ទិវាបុណ្យឯករាជ្យជាតិខួបលើកទី៥៩ឆ្នាំប្រារព្ធឡើងចំពេលព្រះមហាវីរក្សត្រយាងចូលទិវង្គត
ថ្ងៃ៩វិច្ឆិកាឆ្នាំ១៩៥៣- ថ្ងៃ៩វិច្ឆិកាឆ្នាំ២០១២ នៅឆ្នាំនេះ ជាខួបលើកទី៥៩ នៃទិវាបុណ្យឯករាជ្យជាតិដែលព្រះករុណាព្រះមហាវីរក្សត្រ សម្តេចព្រះ នរោត្តម សីហនុបានធ្វើព្រះរាជបូជនីយកិច្ច ដោយលះបង់ទាំងកម្លាំងព្រះកាយពល និងទាំងកម្លាំងព្រះបញ្ញាញាណ ដើម្បីទាមទារឯករាជ្យពេញបូរិបូណ៍ពីបារាំង ជូនជាតិមាតុភូមិ។ ក៏ប៉ុន្តែទិវាបុណ្យឯករាជ្យជាតិ ដែលបានធ្វើឡើងនៅវិមានឯករាជ្យ ក្នុងទីក្រុងភ្នំពេញ នៅព្រឹកមិញ មិនមានព្រះរាជវត្តមានរបស់ព្រះមហាក្សត្រ សម្តេចព្រះ នរោត្តម សីហមុនី ដូចរៀងរាល់ឆ្នាំទេ។ មូលហេតុ មកពីព្រះមហាវីរក្សត្រ សម្តេចព្រះ នរោត្តម សីហនុ ទើបតែយាងចូលទិវង្គត កាលពីថ្ងៃទី១៥តុលា ។ យ៉ាងណាក៏ដោយ ពិធីបុណ្យឯករាជ្យជាតិ នៅព្រឹកមិញ បានប្រារព្ធឡើង ក្រោមអធិបតីភាពរបស់លោក ហេង សំរិន ប្រធានរដ្ឋសភា និងមន្ត្រីអ្នកមុខអ្នកការ សិស្សានុសិស្ស រួមទាំងកងកម្លាំងប្រដាប់អាវុធជាច្រើននាក់ផ្សេងទៀត។
ចុះផ្សាយនៅថ្ងៃ៖
ស្តាប់ - ០២:២៥
ពិធីបុណ្យឯករាជ្យជាតិ ថ្ងៃ៩វិច្ឆិកា ត្រូវបានប្រារព្ធឡើងយ៉ាងអធិកអធមជារៀងរាល់ឆ្នាំ ក្រោមព្រះរាជាធិបតីភាពដ៏ខ្ពង់ខ្ពស់របស់ព្រះមហាក្សត្រ និងវត្តមានរបស់ប្រមុខដឹកនាំរដ្ឋាភិបាល រដ្ឋសភា ព្រឹទ្ធសភា នាហ្មឺនសព្វមុខមន្ត្រី ព្រមទាំងមហាជនយ៉ាងច្រើនកុះករ នៅវិមានឯករាជ្យ ក្នុងទីក្រុងភ្នំពេញ។
ទិវាបុណ្យឯករាជ្យជាតិ ត្រូវបានប្រារព្ធឡើង ដើម្បីរំលឹកដល់ស្នាព្រះហស្ដរបស់សម្តេចព្រះ នរោត្តម សីហនុ ដែលព្រះអង្គបានដឹកនាំធ្វើព្រះរាជបូជនីយកិច្ច ដណ្តើមឯករាជ្យភាពពេញលេញពីប្រទេសបារាំង។ បារាំង បានធ្វើជាអាណាព្យាបាលកម្ពុជាចាប់តាំងពីឆ្នាំ១៨៦៣ ដល់ថ្ងៃទី៩វិច្ឆិកា ឆ្នាំ១៩៥៣។
ក៏ប៉ុន្តែនៅថ្ងៃ៩វិច្ឆិកា ថ្ងៃនេះ គម្រប់ខួប ៥៩ ឆ្នាំ ទិវាបុណ្យឯករាជ្យជាតិ ប្រារព្ធឡើងរាងសោះកក្រោះ។ នោះក៏មកពីអតីតព្រះមហាក្សត្រ សម្តេចព្រះ នរោត្តម សីហនុ ទើបតែយាងចូលទិវង្គត កាលពីថ្ងៃទី១៥តុលា ឆ្នាំ២០១២ ក្នុងព្រះជន្ម ៩០ ព្រះវស្សា។
ទិវាបុណ្យឯករាជ្យជាតិ ថ្ងៃ៩វិច្ឆិកា នៅព្រឹកមិញ បានប្រារព្ធឡើងក្រោមអធិបតីភាពរបស់លោក ហេង សំរិន ប្រធានរដ្ឋសភា ដែលជាព្រះរាជតំណាងរបស់ព្រះមហាក្សត្រ។ លោកបានអុជទៀនជ័យ ជាមួយនឹងសម្តេចព្រះសង្ឃរាជទាំងពីរគណៈ និងមន្ត្រីជាន់ខ្ពស់ សិស្សានុសិស្ស និងកងកម្លាំងប្រដាប់អាវុធជាច្រើននាក់។
ចំណែកលោកនាយករដ្ឋមន្ត្រី ហ៊ុន សែន និងលោក ជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ក៏ពុំមានវត្តមាន ក្នុងពិធីជួបជុំទិវាបុណ្យឯករាជ្យជាតិ នៅវិមានឯករាជ្យ នាព្រឹកមិញឡើយ។ យ៉ាងណាក៏ដោយ ពិធីបុណ្យឯករាជ្យជាតិ នៅថ្ងៃ៩វិច្ឆិកានេះ មានការផ្សាយបន្តផ្ទាល់តាមទូរទស្សន៍ និងវិទ្យុ ដូចរៀងរាល់ឆ្នាំ។
ទិវាបុណ្យឯករាជ្យជាតិ នៅថ្ងៃ៩វិច្ឆិកានេះ មិនមានសេចក្តីថ្លែងការណ៍អ្វីទេ ក្រៅតែពីការដាក់កម្រងផ្កា គោរពវិញ្ញាណក្ខន្ធយុទ្ធជនពលី ការស្រែកជយឃោស សាទរ អមដោយសំឡេងត្រែទ័ព។ ភ្លើងជ័យ នៅវិមានឯករាជ្យ ត្រូវរក្សាទុករយៈពេល ៣ ថ្ងៃ រហូតដល់រសៀលថ្ងៃទី១១វិច្ឆិកា ឆ្នាំ២០១២ ទើបមានពិធីពន្លត់ភ្លើងជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ