ដើម្បីប្រយោជន៍សន្តិសុខផ្ទាល់ខ្លួន អ៊ីស្រាអែលធ្វើគ ធ្វើថ្លង់មិនលឺការអំពាវនាវរបស់អន្តរជាតិ
ការវាយប្រហារទៅលើសាលារៀនរបស់អង្គការសហប្រជាជាតិនៅតំបន់ហ្កាហ្សាដែលបានសម្លាប់មនុស្សជាង១០នាក់ កាលពីថ្ងៃអាទិត្យ ទី ៣សីហា បានជំរុញឲ្យមានសហគមន៍អន្តរជាតិមិនពេញចិត្តជាថ្មី។ បារាំង និងអង់គ្លេសបានទាមទារឲ្យមានបទឈប់បាញ់បន្ទាន់មួយ ចំណែកប្រទេសចិនវិញបានអំពាវនាវឲ្យអ៊ីស្រាអែលបញ្ឈប់ការវាយប្រហារទៅលើតំបន់ហា្កហ្សា។
ចុះផ្សាយនៅថ្ងៃ៖
ស្តាប់ - ០២:០៣
នៅក្នុងទីក្រុងគែរ ប្រទេសអេហ្ស៊ីប ជាទីដែលមានកិច្ចប្រជុំដើម្បីបទឈប់បាញ់នៅតំបន់ហ្កាហ្សា លោកវ៉ាង យីរដ្ឋមន្រ្តីការបរទេស ដែលបានចូលជួបរដ្ឋមន្រ្តីការបរទេសអេហ្ស៊ីប បានអំពាវនាវឲ្យអ៊ីស្រាអែលឈប់ជាបន្ទាន់ ការវាយប្រហារតាមផ្លូវអាកាស និងជើងគោក ដែលរហូតមកដល់ពេលនេះបានសម្លាប់មនុស្សភាគច្រើនជាជនស៊ីវិល។ ថ្លែងនៅក្នុងឱកាសសន្និសីតកាសែត ប្រមុខការបរទេសចិនបានប្រាប់ទៅអ៊ីស្រាអែលឲ្យដកចេញបម្រាម បិទខ្ទប់ដែលអ៊ីស្រាអែលដាក់ទៅលើតំបន់ហ្កាហ្សា តំាងពីឆ្នាំ២០០៦។ សម្រាប់ភាគីហាម៉ាសវិញ រដ្ឋមន្រ្តីការបរទេសចិនបានអំពាវនាវឲ្យពួកគេឈប់បាញ់គ្រាប់រ៉ុកកែត ដែលជាមូលហេតុញុះញង់ឲ្យអ៊ីស្រាអែលវាយប្រហារទៅលើតំបន់ហ្កាហ្សា។
លោកប្រធានាធិបតីបារាំង ហ្វ្រង់ស័រ ហូឡង់ដែលចូលរួមប្រារព្ធខួប១០០ឆ្នាំនៃថ្ងៃអាល្លឺម៉ង់ប្រកាសសង្រ្គាមជាមួយបារាំង បានអំពាវនាវផងដែរឲ្យភាគីជម្លោះទាំងពីរបង្កើតបទឈប់បាញ់មួយជាបន្ទាន់។ ដោយលើកឧទាហរណ៍សង្រ្គាមបារាំងនិងអាល្លឺម៉ង់ លោកប្រធានាធិបតីបារាំងបានបញ្ជាក់ថា ឆន្ទៈអាចធ្វើឲ្យប្រទេសពីរធ្លាប់ជាសត្រូវនឹងគ្នានោះ អាចក្លាយជាមិត្តនឹងគ្នាវិញ។
តាមរដ្ឋមន្រ្តីការបរទេសថ្មីរបស់អង់គ្លេស ការវាយប្រហារទៅលើសាលារៀនដែលជាជំរកភៀសខ្លួនរបស់អង្គការសហប្រជាជាតិ កាលពីថ្ងៃអាទិត្យបានធ្វើឲ្យមានមតិជាច្រើនប្រឆាំងនឹងអ៊ីស្រាអែល។ លោកហ្វីលីព ហាម៉ុន បារម្ភថា សង្រ្គាមវាយប្រហាររបស់អ៊ីស្រាអែលដែលសម្លាប់ប្រជាជនប៉ាឡេស្ទីននៅហ្កាហ្សានឹងធ្វើឲ្យចលនាស្អប់ប្រជាជនជ្វីហ្វកើនឡើង នៅក្នុងប្រទេសអង់គ្លេស។
អ៊ីស្រាអែលដែលមិនខ្វល់នឹងការអំពាវនាវរបស់អន្តរជាតិ បានបដិសេធ មិនបញ្ជូនអ្នកតំណាងរបស់ខ្លួនទៅចូលរួមនៅក្នុងកិច្ចពិភាក្សាស្វែងរកបទឈប់បាញ់ នៅក្នុងប្រទេសអេហ្ស៊ីប។ នៅថ្ងៃអាទិត្យ អ៊ីស្រាអែលដែលប្រកាសដកទ័ពមួយចំនួនពីភាគខាងជើងហ្កាហ្សា ចាប់ផ្តើមពង្រាយទ័ពរបស់ខ្លួននៅក្នុងតំបន់ភាគខាងកើតហ្កាហ្សា ដែលស្ថិតក្បែរទៅព្រំដែនអ៊ីស្រាអែល។
កាលពីថ្ងៃសៅរ៍ នាយករដ្ឋមន្រ្តីអ៊ីស្រាអែលបានលើកឡើងថា នៅក្នុងរយៈពេលវែង តំបន់(ភាគខាងជើង)ហ្កាហ្សា ដែលត្រូវទាហានអ៊ីស្រាអែលបោសសម្អាតរួចហើយនោះ នឹងគ្មានសិទ្ធិសាងសង់ផ្ទះសម្បែងឡើងវិញ ដរាបណាគ្មានកិច្ចព្រមព្រៀងអន្តរជាតិ ដែលបញ្ជាក់ពីការដកអាវុធ ដកទាហានពីតំបន់ហ្កាហ្សា។ បើតំបន់ហ្កាហ្សានៅតែចចេស មានការតស៊ូអាវុធ នោះអ៊ីស្រាអែលនឹងហាមមិនឲ្យគេដឹកស៊ីម៉ង់ និងដែកចូលហ្កាហ្សា ដែលពួកហាម៉ាសអាចយកទៅប្រើដើម្បីសង់រូងក្រោមដី ដើម្បីវាយប្រហារអ៊ីស្រាអែលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ