ឥណ្ឌូណេស៊ី៖ និស្សិតម្នាក់ស្លាប់ នៅក្នុងបាតុកម្មប្រឆាំងនឹងកំណែទម្រង់ច្បាប់ព្រហ្មទណ្ឌ
នៅឥណ្ឌូណេស៊ី ពីថ្ងៃព្រហស្បតិ៍ ទី២៦កញ្ញា មាននិស្សិតម្នាក់ ស្លាប់ នៅក្នុងការប៉ះទង្គិចគ្នាដោយហិង្សាជាមួយនឹងប៉ូលីសបង្ក្រាបបាតុករ។ នៅឥណ្ឌូណេស៊ី តាមបណ្តាក្រុងធំៗ ប្រជាជននិងសិស្សនិស្សិតរាប់រយនាក់ បានក្រោកឈរតវ៉ា ប៉ុន្មានថ្ងៃៗជាប់គ្នា ដោយសារតែការមិនសប្បាយចិត្ត ចំពោះកំណែទម្រង់ច្បាប់ថ្មី ដែល«តឹងតែងខ្លាំងជ្រុល»។ សេចក្តីព្រាងច្បាប់ថ្មី គឺមានដាក់ទោសព្រហ្មទណ្ឌ ចាប់ដាក់គុក ចំពោះជនណាដែលរួមភេទដូចគ្នា និងអ្នកដែលរួមភេទក្រៅចំណងអាពាហ៍ពិពាហ៍ ហើយនិងហាមប្រាមកុំឱ្យជេរប្រមាថថ្នាក់ដឹកនាំប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
បុរសជនរងគ្រោះ គឺជានិស្សិតវ័យ២១ឆ្នាំ។ នគរបាលឥណ្ឌូណេស៊ី បញ្ជាក់ថា យុវនិស្សិតរូបនេះ ពិតជាស្លាប់មែនដោយសារតែរបួសដើមទ្រូងធ្ងន់ធ្ងរ ហូរឈាមខ្លាំង និងថាគេបានដឹករូបគាត់ដល់មន្ទីរពេទ្យដែរ តែពុំអាចជួយសង្គ្រោះទាន់ពេល ដ្បិតដង្ហើមរបស់គាត់ បានផុតរលត់បាត់ទៅហើយ។ ទោះយ៉ាងណា សមត្ថកិច្ច បានបដិសេធថា ការស្លាប់នេះ ពុំមែនបណ្តាលមកពីត្រូវគ្រាប់កាំភ្លើងនោះទេ។ ប៉ុន្តែ តាមសាក្សីខ្លះដែលសរសេរនៅក្នុងបណ្តាញសង្គម បានអះអាង ជនកម្សត់នេះ ស្លាប់ ដោយសារតែត្រូវប៉ូលីសបាញ់។
មរណភាពនេះ គឺករណីទីមួយ ដែលប៉ូលីសបញ្ជាក់ថាស្លាប់ ប៉ុន្តែនៅមានបាតុកររបួស ជាសិបច្រើននាក់ផ្សេងទៀត ដោយសារតែការបង្ក្រាបដ៏ហិង្សារបស់កងសមត្ថកិច្ចឥណ្ឌូណេស៊ី។ គិតមកត្រឹមព្រឹកថ្ងៃព្រហស្បតិ៍ មានសិស្សនិស្សិត ប្រមាណ៥០០នាក់ ត្រូវនរបាលចាប់ឃាត់ខ្លួន។ «យុវជនអ្នកតវ៉ាខ្លះ បានប្រើហិង្សា និងនាំគ្នាចូលទៅក្នុងរដ្ឋសភានៅតំបន់ភាគអាគ្នេហ៍នៃផ្ទៃប្រទេស ហើយសភាជាន់ទាបក្នុងតំបន់នេះ ត្រូវភ្លើងឆេះ»។ នេះបើតាមប្រភពពីអាជ្ញាធរឥណ្ឌូណេស៊ី។
នៅឥណ្ឌូណេស៊ី អ្នកការពារសិទ្ធិមនុស្ស និងសិស្សនិស្សិត បាននាំគ្នាបាតុកម្ម ពេញមួយសប្តាហ៍មកហើយនេះ ដើម្បីប្រឆាំងនឹងកំណែទម្រង់ច្បាប់ថ្មី និងការធ្វើវិសោធនកម្មក្រមព្រហ្មទណ្ឌ។ តាមពង្រាងនៃកំណែទម្រង់ច្បាប់នេះ គឺមានការចែងពីការដាក់ទោសព្រហ្មទណ្ឌ ចាប់ដាក់គុក ចំពោះអ្នករួមភេទក្រៅចំណងអាពាហ៍ពិពាហ៍ ហើយនិងចំពោះអ្នករួមភេទដូចគ្នា ក៏ត្រូវមានទោសព្រហ្មទណ្ឌដែរ។ តាមយោបល់របស់ក្រុមបាតុករ ពង្រាងច្បាប់ថ្មី ដូច្នេះ គឺជាការ«សម្លាប់សេរីភាព»។ គួរជ្រាបថា សេចក្តីព្រាងច្បាប់ថ្មី ក៏មានចែងដែរ ពីការហាមមិនឱ្យជេរប្រមាថ ប្រធានាធិបតី និងអនុប្រធានាធិបតី។
ការតវ៉ាប្រឆាំងរបស់ក្រុមនិស្សិត មិនមែនត្រឹមតែរឿងប៉ុណ្ណេះទេ គឺពួកគេក៏បានសម្តែងថ្លែងក្តីមិនសប្បាយចិត្តចំពោះអង្គភាពប្រឆាំងអំពើពុករលួយ ដែលជាស្ថាប័នជាតិមួយត្រូវគេគោរព តែអង្គភាពនេះ មិនហ៊ានបើកការស៊ើបអង្គេតចំពោះមន្ត្រីរដ្ឋាភិបាល ដែលប្រព្រឹត្តរឿងពុករលួយ។
ប្រឈមមុខនឹងការរិះគន់ខ្លាំងពេក ប្រធានាធិបតីឥណ្ឌូណេស៊ី លោក ចូកូ វីដូដូ បានសម្រេចឱ្យលើកពេលពិចារណាចំពោះវិសោធនកម្មក្រមព្រហ្មទណ្ឌ ទៅខែតុលាវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ