ទិវាគិលានុបដ្ឋាកអន្តរជាតិ ៖ គិលានុបដ្ឋាកធនធានដែលមិនអាចខ្វះបានសម្រាប់សុខភាព
ចុះផ្សាយនៅថ្ងៃ៖
ស្តាប់ - ០៨:០៦
ថ្ងៃទី ១២ ឧសភា ជាទិវាគិលានុបដ្ឋាកអន្តរជាតិ ! នៅឆ្នាំ២០១៤នេះ ពិភពលោកទាំងមូលបានប្រារព្ធទិវានេះ ក្នុងប្រធានបទ គិលានុបដ្ឋាក គិលានុបដ្ឋាយិកា ប្រមូលកម្លាំងដើម្បីការប្តូរផ្លាស់ ៖ ធនធានមនុស្សដែលមិនខ្វះបានសម្រាប់សុខភាព។ នាឱកាសនេះ កម្មវិធីសុខភាពរបស់វិទ្យុបារាំងអន្តរជាតិ សូមណែនាំលោកអ្នកនាងឱ្យបានស្គាល់អំពីអាជីព ដ៏លំបាក មិនសូវមានគេឱ្យតម្លៃ មិនសូវមានអ្នកចង់រៀន តែមានតម្រូវការទីផ្សារការងារឥតខ្វះនៅទូទាំងពិភពលោក និងជាការងារដ៏ចាំបាច់បំផុតក្នុងវិស័យវេជ្ជសាស្ត្រ និងសម្រាប់សង្គមជាតិ ដែលគ្មានអ្វីក្រៅពីអាជីពជា “គិលានុបដ្ឋាក- គិលានុបដ្ឋាយិកា”។
គ្រប់គ្នាសុទ្ធតែទទួលស្គាល់ថា សុខភាពរបស់បណ្តាជនទូទៅនៅលើពិភពលោក ពឹងផ្អែកយ៉ាងខ្លាំងលើសេវ៉ា របស់បុគ្គលិកថៃទាំ ដែលមានសមត្ថភាព សីលធម៌ ការគោរពស្រលាញ់ ទំនួលខុសត្រូវក្នុងភារកិច្ច។ ការងារថែទាំសុខភាព អាចចាត់ទុកមានគុណភាព សមត្ថភាព ត្រឹមត្រូវបាន ក៏អាស្រ័យផងដែរទៅលើបរិមាណនិងទម្ងន់ការងារសមស្រប។ គេមិនអាចហៅមជ្ឈមណ្ឌលសុខភាពមួយ មន្ទីរពេទ្យមួយ សេវ៉ាសុខភាពមួយថា ល្អប្រសើរបានទេ ប្រសិនបើគ្មានការត្រៀមរៀបចំ គ្មានគិលានុបដ្ឋាក ឬគិលានុបដ្ឋាយិកា គ្រប់គ្រាន់ គ្រប់ចំនួនបំរើការឱ្យ និងមានសមត្ថភាពទេនោះ។
គិលានុបដ្ឋាក គិលានុបដ្ឋាយិកា ជាតំណាងចង្ក្រោមអ្នកឯកទេសសុខភាពដ៏សំខាន់។ មានទំនាក់ទំនង យ៉ាងស្អិតរម្មួតជាមួយក្រុមអ្នកជំងឺ ជួនកាល ត្រូវប្រឈមមុននឹងអ្នកជំងឺតែម្នាក់ឯង គ្មានគ្រូពេទ្យវេជ្ជបណ្ឌិត នៅក្បែរទេ។ គិលានុបដ្ឋាក-គិលានុបដ្ឋាយិកា មានការទទួលខុសត្រូវខ្ពស់ណាស់ ក្នុងការជួយអ្នកជំងឺឱ្យមានសុខភាពប្រសើរឡើង និងជាអ្នកចូលរួមចំណែកសម្រេចកម្មវត្ថុសុខាភិបាលពិតៗ។
ក្នុងឱកាស ទិវាគិលានុបដ្ឋាកអន្តរជាតិឆ្នាំនេះ ពិភពលោកបំផុសឱ្យមហាជនទូទៅបានស្គាល់តម្លៃនៃអាជីពជា គិលានុបដ្ឋាក គិលានុបដ្ឋាយិកា។ អាជីពដ៏សំខាន់ និងលំបាក តែពុំមានតម្លៃ ដែលទីផ្សារការងារពិភពលោកកំពុងស្រេចឃ្លានចង់បាន និងត្រូវការជានិច្ច។ ហេតុដូច្នេះហើយបានជានៅឆ្នាំនេះ ពិភពលោកបានផ្តល់ប្រធានបទទិវាគិលានុបដ្ឋាកអន្តរជាតិ ថា "គិលានុបដ្ឋាកធនធានមិនអាចខ្វះបានសម្រាប់សុខភាព"។
អាជីពគិលានុបដ្ឋាក គិលានុបដ្ឋាយិកា មានសុខភាពល្អជាងគេ ព្រោះជាទូទៅត្រូវបានគេរាប់បញ្ចូលក្នុងបញ្ជីឈ្មោះមុខរបរដែលទីផ្សារការងារនៅធំទូលាយ តម្រូវការបុគ្គលិក មានច្រើនជាងអ្នកសុំ។ ក្នុងកំរិតពិភពលោក ធនធានមនុស្សក្នុងវិស័យនេះ កំពុងក្លាយជាចំណាប់អារម្មណ៍អង្គការសុខភាព ដែលត្រូវលើកតម្កើង និងពង្រឹងបានប្រសើរឡើង។ អ្នកមានឯកទេសក្នុងផ្នែកថែទាំវេជ្ជសាស្ត្រនេះ មិនព្រួយបារម្ភនឹងស្វែងរកទីផ្សារការងារឡើយ ប៉ុន្តែជាអាជីពនេះមិនទាក់ទាញសិស្សនិស្សិតសោះ។
ហេតុអ្វីបានជាយុវជន យុវនារី មិនសូវចង់ក្លាយជាគិលានុបដ្ឋាក គិលានុបដ្ឋាយិកា ? ព្រោះជាការងារដែលល្បីថាមានលក្ខខណ្ឌការងារលំបាក ! មិនសូវមានគេឱ្យតម្លៃ ឬមិនសូវមានតម្លៃ និងគ្មានការជឿនលឿនផ្នែកវិជ្ជាជីវៈ។ តើគំនិតទាំងបីនេះត្រឹមត្រូវដែរឬទេ ?
- មានលក្ខខណ្ឌការងារ លំបាក ៖ ដើម្បីអាចធានាសេវាកម្ម ២៤ ម៉ោង លើ២៤ម៉ោង នៅតាមមន្ទីរពេទ្យ គ្លីនិក ឬមណ្ឌលសុខភាព គិលានុបដ្ឋាក គិលានុបដ្ឋាយិកា ត្រូវធ្វើការ ជាញឹកញយ ទាំងយប់ទាំងថ្ងៃ គ្មានសៅរ៍ គ្មានអាទិត្យ គ្មានថ្ងៃបុណ្យទេ។ បុគ្គលិក ត្រូវតែបង្ខំចិត្តគោរពតាមកាលវិភាគការងារតម្រូវឱ្យ ជាពិសេសសម្រាប់ គិលានុបដ្ឋាក គិលានុបដ្ឋាយិកា ទើបចាប់ផ្តើមការងារដំបូង។ ធ្វើជាគិលានុបដ្ឋាក គិលានុបដ្ឋាយិកា គឺក៏ជាអ្នកត្រូវប្រឈមនឹងសេចក្តីស្លាប់ជារៀងរាល់ថ្ងៃ តែក៏ជាមុខរបរមួយប្រកបដោយជំនក់ចិត្ត ព្រោះអ្នកជំងឺភាគច្រើនតែងតែដឹងគុណចំពោះកាយវិការនិងការងារថែទាំរបស់គិលានុបដ្ឋាក។
- មានប្រាក់ចំណូល -ប្រាក់ខែ ទាប ៖ មិនបាច់ប្រៀបទៅនឹងគ្រូពេទ្យធំ ដុកទ័រ វេជ្ជបណ្ឌិតឯកទេសទេ សូម្បីតែជាមួយបុគ្គលិកកម្មករធម្មតា ក៏អ្នកជាគិលានុបដ្ឋាក គិលានុបដ្ឋាយិកា ទទួលបានប្រាក់បៀវត្សរ៍តិចតួចណាស់ ព្រោះថាកំរិតកាំប្រាក់ខែ ត្រូវតែទាប ដោយសារតួនាទីជាគិលានុបដ្ឋាកនេះ មានសញ្ញាប័ត្រទាប អាចរៀនចប់ថា្នក់ទុទិយភូមិ បូកនឹងការបំពាក់បំប៉ន បីឆ្នាំ។
- ប៉ុន្តែគំនិតដែលគិតថា រៀនធ្វើគិលានុបដ្ឋាក គ្មានការជឿនលឿនវិជ្ជាជីវៈនិងចំណេះដឹង ជាការយល់ខុសទាំងស្រុង។ ជាមួយនឹងបទពិសោធន៍ការងារ និងឆន្ទៈគិលានុបដ្ឋាក គិលានុបដ្ឋាយិកា អាចបន្តការសិក្សា យកឯកទេស និងយកសញ្ញាប័ត្របន្ថែមឱ្យខ្ពស់ជាងថានៈជាគិលានុបដ្ឋាក ដូចការពន្យល់បំភ្លឺរបស់លោកវេជ្ជបណ្ឌិត គីន ប៊ន់អាងអំបាញ់មិញស្រាប់ ថាគេអាចយកសញ្ញាប័ត្របរិញ្ញា ក្នុងផ្នែកអមវេជ្ជសាស្ត្រ ឬប្តូរឯកទេសទាំងស្រុងដោយងាកមកសិក្សាផ្នែកវេជ្ជសាស្ត្រតែម្តង សម្រាប់អ្នកមានសេចក្តីក្លាហាន ស្រលាញ់និងចូលចិត្តអាជីពជាគ្រូពេទ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ