រដ្ឋាភិបាលបញ្ចេញលុយដើម្បីស្រោចស្រង់សេដ្ឋកិច្ច និងពង្រឹងដែនសមុទ្រ
រដ្ឋាភិបាលជប៉ុនបានសម្រេច បញ្ចេញសាច់ប្រាក់ ជាង៤ពាន់លានអឺរ៉ូ នៅថ្ងៃសុក្រនេះ ដើម្បីអភិវឌ្ឍឡើងវិញសេដ្ឋកិច្ច នៅតំបន់ភាគខាងជើងប្រទេសដែលរងគ្រោះដោយគ្រោះថ្នាក់រញ្ជួយដី និរលកយក្សស៊ូណាមី កាលពីឆ្នាំ ២០១១។ ប្រមុខរដ្ឋាភិបាលជប៉ុនប្រញាប់អនុម័តថវិកាស្រោចស្រង់សេដ្ឋកិច្ច ដើម្បីប្រមូលប្រជាប្រិយភាព នៅក្នុងការបោះឆ្នោតសភាថ្មី ដែលនឹងអាចរៀបចំធ្វើឡើង នៅក្នុងពេលឆាប់ខាងមុខនេះ។
ចុះផ្សាយនៅថ្ងៃ៖
ស្តាប់ - ០១:១៥
ថវិកាជាង៤ពាន់លានអឺរ៉ូ គឺតិចជាងពាក់កណ្តាល ចំនួនដែលកាសែតក្នុងស្រុកជប៉ុនធ្លាប់ប្រកាស កាលពីសប្តាហ៍មុន (ប្រមាណ ១០ពាន់លានអឺរ៉ូ)។ ប៉ុន្តែ យ៉ាងណាក៏ដោយ ភាគច្រើននៃថវិកានេះនឹងត្រូវយកទៅប្រើដើម្បីសាងសង់ឡើងវិញ ហេដ្ឋារចនាសម្ព័ន្ធ និងជំរុញសេដ្ឋកិច្ច នៅតំបន់ភាគខាងជើង ដែលបានរងគ្រោះយ៉ាងធ្ងន់ធ្ងរដោយគ្រោះរញ្ជួយដី និងរលកយក្សស៊ូណាមី។
ចំណែកថវិកាមួយផ្នែកទៀត នឹងត្រូវគេយកទៅប្រើប្រាស់ដើម្បីពង្រឹងផ្នែកការពារដែនសមុទ្រ ជាពិសេសក្នុងបរិបទដែលជប៉ុនកំពុងប្រឈមមុខដាក់គ្នាខ្លាំងជាមួយចិន ជុំវិញជម្លោះទាមទារប្រជុំកោះសេនកាគូ (Senkaku)។ យោងតាមទីភា្នក់ងារព័ត៌មានជប៉ុន ក្យូដូ ជាមួយនឹងថវិកានេះ រដ្ឋាភិបាលនឹងបំពាក់ឧបករណ៍ទំនើបៗថ្មីដល់ឆ្មាំសមុទ្រជប៉ុន ដូចជានាវាល្បាតសមុទ្រធុនធំបួនគ្រឿង និងឧទ្ធម្ភាគចក្រទំនើប៣គ្រឿង ដែលអាចហោះរយៈពេលយូរលើសមុទ្រ។
ដោយពិតទៅ សម្ភារៈយោធាទាំងនេះនឹងត្រូវទិញ នៅឆ្នាំក្រោយ ក៏ប៉ុន្តែ អាជ្ញាធរជប៉ុនប្រញាប់បំពាក់ឆ្មាំសមុទ្ររបស់ខ្លួន ដើម្បីការពារដែនកោះរបស់ខ្លួន ដែលរដ្ឋាភិបាល ទើបបានប្រមូលទិញ មកធ្វើជាសម្បត្តិរដ្ឋជប៉ុន កាលពីខែកញ្ញាកន្លងទៅ។ នយោបាយប្រមូលទិញកោះ របស់រដ្ឋាភិបាលជប៉ុនដែលបានធ្វើឲ្យប្រទេសចិនខឹងសម្បារ ដោយមូលហេតុ ចិនក៏បានទាមទារធ្វើជាម្ចាស់ប្រជុំកោះ ដែលចិនឲ្យឈ្មោះថា ទាវយូ (Diaoyu)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ