នាយករដ្ឋមន្ត្រីអ៊ីស្រាអែលប្រកាសធ្វើសង្គ្រាមយូរអង្វែងនៅហ្កាហ្សា
សន្តិភាពនៅតំបន់ហ្កាហ្សាទំនងជាគ្មានថ្ងៃលូតចេញបានទេ ! ក្នុងយប់ថ្ងៃចន្ទឆ្លងមកថ្ងៃអង្គារ យប់ថ្ងៃបិទបញ្ចប់ពិធីបួសតមអាហារក្នុងសាសនាអ៊ីស្លាម គឺជាថ្ងៃមហារងគ្រោះ ! អ៊ីស្រាអែល បានសម្រុកផ្លោងគ្រាប់ ទម្លាក់គ្រាប់បែក យ៉ាងរន្ធាន់ ស្លាប់មនុស្សយ៉ាងហោចណាស់ ២៨នាក់ ! ការប្រយុទ្ធគ្នាលើដី ក៏សន្ធោសន្ធៅ ទាហានអ៊ីស្រាអែល១០នាក់បានស្លាប់ ដោយគ្រាប់សំណរពួកហាម៉ាស។ មជ្ឈមណ្ឌលអគ្គីសនីតែមួយគត់របស់ហ្កាហ្សា ត្រូវផ្អាកដំណើរដោយទ័ពអ៊ីស្រាអែលបាញ់ត្រូវ។ អ៊ីស្រាអ៊ែល និងហាម៉ាស ប៉ាឡេស្ទីន ធ្លាក់ក្នុងភ្លើងសង្គ្រាមដ៏សាហាវ និង ដែលអាចអូសបន្លាយយូរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
“អ៊ីស្រាអែលត្រូវត្រៀមរៀបចំធ្វើសង្គ្រាមយូរ នៅតំបន់ហ្កាហ្សា និងបន្តប្រើកម្លាំងប្រយុទ្ធរហូតទាល់តែបំពេញបេសកកម្មបានសម្រេច” ! នេះជាសាររបស់លោកនាយករដ្ឋមន្ត្រីអ៊ីស្រាអែល ប៊ិនយ៉ាមីន នេតាន់យ៉ាហ៊ូ ទៅកាន់ប្រជាជាតិ នៅយប់មិញ។ បេសកកម្មរបស់អ៊ីស្រាអែល គឺគ្រប់គ្រង់បានពួកហាម៉ាស ដកអាវុធចេញអស់ពីតំបន់ហ្កាហ្សា និងបំផ្លាញបណ្តាញរូងក្រោមដី ដែលពួកហាម៉ាសតែងប្រើ និងលាក់ខ្លួនលាក់អាវុធ សម្រាប់វាយប្រហារអ៊ីស្រាអែល។
នាយករដ្ឋមន្ត្រីអ៊ីស្រាអែល បានច្រានចោលរាល់គំនិតចង់ត្រលប់ទៅរកការចរចារកសន្តិភាព ប្រែក្លាយយប់ថ្ងៃបិទបញ្ចប់ពិធីបុណ្យសាសនា ទៅជាការបង្ហូរឈាម។ ពេញមួយយប់ គេឮតែស្នូរគ្រាប់កាំភ្លើង គ្រាប់បែក ការប្រយុទ្ធមានទ្រាយទ្រាយធំនិងសាហាវខ្លាំងបំផុត គិតចាប់ពីអ៊ីស្រាអែលបើកយុទ្ធនាការវាយប្រហារលើតំបន់ហ្កាហ្សា ២១ថ្ងៃមក។ តាំងពីព្រលប់ កងទ័ពអ៊ីស្រាអែល បានជូនដំណឹងឱ្យប្រជាជនស៊ីវិលរស់នៅតំបន់ហ្កាហ្សាភាគខាងកើតចាកចេញពីផ្ទះសម្បែង។ អ៊ីស្រាអែលពេលនេះកំពុងដៅចំណុចវាយប្រហារ ចំនួន ១៥០កន្លែង មានជាអាទិ៍គេហដ្ឋានមេដឹកនាំហាម៉ាស ទីស្នាក់ការវិទ្យុនិងទូរទស្សន៍ ពិសេសរូងក្រោមដី កំពង់ផែ មជ្ឈមណ្ឌលអគ្គិសនី ព្រមទាំងក្រសួងហិរញ្ញវត្ថុ... ប៉ុន្តែគ្រាប់កាំភ្លើងគ្មានភ្នែកទេ ខ្លះ ធ្លាក់ក្បែរមន្ទីរពេទ្យដ៏ធំប្រចាំតំបន់ហ្កាហ្សា ខ្លះធ្លាក់លើទីកំសាន្តកុមារដែលបានធ្វើក្មេងៗជាច្រើនបាត់បង់ជីវិត។ ខាងប៉ាឡេស្ទីនវិញ ក៏បានបញ្ជូនរ៉ុកកែតទៅក្រុងទែអាវីវ របស់អ៊ីស្រាអែលដែរនៅយប់មិញ ប៉ុន្តែពុំបានបង្កឱ្យជនរងគ្រោះទេ។
ប្រឈមមុខនឹងសន្ទុះវាយប្រហាររបស់អ៊ីស្រាអែល អគ្គមគ្គុទេសក៍អ៊ីរ៉ង់ បានប្រកូកប្រកាសហៅពិភពអ៊ីស្លាមទាំងអស់ឱ្យជួយបំពាក់អាវុធដល់បណ្តាជនប៉ាឡេស្ទីន ដើម្បីមានកម្លាំងទប់ទល់នឹងការវាយលុករបស់អ៊ីស្រាអែល ដែលបានប្រព្រឹត្តអំពើប្រល័យពូជសាសន៍នៅតំបន់ហ្កាហ្សា។ នៅក្នុងសារថ្លែងតាមកញ្ចក់ទូរទស្សន៍ អាយ៉ាតូឡា ខាមេណី បានចាត់ទុកអ៊ីស្រាអែល ជាឆ្កែឆ្កួត ជាចចកអត់ឃ្លាន វាយប្រហារតែជនស្លូតត្រង់ ...
លោកអគ្គលេខាធិការអង្គការសហប្រជាជាតិ បាន គីមូន បានប្រកាសធ្វើទីក្រុងញូវយ៉ក ឱ្យភាគទាំងពីរ ជ្រើសរើសផ្លូវមនុស្សធម៌ ព្រោះវាត្រូវការតែឆន្ទៈនយោបាយប៉ុណ្ណោះ និងចាត់ទុកទង្វើបាញ់ប្រហារគ្នាថា ជាទង្វើគ្មានទំនួលខុសត្រូវ និងជាកំហុសសីលធម៌។ ចំណែកលោក មះមូដ អាបាស ប្រធានអាជ្ញាធរដែនដីប៉ាឡេស្ទីនបានអំពាវនាវឱ្យអ៊ីស្រាអែលបញ្ឈប់ការសម្លាប់រង្គាលជីវិតប្រជាជន និងកំពុងធ្វើបំលាស់ទីស្វែងរកអន្តរាគមន៍បរទេស ក្រែងអាចរកឃើញកិច្ចព្រមព្រៀងឈប់បាញ់។ ប៉ុន្តែអ៊ីស្រាអែលរបស់លោក នេតាន់យ៉ាហ៊ូ បានច្រានចោទដាច់ខាត មិនចង់ឃើញកាតា និងតួកគី មានចំណែកដំណោះស្រាយវិបត្តិឱ្យអ៊ីស្រាអែលនិងប៉ាឡេស្ទីនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ