ទីក្រុងតូក្យូចោទចិន ថាជាអ្នកវាយប្រហារខ្លួនតាមប្រព័ន្ធអ៊ីនធ័រណែត
នៅប្រទេសជប៉ុន ក្រសួងប្រតិចារកិច្ចបានចោទប្រទេសចិន ថាជាអ្នកទទួលខុសត្រូវចំពោះការវាយប្រហារតាមប្រព័ន្ធអ៊ីនធ័រណែតប្រឆំាងនឹងសភាជប៉ុន និងស្ថានទូតជប៉ុនជាច្រើននៅឯបរទេស។ នេះជាព័ត៌មានមួយដែលបានចុះផ្សាយដោយកាសែតជប៉ុនមួយឈ្មោះ Yomiuri Shimbun។
ចុះផ្សាយនៅថ្ងៃ៖
ស្តាប់ - ០១:១០
បើយោងតាមកាសែត Yomiuri មេរោគព័ត៌មានវិទ្យាប្រភេទ « Cheval de Troie » ឬជាភាសាអង់គ្លេស « Trojan Horse » ត្រូវបានបង្កើតឡើងជាលក្ខណៈពិសេសទុកសម្រាប់ចូលវាយប្រហារក្នុងប្រព័ន្ធព័ត៌មានវិទ្យានៃក្រសួងការបរទេសជប៉ុន។
ដើម្បីអាចបង្កើតប្រភេទមេរោគអ៊ីនធ័រណែតនេះឡើង ក្រុមចោរព័ត៌មានវិទ្យាត្រូវតែមានទិន្នន័យពិសេស ស្តីពីប្រព័ន្ធព័ត៌មានវិទ្យានៃក្រសួងការបរទេសជប៉ុន ហើយមេរោគនោះនឹងអាចចូលលុកលុយទៅក្នុងបេះដូងនៃម៉ាស៊ីនកុំព្យូទ័រដើម្បីលួចយកព័តមាន ឬមួយក៏កំទេចព័ត៌មានទំាងនោះចោលតែម្តង។
ក្រសួងស៊ើបការសម្ងាត់ជប៉ុនកំពុងបារម្ភពីការបែកធ្លាយនូវព័ត៌មានទាក់ទងនឹងសំណុំរឿងការទូតរបស់ខ្លួន ធ្លាក់ទៅក្នុងដៃរបស់រដ្ឋាភិបាលប្រទេសចិន។ យោងតាមព័ត៌មានចុះផ្សាយដោយកាសែតជប៉ុន Yomiuri ដដែល ការវាយប្រហារតាមប្រព័ន្ធអ៊ីនធ័រណែតលើស្ថានទូតនានា និងសភាជប៉ុនត្រូវបានធ្វើឡើងពីម៉ាស៊ីនកុំព្យូទ័រនៅក្នុងប្រទេសចិន។
កន្លងមក និងបន្ទាប់ពីមានការវាយប្រហារព័ត៌មានវិទ្យាប្រឆំាងនឹងក្រុមហ៊ុនជប៉ុន Mitsubishi Heavy Industries មក ចិនក៏ត្រូវបានទទួលរងការចោទប្រកាន់ពីបទបានចូលលួចព័ត៌មានទាក់ទងនឹងមជ្ឈមណ្ឌលនុយក្លេអ៊ែរ ព្រមទំាងបច្ចេកវិទ្យាផលិតយន្តហោះយោធាជប៉ុនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ