លោកហ្រ្វង់ស័រ ហូឡង់៖«បើខ្ញុំមិនអាចកាត់បន្ថយចំនួនអ្នកអត់ការងារធ្វើបានទេ ខ្ញុំនឹងមិនឈរឈ្មោះជាប្រធានាធិបតីអាណត្តិថ្មីឡើយ »
ដូចដែលបានគ្រោងទុក លោកប្រធានាធិបតីបារំាងហ្រ្វង់ស័រ ហូឡង់បានចូលខ្លួនឆ្លើយនឹងសំណួររបស់អ្នកកាសែត និងពលរដ្ឋបារំាងចំនួន ៥រូបកាលពីយប់ថ្ងៃព្រហស្បតិ៍ ទី៦ វិច្ឆិកានៅក្នុងទូរទស្សន៍ TF1។ បទអន្តរាគមន៍នេះបានរៀបចំឡើងនៅក្នុងពាក់កណ្តាលអាណត្តិនៃការកាន់តំណែងរបស់លោកហូឡង់។ នៅក្នុងកម្មវិធីសំណួរ ចម្លើយរយៈពេល ៩០នាទី លោកប្រមុខបារំាងដែលកំពុងមានប្រជាប្រិយភាពធ្លាក់ខ្លំាងបានព្យាយាមនិយាយពន្យល់បំភ្លឺ និងធានាចំពោះប្រជាពលរដ្ឋបារំាងដែលកំពុងបាត់បង់ជំនឿទុកចិត្តលើកម្មវិធីនយោបាយ សេដ្ឋកិច្ចរបស់រដ្ឋាភិបាលលោក។ ឆ្លើយនឹងសំណួរដែលថា តើលោកនឹងឈរឈ្មោះសម្រាប់អាណត្តិប្រធានាធិបតីថ្មីនៅឆ្នំា ២០១៧ ឬអត់?
ចុះផ្សាយនៅថ្ងៃ៖
ស្តាប់ - ០១:៤០
« នេះមិនមែនជាសំណួរដែលខ្ញុំបានចោទសួរនោះទេ តើវាមិនចម្លែកពេកទេដឹង?។ លោកមានបានឃើញទេ អត្រាប្រជាប្រិយភាពរបស់ខ្ញុំដែលកំពុងធ្លាក់ចុះខ្លំាងនោះ?។ ខ្ញុំគិតថា វាពិតជារឿងមួយបន្ទាន់ដែលត្រូវគិតគូរ និងដែលខ្ញុំសូមស្វាគមន៍ចំពោះសំណួរនេះ ក៏ប៉ុន្តែ ខ្ញុំមិនបានចោទសួរខ្លួនឯងទេថា តើនឹងត្រូវឈរឈ្មោះជាបេក្ខជនប្រធានាធិបតីអាណត្តិថ្មីនៅឆ្នំា ២០១៧ ឬក៏អត់?។ ខ្ញុំមិនមែនស្ថិតនៅទីនេះដើម្បីប្រកាសពីបេក្ខជនរបស់ខ្លួននោះទេ។ មានអ្នកខ្លះបានប្រកាសតំាងខ្លួនជាបេក្ខជនគ្រប់ពេល និងគ្រប់ផ្នែកទំាងអស់ ព្រមទំាងមានអ្នកខ្លះទៀតដែលធ្លាប់ជាបេក្ខជនម្តងហើយក៏ស្រាប់តែចង់ក្លាយខ្លួនជាបេក្ខជនម្តងទៀត។
ចំពោះខ្ញុំ ខ្ញុំជាប្រធានាធិបតី និងដែលនេះ ជាចំណុចខុសគ្នារវាងខ្ញុំ និងអ្នកដទៃ។ មានប្រធានាធិបតីតែម្នាក់ តែមានបេក្ខជនច្រើននាក់។
ខ្ញុំធ្លាប់បាននិយាយរួចហើយថា ឆន្ទៈ និងអាទិភាពរបស់ខ្ញុំ គឺការកាត់បន្ថយចំនួនអត់ការងារធ្វើ។ ប្រសិនបើខ្ញុំមិនអាចសម្រេចបាននៅមុនដំណាច់អាណត្តិរបស់ខ្ញុំទេ ខ្ញុំពិតជាមិនអាចទៅនិយាយប្រាប់ប្រជាពលរដ្ឋបារំាងថា ខ្ញុំមិនអាចធ្វើបានក្នុងរយៈពេល ៥ឆ្នំា ទេ តែសូមសន្យាថា នឹងសម្រេចឲ្យបានជាស្ថាពរនៅក្នុងអាណត្តិថ្មីរយៈពេល ៥ឆ្នំាទៀត។ នេះពិតជាអ្វីដែលខ្ញុំមិនអាចធ្វើទៅរួចទេ។ នៅពេលនោះ ប្រជាពលរដ្ឋបារំាងពិតជាហេតុផលត្រឹមត្រូវដើម្បីប្រឆំាង តវ៉ា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ