លោកអូបាម៉ាបញ្ជូនទីប្រឹក្សាយោធា៣០០នាក់ ទៅអ៊ីរ៉ាក់
នៅថ្ងៃព្រហស្បតិ៍ម្សិលមិញ ប្រធានាធិបតីអាមេរិក បារ៉ាក់ អូបាម៉ា បានប្រកាសបញ្ជូនទីប្រឹក្សាយោធាអាមេរិកប្រមាណ៣០០នាក់ ទៅអ៊ីរ៉ាក់ ដើម្បីជួយកងកម្លាំងអ៊ីរ៉ាក់ ប្រឈមនឹងក្រុមជីហាត។ ប្រមុខការទូតអាមេរិកចន ឃែររី ក៏នឹងចុះទៅអ៊ីរ៉ាក់ ក្នុងពេលឆាប់ៗនេះដែរ។ លោកអូបាម៉ាបានអំពាវនាវអោយនាយករដ្ឋមន្ត្រីអ៊ីរ៉ាក់និយាយស៊ីអ៊ីត បើកការចរចាជាមួយគ្រប់សហគមន៍សាសនាក្នុងស្រុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១២
ដើម្បីជួយកងទ័ពអ៊ីរ៉ាក់កំចាត់ក្រុមជីហាត ទីប្រឹក្សាយោធាអាមេរិក៣០០នាក់ ដែលត្រូវទៅដល់អ៊ីរ៉ាក់ ក្នុងពេលឆាប់ៗនេះ មានកាតព្វកិច្ចធ្វើជាជំនួយការកងទ័ពអ៊ីរ៉ាក់ ក្នុងការវាយប្រហារតាមផ្លូវអាកាស ហើយនៅលើសមរភូមិ ពួកគេអាចនឹងត្រូវបែងចែកជាក្រុមតូចៗ មានគ្នា១២នាក់ ក្នុងមួយក្រុម។
លោកអូបាម៉ាបានគូសបញ្ជាក់ឡើងវិញថា អាមេរិកត្រៀមនឹងធ្វើសកម្មភាពយោធា ករណីស្ថានការណ៍តំរូវចាំបាច់។ ប្រធានាធិបតីអាមេរិកក៏បានអំពាវនាវអោយនាយករដ្ឋមន្ត្រីអ៊ីរ៉ាក់ ម៉ាលិគី បើកការពិភាក្សាជាមួយគ្រប់សហគមន៍សាសនាក្នុងស្រុកផងដែរ។
នៅអ៊ីរ៉ាក់ ប៉ុន្មានថ្ងៃចុងក្រោយនេះ អាមេរិកបានពង្រឹងការហោះហើរត្រួតពិនិត្យដែនដីអ៊ីរ៉ាក់ ដោយមានប្រើយន្តហោះដ្រូន និងយន្តហោះចំបាំងជាច្រើនគ្រឿង ក្នុងប្រតិបត្តិការត្រួតពិនិត្យនេះដែរ។ កងទ័ពអ៊ីរ៉ាក់ឯណោះវិញ បានប្រកាសថា បានកាន់កាប់ទាំងស្រុងនូវកន្លែងចំរាញ់ប្រេងមួយកន្លែង នៅក្រុងបៃជី ស្ថិតនៅភាគខាងជើងក្រុងបាកដាត បន្ទាប់ពីបានវាយប្រហារ២៤ម៉ោង ប្រឆាំងក្រុមជីហាត។ នេះជាជោគជ័យដ៏កម្ររបស់យោធាអ៊ីរ៉ាក់ ព្រោះថា កន្លងមក យោធាតែងបាក់ស្បាតរត់ចោលជួរ នៅចំពោះមុខការវាយលុករបស់ក្រុមជីហាត។
មកដល់ពេលនេះ ក្រុមជីហាតរដ្ឋអ៊ីស្លាមអ៊ីរ៉ាក់ បានដណ្តើមកាន់កាប់ដែនដីច្រើនកន្លែងក្នុងខេត្តចំនួន៤។ ក្រុមជីហាតក៏ដណ្តើមយកបានរោងចក្រផលិតអាវុធគីមីមួយកន្លែងផងដែរ ជារោងចក្រជំនាន់ លោកសាដាំហ៊ូសេន។ ប៉ុន្តែ អាមេរិកប្រាប់ថា ក្រុមជីហាតគ្មានលទ្ធភាពផលិតអាវុធគីមីទេ ព្រោះថា រោងចក្រនោះបានធ្លាក់ក្នុងសភាពទ្រុឌទ្រោម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ