លោកហ៊ុន សែន ព្រមានលោកកឹម សុខា ដែលប៉ុនប៉ងទម្លាក់រដ្ឋមន្ត្រីបក្សកាន់អំណាច
លោកនាយករដ្ឋមន្ត្រី ហ៊ុន សែន បានព្រមាននៅថ្ងៃនេះថាប្រសិនបើគណបក្សសង្គ្រោះជាតិប៉ុនប៉ងទម្លាក់រដ្ឋមន្ត្រីគណបក្សកាន់អំណាចដោយប្រើយន្តការសភាមែននោះ គណបក្សប្រជាជនកម្ពុជានឹងបោះឆ្នោតទម្លាក់លោក កឹម សុខា ចេញពីតំណែងអនុប្រធានទី១រដ្ឋសភាវិញ។ ប្រតិកម្មនេះគឺជាការឆ្លើយតបទៅនឹងលោក កឹម សុខា ដែលបានព្រមានថា នឹងរួមដៃជាមួយតំណាងរាស្ត្របក្សកាន់អំណាចមួយចំនួនដើម្បីទម្លាក់រដ្ឋមន្ត្រីពុករលួយនៅជុំវិញលោកនាយករដ្ឋមន្ត្រី។
ចុះផ្សាយនៅថ្ងៃ៖
ស្តាប់ - ០២:១៩
សារព្រមានរបស់លោកនាយករដ្ឋមន្ត្រីបានធ្វើឡើងនៅព្រឹកថ្ងៃអង្គារទី០៩ កញ្ញានេះក្នុងឱកាសបើកសម្ពោធការដ្ឋានសាងសង់ស្ពានអាកាសក្បែរសាលាតិចណូក្នុងរាជធានីភ្នំពេញ។ លោក ហ៊ុន សែន ព្រមានថា បើបក្សប្រឆាំងចង់បោះឆ្នោតទម្លាក់រដ្ឋមន្ត្រីណាមួយ បក្សកាន់អំណាចនឹងបោះឆ្នោតទម្លាក់លោក កឹម សុខា ចេញពីអនុប្រធានទី១រដ្ឋសភាដែរក្រោមហេតុផលថា ពាក្យពេចន៍ជេរប្រមាថមិនសមនឹងតំណែងនេះទេ។
នេះគឺជាប្រតិកម្មឆ្លើយតបនឹងលោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១រដ្ឋសភា។ នៅក្នុងដំណើរទៅជួបជាមួយអ្នកគាំទ្រតាមខេត្តតាមរយៈពេលប៉ុន្មានថ្ងៃចុងក្រោយនេះ លោក កឹម សុខា បានប្រកាសថាលោកនឹងប្រើប្រាស់យន្តការសភាដើម្បីទម្លាក់«រដ្ឋមន្ត្រីពុករលួយ»មួយចំនួនដែលនៅជុំវិញលោកនាយករដ្ឋមន្ត្រី ហ៊ុន សែន។
បើតាមលោក កឹម សុខា តំណាងរាស្ត្រគណបក្សប្រជាជនកម្ពុជាមួយចំនួនដែលមិនចូលចិត្តរដ្ឋមន្ត្រីមុខដដែលៗនោះអាចចូលរួមបោះឆ្នោតគាំទ្រសំណើបក្សប្រឆាំង។ ប៉ុន្តែ លោកនាយករដ្ឋមន្ត្រី ហ៊ុន សែន បានចាត់ទុកការប៉ុនប៉ងទម្លាក់រដ្ឋមន្ត្រីនិងនាយករដ្ឋមន្ត្រីបក្សកាន់អំណាចនោះថាជាការបង្កសង្គ្រាមនិងបានព្រមានបោះឆ្នោតទម្លាក់លោកកឹម សុខា ពីអនុប្រធានទី១រដ្ឋសភាវិញប្រសិនបើមានសំណើសុំទម្លាក់រដ្ឋមន្ត្រីណាម្នាក់មែននោះ។
គួរកត់សម្គាល់ដែរថា លោក កឹម សុខា ក៏បានចោទប្រកាន់មនុស្សបីក្រុមថាបានព្យាយាមធ្វើឲ្យប្រជាពលរដ្ឋស្អប់គណបក្សសង្គ្រោះជាតិដោយសារតែការយល់ព្រមចូលរដ្ឋសភា។ មនុស្សទាំងបីក្រុមនោះរួមមាន ក្រុមអ្នកវិភាគឯករាជ ក្រុមអ្នកចង់អូសទាញឲ្យរូបលោកបែកចេញពីលោក សម រង្ស៊ី និងក្រុមអ្នកគាំទ្រគណបក្សសង្គ្រោះជាតិក្លែងក្លាយ។ ក្រុមអ្នកគាំទ្រក្លែងក្លាយនោះ លោក កឹម សុខា ទំនងជាចង់សំដៅទៅលើអ្នកគាំទ្រគណបក្សប្រជាជនកម្ពុជា។
នេះជាការប៉ះសម្តីគ្នាជាសាធារណៈលើកដំបូងហើយរវាងមេដឹកនាំគណបក្សទាំងពីរបន្ទាប់ពីមានកិច្ចព្រមព្រៀងបញ្ចប់វិបត្តិនយោបាយកាលពីថ្ងៃទី២២កក្កដាមក និងបន្ទាប់ពីលោក ហ៊ុន សែន និងលោក សម រង្ស៊ី បានថ្លែងសារសន្តិភាពនៅក្នុងរដ្ឋសភា។ លោកនាយករដ្ឋមន្ត្រី ហ៊ុន សែន ចាត់ទុកកិច្ចព្រមព្រៀងនិងសេចក្តីថ្លែងការណ៍នោះថាជា«បទឈប់បាញ់»មួយហើយបានសុំឲ្យភាគីទាំងសងខាងពិនិត្យមើល«កូនទាហាន»របស់ខ្លួនឡើងវិញជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ