អៀរ៉ង់និងមហាអំណាចទាំង៦ចាប់បើកកិច្ចចរចាជាថ្មីជុំវិញសំណុំរឿងនុយក្លេអ៊ែរ
អៀរ៉ង់ និងប្រទេសមហាអំណាចទាំង ៦ បានចាប់ផ្តើមបើកការចរចាគ្នាសាជាថ្មី ក្រោយពីបានជាប់គាំងអស់រយៈពេលជាងមួយឆ្នាំ។ កិច្ចចរចានេះនឹងត្រូវធ្វើនៅក្នុងទីក្រុងហ្សឺណែវ ប្រទេសស្វ៊ីស។ ក៏ប៉ុន្តែ អ្នកវិភាគជាទូទៅយល់ថា ជំនួបនៅហ្សឺណែវនេះទំនងជាមិនអាចទទួលបានលទ្ធផលអ្វីធំដុំនោះទេ។
ចុះផ្សាយនៅថ្ងៃ៖
សេចក្តីរាយការណ៍របស់ សេង ឌីណា
កិច្ចចរចារវាងអៀរ៉ង់ និងប្រទេសមហាអំណាចទាំង ៦ គឺរួមមាន សមាជិកអចិន្រ្តៃយ៍ទាំង ៥ នៃក្រុមប្រឹក្សាសន្តិសុខអង្គការសហប្រជាជាតិ (អាមេរិក អង់គ្លេស បារាំង ចិន និងរុស្ស៊ី) បូកជាមួយនឹងប្រទេសអាឡឺម៉ង់ បានចាប់បើកធ្វើឡើងវិញ ក្នុងពេលដែលសំណុំរឿងនុយក្លេអ៊ែរអៀរ៉ង់កំពុងតែមានភាពរំជើបរំជួលយ៉ាងខ្លាំង។
កាលពីសប្តាហ៍មុន អ្នកវិទ្យាសាស្រ្តអៀរ៉ង់ពីររូប ដែលមានជំនាញខាងនុយក្លេអ៊ែរ និងខាងឡាស៊ែរ (Laser) បានទទួលរងការវាយប្រហារដោយគ្រាប់បែកបង្កៃ។ អៀរ៉ង់បានចោទប្រកាន់ប្រទេសលោកខាងលិចថាជាអ្នកនៅពីក្រោយការវាយប្រហារនេះ។
ក្នុងពេលជាមួយគ្នា ឯកសារសម្ងាត់ចុះផ្សាយដោយវែបសៃត៍ Wikileaks បានបង្ហាញថា ក្រុមប្រទេសអារ៉ាប់ និងអ៊ីស្រាអែលសុទ្ធតែបានជំរុញឲ្យអាមេរិកប្រើកម្លាំងយោធាវាយប្រហារលើទីតាំងនុយក្លេអ៊ែរអៀរ៉ង់។
កាលពីថ្ងៃអាទិត្យ ម្សិលមិញនេះ អៀរ៉ង់បានប្រកាសថា នៅពេលនេះ អៀរ៉ង់មានសមត្ថភាពគ្រប់គ្រាន់ក្នុងការទាញយករ៉ែអ៊ុយរ៉ាញ៉ូមពីក្នុងប្រទេសមកប្រើដោយខ្លួនឯងហើយ ដោយមិនចាំបាច់ពឹងលើការនាំចូលពីបរទេសនោះទេ។
គួរបញ្ជាក់ថា នៅពេលនេះ ដោយសារតែមានទណ្ឌកម្មពីសំណាក់អ.ស.ប. អៀរ៉ង់មិនអាចទិញអ៊ុយរ៉ាញ៉ូមពីបរទេសមកប្រើបានទេ។ កម្មវិធីនុយក្លេអ៊ែររបស់អៀរ៉ង់ គឺពឹងផ្អែកទៅលើសារធាតុអ៊ុយរ៉ាញ៉ូមចំនួន ៦០០តោន ដែលបានទិញពីអាហ្វ្រិកខាងត្បូង កាលពីអំឡុងទសវត្សរ៍ទី៧០។ ក្រុមប្រទេសលោកខាងលិចរំពឹងថា ស្តុកអ៊ុយរ៉ាញ៉ូមទាំង ៦០០តោននេះនឹងត្រូវអស់ នៅពេលឆាប់ៗខាងមុខ ហើយ នៅពេលនោះ អៀរ៉ង់នឹងលែងមានសារធាតុអ៊ុយរ៉ាញ៉ូមមកប្រើទៀតហើយ។ ក៏ប៉ុន្តែ ការប្រកាសរបស់អៀរ៉ង់ កាលពីថ្ងៃអាទិត្យ ម្សិលមិញនេះ បង្ហាញថា នៅពេលនេះ ទណ្ឌកម្មរបស់ក្រុមប្រឹក្សាសន្តិសុខមិនអាចរារាំងអៀរ៉ង់មិនឲ្យមានសារធាតុអ៊ុយរ៉ាញ៉ូមបានទៀតទេ។
កម្មវិធីចម្រើនធាតុអ៊ុយរ៉ាញ៉ូមរបស់អៀរ៉ង់ គឺជាចំណុចគន្លឹះនៃជម្លោះជាមួយប្រទេសលោកខាងលិច។ ប្រទេសមហាអំណាចទាំង ៦ ទាមទារឲ្យអៀរ៉ង់បញ្ឈប់រាល់កម្មវិធីចម្រើនធាតុអ៊ុយរ៉ាញ៉ូមទាំងអស់។ ចំណែកអៀរ៉ង់វិញ នៅតែប្រកាន់ជំហរយ៉ាងតឹងរ៉ឹងដដែល គឺថា ការចម្រើនធាតុអ៊ុយរ៉ាញ៉ូម គឺជាសិទ្ធិរបស់អៀរ៉ង់ ដែលមិនអាចចរចាបានទេ។ ការចរចារយៈពេល ២ថ្ងៃ ដែលចាប់បើកធ្វើនៅហ្សឺណែវថ្ងៃនេះ ទំនងជាមិនអាចទទួលបានលទ្ធផលអ្វីធំដុំនោះទេ។ យ៉ាងច្រើនបានត្រឹមឯកភាពគ្នា កំណត់ពេលចរចាលើកក្រោយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ