អស្ថិរភាពនៅអ៊ីរ៉ាក់ធ្វើឲ្យតម្លៃប្រេងឆៅឡើងថ្លៃ
អ៊ីរ៉ាក់ដែលជាប្រទេសផលិតប្រេងធំបំផុតទីពីរក្នុងពិភពលោក បានកំពុងតែធ្វើឲ្យគេមានការព្រួយបារម្ភ ដោយសារក្រុមឧទ្ទាមជីហាតនិកាយស៊ុនីត កំពុងធ្វើការវាយលុកខ្លាំង នាប៉ុន្មានថ្ងៃចុងក្រោយនេះ។ ប្រការនេះបានធ្វើឲ្យតម្លៃប្រេងឆៅនៅលើទីផ្សារអន្តរជាតិ បានឡើងថ្លៃខ្ពស់គួរឲ្យព្រួយបារម្ភ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ស្ថានភាពនៅអ៊ីរ៉ាក់ កំពុងតែធ្វើឲ្យទីផ្សារប្រេងមានភាពរំជើបរំជួល។ ការវាយលុកកាន់តែខ្លាំងទៅៗ នៅប៉ុន្មានថ្ងៃមុននេះរបស់ពួកឧទាមនិកាយស៊ុនីត បានធ្វើឲ្យគេព្រួយបារម្ភអំពីស្ថិរភាពរបស់ប្រទេសផលិតប្រេងដ៏ធំមួយនេះ។ ក្រុមឧទ្ទាមបានវាយដេញចុះពីទិសខាងជើង ដេញមកកាន់តែកៀកក្រុងបាកដាត។ តំបន់អណ្តូងប្រេងKirkouk និងរោងចក្រចម្រាញ់ប្រេងដ៏ធំមួយ នៅក្បែរក្រុងបាកដាត អាចនឹងធ្លាក់ក្នុងកណ្តាប់ដៃរបស់ពួកឧទ្ទាម។
ទោះជាយ៉ាងណា យោងតាមសម្តីអ្នកវិភាគទីផ្សាររបស់ធនាគារCommerzBank តំបន់អណ្តូងប្រេងនៅភាគខាងត្បូងប្រទេស មិនទាន់មានការប៉ះពាល់នៅឡើយទេ។ ទំបន់នេះផលិតប្រេងឆៅស្មើនឹង៩០ភាគរយ នៃផលិតផលប្រេងសរុបរបស់អ៊ីរ៉ាក់។ លោកបន្តថា ទោះជាយ៉ាងនេះក្តី បើពិនិត្យមើលលើការកើនឡើងនៃតំម្លៃប្រេងពីរថ្ងៃកន្លងមកនេះ បង្ហាញឲ្យឃើញច្បាស់ថា ទីផ្សារប្រេងអន្តរជាតិមានការព្រួយបារម្ភ ដោយហេតុថាបើសិនជាអ៊ីរ៉ាក់មានបញ្ហា ហើយការនាំចេញប្រេងត្រូវបានរាំងស្ទះ នោះទីផ្សារពិភពលោកនឹងប្រឈមមុខនឹងកង្វះប្រេងឆៅដល់ទៅ២លាន៥សែនធុងបារីលក្នុងមួយថ្ងៃ។
ទោះជាយ៉ាងណាក៏ដោយ លោករដ្ឋមន្ត្រីក្រសួងថាមពលអ៊ីរ៉ាក់ បានអះអាងថាដំណើរការផលិត និងនាំចេញប្រេងនៅភាគខាងត្បូងប្រទេស គឺប្រព្រឹត្តទៅដោយរលូនជាធម្មតា គ្មានអ្វីរាំងស្ទះទេ។
សូមបញ្ជាក់ថា ប្រេងឆៅមួយធុងបារីលដែលមានតម្លៃ១១៣ដុល្លា១២សេននៅម៉ោង១០ព្រឹក ម៉ោងសកល បានឡើងដល់ ១១៤ដុល្លា៦៩សេននៅពេលរសៀល។ នេះគឺជាតម្លៃដ៏ខ្ពស់បំផុតមិនធ្លាប់មាន ចាប់តាំងពីខែកញ្ញា ២០១៣។ យោងតាមតួលេខរបស់អង្គការប្រទេសអ្នកនាំប្រេងចេញ ប្រទេសអ៊ីរ៉ាក់ម្នាក់ឯង ផលិតប្រេងបានជាង៣លានធុងបារីលក្នុងមួយថ្ងៃ។ អ៊ីរ៉ាក់ជាប្រទេសនាំប្រេងចេញ ច្រើនជាងគេបំផុតទីពីរលើពិភពលោក បន្ទាប់ពីប្រទេសអារ៉ាប៊ីសាអ៊ូឌីត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ