អ៊ីរ៉ង់បង្កើនល្បឿនកម្មវិធីនុយក្លេអ៊ែរមុនបើកការចរចាជាមួយលោកខាងលិច
ទីភ្នាក់ងារថាមពលបរមាណូអន្តរជាតិ (AIEA) បានប្រកាសឲ្យដឹង កាលពីថ្ងៃព្រហស្បតិ៍ម្សិលមិញថា អ៊ីរ៉ង់បានចាប់ផ្តើមដំឡើងប្រព័ន្ធចម្រើនធាតុអ៊ុយរ៉ាញ៉ូមថ្មី និងទំនើប នៅមជ្ឈមណ្ឌលនុយក្លេអ៊ែររបស់ខ្លួន។ មហាអំណាចលោកខាងលិចបានថ្កោលទោសសកម្មភាពរបស់អ៊ីរ៉ង់នេះ ដែលធ្វើឡើង នៅតែប៉ុន្មានថ្ងៃប៉ុណ្ណោះ មុនពេលដែលអ៊ីរ៉ង់ត្រូវជួបចរចាជាមួយមហាអំណាចលោកខាងលិច ដើម្បីរកដំណោះស្រាយបញ្ហានុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០២:០៨
នៅក្នុងរបាយការណ៍ចេញផ្សាយ កាលពីថ្ងៃព្រហស្បតិ៍ម្សិលមិញនេះ ទីភ្នាក់ងារ AIEA បានឲ្យដឹងថា ចាប់តាំងពីដើមខែកុម្ភៈមក គេសង្កេតឃើញថា អ៊ីរ៉ង់បានចាប់ផ្តើមដំឡើងប្រព័ន្ធថ្មី និងទំនើប ដើម្បីចម្រើនធាតុអ៊ុយរ៉ាញ៉ូម នៅក្នុងមជ្ឈមណ្ឌលនុយក្លេអ៊ែរ Natanz ។
មជ្ឈមណ្ឌលនុយក្លេអ៊ែរ Natanz នេះ គឺជាទីតាំងសំខាន់មួយ ក្នុងចំណោមទីតាំងសំខាន់ៗមួយចំនួន ដែលជាចំណុចចម្រូងចម្រាស រវាងអ៊ីរ៉ង់ និងទីភ្នាក់ងារ AIEA ព្រមទាំងជាមួយមហាអំណាចលោកខាងលិច។ អ៊ីរ៉ង់តែងតែអះអាងថា ការចម្រើនធាតុអ៊ុយរ៉ាញ៉ូមនៅក្នុងមជ្ឈមណ្ឌល Natanz នេះ គឺធ្វើឡើង ដើម្បីយកទៅផលិតថាមពលអគ្គិសនី ប្រើក្នុងវិស័យស៊ីវិលតែប៉ុណ្ណោះ។ ក៏ប៉ុន្តែ ទីភ្នាក់ងារ AIEA និងបណ្តាប្រទេសលោកខាងលិចមានការសង្ស័យថា អ៊ីរ៉ង់ចង់ចម្រើនធាតុអ៊ុយរ៉ាញ៉ូមដល់កម្រិតខ្ពស់ ដែលអាចផលិតអាវុធនុយក្លេអ៊ែរបាន។ ការសង្ស័យនេះកើតឡើងកាន់តែខ្លាំង ដោយសារតែអ៊ីរ៉ង់ព្យាយាមរារាំងមិនឲ្យក្រុមអធិការកិច្ចរបស់ទីភ្នាក់ងារ AIEA ចូលទៅពិនិត្យទីតាំងនុយក្លេអ៊ែររបស់ខ្លួន។
រហូតមកទល់នឹងពេលនេះ អ៊ីរ៉ង់កំពុងស្ថិតក្រោមទណ្ឌកម្មជាច្រើន ដែលដាក់ដោយប្រទេសមហាអំណាចលោកខាងលិច និងសម្ព័ន្ធមិត្ត។ ក្រុមប្រឹក្សាសន្តិសុខអ.ស.ប.ក៏ធ្លាប់បានចេញសេចក្តីសម្រេចជាច្រើនលើកមកហើយដែរ ទាមទារឲ្យអ៊ីរ៉ង់ផ្អាកជាបណ្តោះអាសន្ន នូវកម្មវិធីចម្រើនធាតុអ៊ុយរ៉ាញ៉ូមរបស់ខ្លួន ក៏ប៉ុន្តែ អ៊ីរ៉ង់បដិសេធមិនព្រមធ្វើតាម។
នៅថ្ងៃអង្គារ សប្តាហ៍ក្រោយនេះ កិច្ចចរចាសាជាថ្មីមួយទៀតនឹងត្រូវបើកធ្វើ រវាងអ៊ីរ៉ង់ និងក្រុមប្រទេស ៥ បូក ១ ពោលគឺ ប្រទេសទាំង ៥ ដែលជាសមាជិកអចិន្រ្តៃយ៍នៃក្រុមប្រឹក្សាសន្តិសុខ (អាមេរិក អង់គ្លេស បារាំង ចិន និងរុស្ស៊ី) បូកជាមួយនឹងប្រទេសអាល្លឺម៉ង់។
យោងតាមមន្រ្តីការទូតលោកខាងលិច ដែលសុំមិនបញ្ចេញឈ្មោះ នៅក្នុងការចរចាសប្តាហ៍ក្រោយនេះ ក្រុមប្រទេស ៥ បូក ១ គ្រោងនឹងស្នើបន្ធូរបន្ថយទណ្ឌកម្មលើអ៊ីរ៉ង់ ជាថ្នូរនឹងសកម្មភាពណាមួយ ដែលបង្ហាញពីសុឆន្ទៈរបស់អ៊ីរ៉ង់ ក្នុងការឈានទៅផ្អាកកម្មវិធីចម្រើនធាតុអ៊ុយរ៉ាញ៉ូម។ ក៏ប៉ុន្តែ មានអ្នកវិភាគជាច្រើនយល់ថា ការចរចានេះទំនងជានឹងមិនអាចទទួលបានលទ្ធផលអ្វីធំដុំប៉ុន្មានទេ។
ដំណឹងស្តីពីការដំឡើងប្រព័ន្ធទំនើបសម្រាប់ចម្រើនធាតុអ៊ុយរ៉ាញ៉ូមរបស់អ៊ីរ៉ង់ ប៉ុន្មានថ្ងៃមុនពេលចរចានេះ កាន់តែធ្វើឲ្យគេលែងសូវមានសង្ឃឹមលើការចរចានេះថែមទៀត។ បណ្តាប្រទេសលោកខាងលិចមួយចំនួន ជាពិសេស អាមេរិក និងអង់គ្លេស បានរិះគន់ការដំឡើងប្រព័ន្ធចម្រើនធាតុអ៊ុយរ៉ាញ៉ូមថ្មីនេះ ដោយចាត់ទុកថាជាទង្វើបង្កហេតុ ដែលគួរឲ្យព្រួយបារម្ភ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ