អាមេរិកត្រៀមរៀបចំទំនាក់ទំនងការទូតជាមួយភូមាបន្ទាប់ពីអ្នកទោសថ្មីៗនៅភូមាត្រូវបានដោះលែង
រដ្ឋាភិបាលភូមាទើបបានដោះលែងអ្នកទោសចំនួន៦៥១នាក់ឲ្យមានសេរីភាព។ នៅក្នុងចំណោមអ្នកទោសទាំងនោះ មានអ្នកទោសនយោបាយខ្លះ ជាមេដឹកនាំការបះបោរនិស្សិតភូមាកាលពីឆ្នាំ ១៩៨៨ ដែលត្រូវរបបសឹកវាយបង្ក្រាបយ៉ាងហិង្សាបំផុត។ការលើកលែងទោសនេះ ត្រូវបាន មេដឹកនាំនៅលោកខាងលិចទាមទារជាយូរឆ្នាំមកហើយ។ឆ្លើយតបចំពោះជំហរថ្មីនៃការបើកចំហរបស់រដ្ឋាភិបាលភូមានេះ ទីក្រុងវ៉ាស៊ីនតោនបាននិយាយថា អាមេរិកត្រៀមខ្លួនជាស្រេចដើម្បីផ្តោះប្តូរការទូតជាមួយភូមាដោយពុំទាន់និយាយអំពីការលើកទណ្ឌកម្មណាមួយរបស់ខ្លួននៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
ការដោះលែងអ្នកទោសជាច្រើនរយនាក់នៅភូមា បានទទួលការអបអរសាទរភ្លាមពីសំណាក់មេដឹកនាំធំៗនៅលោកខាងលិច ជាអាទិ៍ ប្រធានាធិបតីបារាំង នីកូឡាសាកូហ្ស៊ីនាយករដ្ឋមន្រ្តីអង់គ្លេសដាវីឌកាំមឺរ៉ុន និងលោកបារ៉ាកអូបាម៉ា ប្រធានាធិបតីអាមេរិក។ លោកបារ៉ាកអូបាម៉ា នៅក្នុងសេចក្តីជូនដំណឹងមួយរបស់ខ្លួន បានថ្លែងសរសើរចំពោះសេចក្តីសំរេចចិត្តរបស់លោកប្រធានាធិបតីថេនសេននៅក្នុងការដោះលែងអ្នកទោសនយោបាយភូមាជាច្រើនរយនាក់ថែមទៀតនៅថ្ងៃសុក្រ១៣មករាម្សិលមិញដោយលោកបានវាយតម្លៃថាកាយវិការថ្មីនេះ ជាការបោះជំហានមួយដ៏សំខាន់ដើម្បីដឹកនាំប្រទេសភូមាឆ្ពោះទៅរកមាគ៌ាលទ្ធិប្រជាធិបតេយ្យ។
“ក្រោយពីស្ថិតក្នុងភាពខ្មៅងងឹតអស់ជាច្រើនឆ្នាំកន្លងមក យើងបានឃើញពន្លឺព្រឹមៗ នៃការរីកចំរើនមួយនៅភូមា តាំងពី ជាច្រើនសប្តាហ៍កន្លងមក ហើយពន្លឺនេះ កាន់តែលេចភ្លឺច្បាស់ជាងមុននៅពេលនេះ”។ នេះជាសេចក្តីថ្លែងរបស់លោកអូបាម៉ា នៅថ្ងៃសុក្រម្សិលមិញ ដោយលោកបន្ថែមទៀតថា “ លោក បានសុំឲ្យរដ្ឋមន្រ្តីក្រសួងការបរទេសអាមេរិក លោកស្រី Hillary Clinton ចាត់ចែងវិធានការចាំបាច់នានា ដើម្បី ចាប់ច្បិចយកឱកាសដ៏កម្រជាប្រវត្តិសាស្រ្តមួយនេះដែលពោរពេញទៅដោយក្តីសង្ឃឹម” ។
លោកស្រីគ្លីនតុនវិញ ក៏បានជូនដំណឹងភា្លមៗដែរ ថា “អាមេរិកនឹងចាប់ផ្តើមរៀបចំនិតិវិធីមួយដើម្បីធ្វើការផ្តោះប្តូរឯកអគ្គរដ្ឋទូតរវាងអាមេរិកនិងភូមា-ដែលជាដំណាក់កាលលើកដំបូងបង្អស់ នៅមុនពេលរៀបចំទំនាក់ទំនងការទូតទាំងស្រុងមួយ ជាយថាហេតុ រវាងប្រទេសទាំងពីរ។
គួរបញ្ជាក់ថា អាមេរិកនិងភូមា បានរក្សាទំនាក់ទំនងការទូតរវាងគ្នា ក៏ប៉ុន្តែ អ្នកតំណាងរបស់អាមេរិកនៅភូមា គឺមានឋានៈត្រឹមតែ ភារធារីប៉ុណ្ណោះ ចាប់តាំងពីឆ្នាំ១៩៩០ ដែលជាឋានៈមួយមានកំរិតទាបជាងឋានៈ ឯកអគ្គរដ្ឋទូត។
លោកស្រី គ្លីនតុន បានអបអរសាទរយ៉ាងជ្រាលជ្រៅផងដែរចំពោះកិច្ចព្រមព្រៀងឈប់បាញ់គ្នាដែលបានចុះហត្ថលេខានៅថ្ងៃព្រហស្បតិ៍ម្សិលម្ង៉ៃ រវាងរដ្ឋាភិបាលភូមានិងចលនាឧទ្ទាមការ៉ែនក្នុងការ ផ្សះផ្សាជាតិ។ ក៏ប៉ុន្តែទាំងលោកបារ៉ាកអូបាម៉ា ទាំងលោកស្រីគ្លីនតុន ពុំបាននិយាយមួយម៉ាត់សោះឡើយអំពី ការលើកទណ្ឌកម្មរបស់អាមេរិកដែលបានដាក់ទៅលើរបបភូមានោះ ដូចជា ការហាមមិនឲ្យសហគ្រាសអាមេរិកទៅធ្វើវិនិយោគនៅប្រទេសភូមា -ហាមនាំធនធានភូមា ចូលមកកាន់សហរដ្ឋអាមេរិកនិងធ្វើការរឹតបន្តឹងនៅលើ ការចេញលិខិតឆ្លងដែនឲ្យដល់សមាជិករដ្ឋាភិបាលភូមាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ