ឥណ្ឌានឹងបន្តរុករកប្រេងក្នុងសមុទ្រចិនខាងត្បូងតាមកិច្ចសន្យាជាមួយវៀតណាម
ក្រុមហ៊ុនប្រេងរបស់ឥណ្ឌាគ្រោងបន្តសហការជាមួយវៀតណាម ក្នុងការរុករកប្រេង នៅក្នុងសមុទ្រចិនខាងត្បូង ដែលជាតំបន់ជាប់ជម្លោះ រវាងវៀតណាម និងចិន។ នេះបើតាមការផ្សាយរបស់ទីភ្នាក់ងារព័ត៌មានមួយឈ្មោះ Dow Jones Newswires កាលពីថ្ងៃព្រហស្បតិ៍ម្សិលមិញ។ ការសម្រេចរបស់ឥណ្ឌានេះ ទំនងជានឹងត្រូវប្រឈមមុខជាមួយនឹងចិន ដែលទើបនឹងប្រកាសដាក់ដេញថ្លៃឲ្យក្រុមហ៊ុនអន្តរជាតិ មករុករក និងធ្វើអាជីវកម្មប្រេង នៅក្នុងប្លុកដែលឥណ្ឌាគ្រោងរុករកនេះ។
ចុះផ្សាយនៅថ្ងៃ៖
ស្តាប់ - ០២:០៦
ប្រសិនបើពិតដូចការផ្សាយរបស់ Dow Jones Newswires កាលពីម្សិលមិញនេះមែន មានន័យថា ឥណ្ឌាបានផ្លាស់ប្តូរជំហររបស់ខ្លួន ខុសពីប៉ុន្មានខែមុន ដែលបានប្រកាសថា ក្រុមហ៊ុនឥណ្ឌានឹងបញ្ឈប់ការរុករកប្រេង នៅក្នុងប្លុក ១២៨ របស់វៀតណាមទៀតហើយ។
គួរបញ្ជាក់ថា វៀតណាមបានប្រគល់សិទ្ធិឲ្យក្រុមហ៊ុនប្រេងរបស់ឥណ្ឌា ធ្វើការរុករក និងធ្វើអាជីវកម្មប្រេង នៅក្នុងប្លុកចំនួនពីរ នៅក្នុងសមុទ្រចិនខាងត្បូង គឺប្លុក១២៧ និងប្លុក១២៨ តាំងពីឆ្នាំ២០០៦។ ក៏ប៉ុន្តែ កាលពីឧសភាកន្លងទៅនេះ រដ្ឋាភិបាលឥណ្ឌាបានប្រកាសថា ក្រុមហ៊ុនឥណ្ឌានឹងបញ្ឈប់ការរុករកប្រេង នៅប្លុក ១២៨ ក្នុងហេតុផលថា ការធ្វើអាជីវកម្មប្រេងនៅក្នុងប្លុកនេះអាចមិនផ្តល់ផលចំណេញ។
មួយខែក្រោយមក ពោលគឺ នៅខែមិថុនា ស្រាប់តែចិនបានប្រកាសដាក់ដេញថ្លៃជាអន្តរជាតិ ឲ្យក្រុមហ៊ុនប្រេងចូលមករុករក និងធ្វើអាជីវកម្មប្រេង នៅក្នុងប្លុកចំនួន ៩ ក្នុងតំបន់ជាប់ជម្លោះជាមួយវៀតណាម ហើយក្នុងនោះ ក៏មានប្លុក ១២៨ ដែលឥណ្ឌាទើបនឹងសម្រេចបញ្ឈប់ការរុករកប្រេងនេះដែរ។
វៀតណាមបានធ្វើការតវ៉ាចំពោះការប្រកាសដាក់ដេញថ្លៃប្លុកប្រេងទាំង ៩ ធ្វើឡើងដោយចិននេះ ដោយលើកឡើងថា ប្លុកប្រេងទាំងនេះ ស្ថិតក្នុងរង្វង់ ២០០ miles ពីឆ្នេររបស់វៀតណាម ដូច្នេះ គឺស្ថិតក្នុងតំបន់សេដ្ឋកិច្ចផ្តាច់មុខរបស់វៀតណាម ដោយយោងទៅតាមអនុសញ្ញាអ.ស.ប. ស្តីពីច្បាប់សមុទ្រ។ វៀតណាមបានអំពាវនាវកុំឲ្យក្រុមហ៊ុនបរទេសចូលរួមក្នុងការដេញថ្លៃនេះ។
ឥណ្ឌាបានផ្លាស់ប្តូរជំហរ ហើយសម្រេចបន្តការរុករកប្រេងនៅប្លុក ១២៨នេះវិញ ដោយសារតែវៀតណាមបានបន្ធូរបន្ថយលក្ខខណ្ឌ ដែលមានអំណោយផលជាងមុន។ ក៏ប៉ុន្តែ ក្នុងពេលជាមួយគ្នា ការសម្រេចរបស់ឥណ្ឌានេះ មើលទៅ គឺមានលក្ខណៈជាការប្រឈមមុខដោយចំហជាមួយចិន នៅក្នុងសមុទ្រចិនខាងត្បូង។
គេសង្កេតឃើញថា ចាប់តាំងពីចិនប្រកាសដាក់ដេញថ្លៃប្លុកប្រេង ដែលជាប់ជម្លោះជាមួយវៀតណាម ហើយដែលឥណ្ឌាធ្លាប់ទទួលសិទ្ធិរុករក និងធ្វើអាជីវកម្ម ឥណ្ឌាហាក់ដូចជាបានចាប់ផ្តើមដំឡើងសំឡេងរបស់ខ្លួន ជុំវិញជម្លោះសមុទ្រចិនខាងត្បូង។ ជាទូទៅ ទាក់ទងនឹងជម្លោះសមុទ្រចិនខាងត្បូង ឥណ្ឌាតែងតែអំពាវនាវត្រឹមតែឲ្យមានការគោរព “សិទ្ធិសេរីភាព ក្នុងការធ្វើនាវាចរណ៍” តែប៉ុណ្ណោះ។ ក៏ប៉ុន្តែ នៅក្នុងកិច្ចប្រជុំអាស៊ាន នៅភ្នំពេញ កាលពីសប្តាហ៍កន្លងទៅនេះ ឥណ្ឌាបានទាមទាររហូតដល់ទៅ “សិទ្ធិក្នុងការធ្វើអាជីវកម្មធនធានធម្មជាតិ ស្របទៅតាមគោលការណ៍ច្បាប់អន្តរជាតិ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ