ស្លាប់យ៉ាងហោច១២នាក់ ក្នុងការបាញ់ប្រហារនៅផ្សារភាគឦសានឥណ្ឌា
ថ្ងៃសុក្រនេះ មានមនុស្សយ៉ាងហោច១២នាក់ បានស្លាប់ក្នុងការបាញ់ប្រហារនៅផ្សារមួយកន្លែងក្នុងរដ្ឋ អាសសាំ Assam ភាគឦសានប្រទេសឥណ្ឌា។ ប៉ូលិសប្រាប់ថា បានសម្លាប់ជនល្មើសម្នាក់ ហើយក្រុមជនប្រដាប់អាវុធទាំងនេះជាសកម្មជនរបស់ក្រុមផ្តាច់ទឹកដីនិយមរណសិរ្សជាតិបូដូ ហៅកាត់ថា NDFB។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៦
យោងតាមប៉ូលិសរដ្ឋអាសសាំ ក្រុមជ្រុលនិយមបានបាញ់ប្រហារមនុស្សម្នា នៅផ្សារក្រុង Balajan បាឡាចាន់ ក្នុងរដ្ឋអាសសាំ ភាគឦសានប្រទេស។ ជនប្រដាប់អាវុធទាំងនេះបានគប់គ្រាប់បែកដៃមួយគ្រាប់ ធ្វើអោយមានអគ្គិភ័យ នៅអគារមួយកន្លែង ក្នុងផ្សារនេះដែរ។ អគារនេះសំបូរមនុស្សម្នាណាស់។
ភ្លាមៗ ក្រោយហេតុការណ៍ ប៉ូលិសលើកឡើងថា ជនប្រដាប់អាវុធទាំងនេះជាសកម្មជនក្រុមផ្តាច់ទឹកដីនិយមបូដូ។ ក្រុងបាឡាចាន់ ស្ថិតនៅតំបន់មួយជិតព្រំដែនប៊ូតង់។ ក្នុងអតីតកាល នៅតំបន់នេះ ក្រុមផ្តាច់ទឹកដីនិយមបូដូ ធ្លាប់ធ្វើសកម្មភាពទាមទារឯករាជ្យសម្រាប់ប្រជាជនកុលសម្ព័ន្ធបូដូ។
រដ្ឋអាសសាំឥណ្ឌា ក៏ជាប់ព្រំដែនជាមួយបង់ក្លាដែសដែរ។ ប៉ុន្មានឆ្នាំចុងក្រោយនេះ រដ្ឋអាសសាំ បានទទួលសុខសន្តិភាពបន្តិចមកវិញ ប៉ុន្តែ នៅតែចៀសមិនផុតពីភាពតានតឹងបង្កឡើងដោយក្រុម កុល សម្ព័ន្ធបូដូ ក្រុមអ្នកកាន់សាសនាអ៊ីស្លាម និងក្រុមកុលសម្ព័ន្ធអាឌីវ៉ាស៊ី។ សហគមន៍ ទាំង៣ នេះ មានជម្លោះធ្ងន់ធ្ងរនឹងគ្នា ដោយសារបញ្ហាដីធ្លី។ ប៉ុន្មានឆ្នាំចុងក្រោយនេះ ក្រុមបូដូ បានធ្វើការវាយប្រហារបង្ហូរឈាម ប្រឆាំងក្រុមអ្នកកាន់សាសនាអ៊ីស្លាម និងក្រុមកុលសម្ព័ន្ធអាឌីវ៉ាស៊ី។
កាលពីឆ្នាំ២០១៤ ក្រុមបះបោរប្រដាប់អាវុធ បានបើកការវាយប្រហារជាច្រើន សម្លាប់មនុស្សប្រមាណ៦៩នាក់ ក្នុងនោះមានកុមារ១៨នាក់។ ដោយសារហិង្សា មនុស្សរាប់ពាន់នាក់បានភៀសខ្លួនពីតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ