សហភាពអឺរ៉ុប ចោទអ៊ីរ៉ង់ថាអភិវឌ្ឍមីស៊ីលបាឡេស្ទីកមានសមត្ថភាពពាំក្បាលនុយក្លេអ៊ែរ
នៅថ្ងៃសុក្រ ទី៦ធ្នូ ប្រទេសហត្ថលេខីនៃកិច្ចព្រមព្រៀងនុយក្លេអែរអ៊ីរ៉ង់ បានជួបប្រជុំគ្នាជាបន្ទាន់នៅក្រុងវីយ៉េន ប្រទេសអ៊ូទ្រីស។ ជាជំនួបយ៉ាងប្រញាប់ក្រោយពេលប្រទេសក្បាលម៉ាស៊ីនសហភាពអឺរ៉ុប ចេញប្រកាសចោទអ៊ីរ៉ង់ថា«អភិវឌ្ឍអាវុធមីស៊ីលបាឡេស្ទីកមានសមត្ថភាពពាំក្បាលនុយក្លេអែរ»។
ចុះផ្សាយនៅថ្ងៃ៖
ស្តាប់ - ០២:០១
លើកលែងតែអាមេរិក ដែលដកខ្លួនជាឯកតោភាគី គឺប្រទេសហត្ថលេខីនៃកិច្ចព្រមព្រៀងនុយក្លេអែរអ៊ីរ៉ង់ តំណាងទូតដោយប្រទេសចំនួន៥ ដូចជាបារាំង អង់គ្លេស អាល្លឺម៉ង់ ចិន រុស្ស៊ី បូកទាំងតំណាងទូតអ៊ីរ៉ង់ខ្លួនឯង បានជួបប្រជុំគ្នា នៅក្រុងវីយ៉េន ដើម្បីរកដំណោះស្រាយយ៉ាងទាន់ហន់ ចំពោះការប្រឈមមុខដាក់គ្នាយ៉ាងតឹងតែង រវាងអ៊ីរ៉ង់ និងសហភាពអឺរ៉ុប។
ជំនួបផ្លូវទូតនេះ គឺកើតមានក្រោយពេលដែលប្រទេសបារាំង អង់គ្លេស អាល្លឺម៉ង់ បានសរសេរសំបុត្ររួមគ្នា រាយការណ៍ទៅកាន់អគ្គលេខាធិការអង្គការសហប្រជាជាតិ ដោយបញ្ជាក់ថា «អ៊ីរ៉ង់អភិវឌ្ឍមីស៊ីលបាឡេស្ទីក មានសមត្ថភាពពាំបំពាក់ក្បាលនុយក្លេអែរ»។ ប្រទេសជាក្បាលម៉ាស៊ីនសហភាពអឺរ៉ុប ថែមទាំងគូសបង្ហាញថា «ទង្វើរបស់អ៊ីរ៉ង់ដូច្នេះ គឺរំលោភលើកិច្ចព្រមព្រៀងនុយក្លេអែរអ៊ីរ៉ង់ និងបំពានលើ សេចក្តីសម្រេច ឆ្នាំ២០១៥ របស់អង្គការសហប្រជាជាតិ»។
បន្ទាប់ពីឃើញដំណឹងចោទប្រកាន់បែបនេះ ប្រមុខការទូតអ៊ីរ៉ង់ បានវាយបកតាមបណ្តាញសង្គម Twitter ទៅវិញ ដោយចង្អុរមុខប្រទេសសហភាពអឺរ៉ុបថា«ឃោសនាភូតភរកុហកបោកប្រាស់ និងថា ការចោទរបស់សហភាពអឺរ៉ុបចំពោះអ៊ីរ៉ង់ គឺជាបង្ហាញពីអសមត្ថភាពរបស់ពួកគេ ហើយរឿងនេះ ធ្វើឱ្យអ៊ីរ៉ងហាក់អស់សង្ឃឹមចំពោះពួកគេយ៉ាងអនេក»។ នេះបើតាមប្រតិកម្មរបស់លោក Mohammand Java Zarif រដ្ឋមន្ត្រីអ៊ីរ៉ង់ទទួលបន្ទុកកិច្ចការបរទេស។
បើគិតចាប់តាំងពីពេលដែលអាមេរិកដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ នេះគឺជាការប៉ះទង្គិចពាក្យសម្តីគ្នាដ៏ខ្លាំងជាលើកទី១ រវាងអ៊ីរ៉ង់និងសហភាពអឺរ៉ុប។ ប្រទេសសហភាពអឺរ៉ុប កន្លងមក ច្រើនតែលួងលោមនិងអូសទាញអ៊ីរ៉ង់ ឱ្យគោរពកិច្ចព្រមព្រៀម និងធ្វើយ៉ាងណា កុំឱ្យអ៊ីរ៉ង់ឆ្លៀតអភិវឌ្ឍគ្រាប់បែកនុយក្លេអ៊ែរ។ ទោះជាយ៉ាងណាក្តី មន្ត្រីទូតអឺរ៉ុបម្នាក់ សុំលាក់ឈ្មោះ បានប្រាប់ភ្នាក់ងារព័ត៌មានបារាំងAFP ដោយវិជ្ជមានថា «កិច្ចជំនួបនៅក្រុងវីយ៉ែន ថ្ងៃសុក្រនេះ ច្រកទ្វារឈានទៅរកការចរចានិងស្រោចស្រង់កិច្ចព្រមព្រៀងនោះ អាចនឹងត្រូវបើកទ្វារឡើងវិញ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ