សាកសពនារីរងគ្រោះដោយក្រុមជនពាលរំលោភត្រូវបានបូជានៅឥណ្ឌា
សាកសពយុវនារីឥណ្ឌា ដែលរងគ្រោះដោយត្រូវក្រុមជនពាលរំលោភលើរថយន្តក្រុង ហើយដែលបានទទួលមរណភាពក្នុងមន្ទីរពេទ្យសិង្ហបុរី កាលពីព្រឹកព្រលឹមថ្ងៃសៅរ៍ ម្សិលមិញ ត្រូវបានគេធ្វើពិធីបូជា នៅថ្ងៃអាទិត្យនេះ នៅទីក្រុងញូវដេលី។ ប៉ូលិសរាប់ពាន់នាក់ នៅតែស្ថិតក្នុងសភាពប្រុងជើងការ ហើយក្រុមបាតុករនៅតែបន្តប្រមូលផ្តុំគ្នា នៅក្នុងទីក្រុងញូវដេលី ក៏ដូចជា នៅតាមបណ្តាក្រុងមួយចំនួនផ្សេងទៀត ដើម្បីដាក់សម្ពាធដល់រដ្ឋាភិបាលឲ្យចាត់វិធានការតឹងរ៉ឹងចំពោះបទឧក្រិដ្ឋ ដែលប្រព្រឹត្តលើស្រ្តីឥណ្ឌា។
ចុះផ្សាយនៅថ្ងៃ៖
ស្តាប់ - ០២:៤៦
សពយុវនារីរងគ្រោះ ដោយបទឧក្រិដ្ឋរំលោភជាក្រុម យ៉ាងព្រៃផ្សៃ ដែលបណ្តាលឲ្យកក្រើករញ្ជួយពេញប្រទេសឥណ្ឌាប៉ុន្មានថ្ងៃមកហើយនោះ ត្រូវបានគេបូជា នៅព្រឹកថ្ងៃអាទិត្យនេះ នៅក្នុងពិធីដែលស្ថិតក្រោមការរក្សាសន្តិសុខយ៉ាងតឹងរ៉ឹងបំផុត។
នារីរងគ្រោះ ដែលជានិស្សិតពេទ្យ វ័យ ២៣ឆ្នាំ ប៉ុន្តែ មិនត្រូវបានគេស្គាល់ឈ្មោះពិត ហើយផ្តល់រហស្សនាមថា “បុត្រីឥណ្ឌា” បានទទួលមរណភាព នៅក្នុងមន្ទីរពេទ្យប្រទេសសិង្ហបុរី កាលពីព្រឹកព្រលឹមថ្ងៃសៅរ៍ ហើយសាកសពរបស់នាងត្រូវបានដឹកតាមយន្តហោះពិសេសរបស់រដ្ឋាភិបាលឥណ្ឌា មកដល់ទីក្រុងញូវដេលី នៅព្រឹកព្រលឹមថ្ងៃអាទិត្យ។ មេដឹកនាំកំពូលៗរបស់ឥណ្ឌា រួមមានលោកនាយករដ្ឋមន្រ្តី ម៉ាន់ម៉ូហាន់ ស៊ិង និងលោកស្រី សូនីញ៉ា គន្ធី (Sonia Gandhi) ដែលជាប្រធានគណបក្សកាន់អំណាចឥណ្ឌា មានវត្តមាននៅឯព្រលានយន្តហោះញូវដេលី ដើម្បីទទួលសាកសពនារីរងគ្រោះ និងជួបរំលែកទុក្ខដល់ក្រុមគ្រួសារ។
ពិធីបូជាសពត្រូវបានធ្វើឡើងជាលក្ខណៈឯកជន ដោយអនុញ្ញាតឲ្យមានតែក្រុមគ្រួសារ មិត្តភ័ក្តិ និងមន្រ្តីអាជ្ញាធរប៉ុណ្ណោះ ដែលអាចចូលរួមក្នុងពិធីនេះបាន។ ក៏ប៉ុន្តែ ក្រុមបាតុកររាប់ពាន់នាក់នៅតែបានជម្នះបម្រាមរបស់អាជ្ញាធរ ហើយប្រមូលផ្តុំគ្នា នៅកណ្តាលក្រុងញូវដេលី ក៏ប៉ុន្តែ ជាការប្រមូលផ្តុំគ្នាដោយសន្តិវិធី ដើម្បីចូលរួមកាន់ទុក្ខយុវនារីរងគ្រោះ។ ក្នុងពេលជាមួយគ្នា កំហឹងរបស់បណ្តាជនឥណ្ឌាចំពោះអាជ្ញាធរនៅតែឆាបឆេះ ដោយពួកគេចោទអាជ្ញាធរថា មិនគិតគូរពីសុវត្ថិភាពរបស់ស្រ្តីឥណ្ឌា។ ក្រុមបាតុករខ្លះបានលើកបដា និងស្រែកទាមទារឲ្យរដ្ឋាភិបាលចាត់វិធានការឲ្យបានតឹងរ៉ឹងចំពោះអំពើរំលោភសេពសន្ថវៈ ដោយខ្លះទាមទារឲ្យដាក់ទោសប្រហារជីវិតលើជនល្មើស។
នៅឥណ្ឌា អំពើរំលោភសេពសន្ថវៈតែងតែកើតមានជាញឹកញាប់ ហើយភាគច្រើន ជនល្មើសមិនត្រូវបានគេយកមកផ្តន្ទាទោសនោះទេ។ សម្ពាធពីអាជ្ញាធរ ពីក្រុមគ្រួសារ និងពីសង្គម ធ្វើឲ្យស្រ្តីរងគ្រោះដោយអំពើរំលោភ ត្រូវបង្ខំចិត្តនៅស្ងៀម មិនដាក់ពាក្យបណ្តឹង ដោយខ្លាចទទួលភាពអាម៉ាស និងប៉ះពាល់ដល់កិត្តិយសគ្រួសារ។ ក៏ប៉ុន្តែ ភាពព្រៃផ្សៃ នៃអំពើរំលោភ ដែលក្រុមជនពាលទាំង ៦នាក់ បានប្រព្រឹត្តទៅលើយុវនារីនិស្សិតពេទ្យ កាលពីថ្ងៃទី១៦ ធ្នូ នេះ បានធ្វើឲ្យបណ្តាជនឥណ្ឌាផ្ទុះកំហឹង ទប់លែងបាន ហើយចេញមុខតវ៉ាទាមទារឲ្យមានការផ្លាស់ប្តូរផ្នត់គំនិតដ៏ចាស់គំរឹលនេះចេញ។
ស្ថិតក្រោមសម្ពាធរបស់ក្រុមបាតុករ លោកនាយករដ្ឋមន្រ្តីម៉ាន់ម៉ូហាន់ ស៊ិង បានសន្យាថានឹងបង្កើនទម្ងន់ទោសលើជនល្មើស ដែលប្រព្រឹត្តអំពើរំលោភសេពសន្ថវៈ។ ចាប់ពីពេលនេះទៅ ឧក្រិដ្ឋជនណា ដែលត្រូវតុលាការផ្តន្ទាទោសពីបទរំលោភសេពសន្ថវៈ ក្រៅពីការទទួលទោសដែលមានចែងក្នុងច្បាប់ព្រហ្មទណ្ឌ រូបថត ឈ្មោះ និងអាសយដ្ឋានរបស់ពួកគេនឹងត្រូវចុះផ្សាយជាសាធារណៈ លើទំព័រវិបសៃត៍របស់រដ្ឋ។
គួរបញ្ជាក់ផងដែរថា ឧក្រិដ្ឋជនទាំង ៦រូប ដែលបានរំលោភយុវនារីនិស្សិតពេទ្យ សុទ្ធតែត្រូវបានចាប់ខ្លួន ហើយត្រូវបានតុលាការចោទប្រកាន់ពីបទឃាតកម្ម។ ក្នុងចំណោមជនល្មើសទាំង ៦នាក់ មាន ៣នាក់ បានឆ្លើយសារភាពទទួលកំហុស ក្នុងនោះ មានម្នាក់បានស្នើសុំទទួលទោសប្រហារជីវិត ដោយព្យួរ ក ដើម្បីឲ្យសក្តិសមនឹងកំហុសរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ