ៖ កែប្រែថ្ងៃទី៖
៣ឆ្នាំមុន កាលពីថ្ងៃ១១មីនា ឆ្នាំ ២០១១ នៅវេលាម៉ោង ២និង៤៦ នាទីរសៀល គ្រោះរញ្ជួយដីមួយកម្រិត ៩ វ៉ិចទ័រ បានកើតឡើងនៅក្រោមមហាសមុទ្រប៉ាស៊ីហ្វិក វាយប្រហារប្រទេសជប៉ុន សម្លាប់ប្រជាជន២ម៉ឺននាក់ និងបំផ្លាញប្រតិករនុយក្លេអ៊ែរនៅមជ្ឈមណ្ឌលហ្វ៊ូគូស្ហ៊ីម៉ា។ នៅថ្ងៃអង្គារ១១មីនាឆ្នាំនេះ រដ្ឋាភិបាលនិងប្រជាជនជប៉ុន បាននាំគ្នាស្មឹងស្មាធ រំលឹកខួប៣ឆ្នាំ ឧទ្ទិសដល់វិញ្ញាណក្ខន្ធជនរងគ្រោះដោយមហន្តរាយនេះ។
រលកយក្សស៊ូណាមីបានរលត់ទៅ៣ឆ្នាំហើយក្តី បញ្ហាសេសសល់ជាច្រើន បង្កដោយមហន្តរាយនេះ នៅមិនទាន់ដោះស្រាយរួចនៅឡើយទេ។ ការសាងសង់ឡើងវិញនូវផ្ទះសម្បែងនិងហេដ្ឋារចនាសម្ព័ន្ធ នៅគាំងទ្រឹងនៅឡើយ។ លើសពីនេះ អាជ្ញាធរនៅមិនទាន់រកឃើញសាកសពមនុស្សជាង១សែន៨ម៉ឺន៥ពាន់នាក់ ដែលរលកយក្សបានត្របាក់ទៅកាលពី៣ឆ្នាំមុន នោះដែរ។ ប្រជាជន២សែន៧ម៉ឺននាក់ នៅមិនទាន់អាចវិលត្រលប់ទៅកាន់ផ្ទះសម្បែងខ្លួននៅឡើយទេ។ ទីលំនៅពួកគេបានរងការបំផ្លាញដោយរលកយក្សស៊ូណាមី។ ធាតុវិទ្យុសកម្មដែលលេចចេញពីមជ្ឈមណ្ឌលហ្វ៊ូគូស្ហ៊ីម៉ា ក៏បានធ្វើអោយផ្ទះសម្បែងច្រើនខ្នង ត្រូវបិទទ្វារ មិនអាចអោយមនុស្សចូលមកនៅវិញបានឡើយ។ ជនជាតិជប៉ុនជិតមួយសែននាក់ ក្នុងនោះមានមនុស្សចាស់ច្រើននាក់ កំពុងរស់នៅក្នុងទីលំនៅបណ្តោះអាសន្ននៅឡើយ។ ក្នុងចំណោមផ្ទះសម្បែងដែលរដ្ឋាភិបាលបានសន្យាសាងសង់ជូនប្រជាជនវិញ មានតែផ្ទះ៣,៥ភាគរយប៉ុណ្ណោះ ដែលបានសាងសង់រួចតាមពាក្យសន្យា នៅខេត្ត អ៊ីវ៉ាតេ និងមីយ៉ាហ្គី ជាខេត្តជាប់សមុទ្រ រងគ្រោះដោយរលកយក្ស។
ប្រជាជនធ្លាប់រស់នៅក្នុងតំបន់ហ្វ៊ូគូស្ហ៊ីម៉ា មួយចំនួនក៏មិនចង់វិលត្រលប់មកផ្ទះសម្បែងវិញដែរ ព្រោះខ្លាចរងគ្រោះដោយធាតុវិទ្យុសកម្ម។ ថ្វីបើគ្មានមនុស្សណាម្នាក់ស្លាប់ ដោយសារធាតុវិទ្យុសកម្ម រឺការផ្ទុះនៃឧស្ម័នអ៊ីដ្រូសែន ក្រោយមហន្តរាយស៊ូណាមីក្តី ប៉ុន្តែ ប្រជាជន១៦៥០នាក់ បានស្លាប់ក្នុងពេលអាជ្ញាធរធ្វើការជម្លៀស រឺក៏ស្លាប់ដោយសារតែលក្ខខណ្ឌរស់នៅរបស់ពួកគេបានធ្លាក់ចុះដុនដាបខ្លាំង។
បច្ចុប្បន្ន ប្រជាជនជប៉ុន៩៥ភាគរយ នៅតែបារម្ភពីស្ថានភាពហ្វ៊ូគូស្ហ៊ីម៉ា ព្រោះថានៅមជ្ឈមណ្ឌលហ្វ៊ូគូស្ហ៊ីម៉ា ទឹកមានជាតិពុលដោយធាតុវិទ្យុសកម្ម បានហូរចូលសមុទ្ររាល់ថ្ងៃ ហើយថ្ងៃណាមួយ ក្រុមហ៊ុនថាមពលអគ្គិសនីតេបកូ ដែលទទួលបន្ទុកគ្រប់គ្រងបញ្ហាធាតុវិទ្យុសកម្មនៅទីនោះទៀតសោត អាចនឹងទទួលការអនុញ្ញាតអោយបញ្ចេញទឹកមានជាតិពុលទាំងនេះ ទៅក្នុងសមុទ្រក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ