កម្ពុជា ក្នុងនាមប្រធានអាស៊ានប្រកាសសាទរនូវបទឈប់បាញ់នៅមជ្ឈិមបូព៌ា
នៅព្រឹកមិញ លោកនាយករដ្ឋមន្ត្រី ហ៊ុន សែន បានប្រកាសថា កម្ពុជា ក្នុងនាមជាប្រធានអាស៊ានសូមអបអរសាទរ និងស្វាគមនូវបទឈប់បាញ់នៅតំបន់កាហ្សា នៅមជ្ឈិមបូព៌ា ដែលជាជម្លោះរវាងប្រទេសអ៊ីស្រាអែល និងប៉ាឡេស្ទីន ក្រោមការសម្របសម្រួលរបស់សហរដ្ឋអាមេរិក ពិសេសពីលោកប្រធានាធិបតី អូបាម៉ា។ តាមលោកនាយករដ្ឋមន្ត្រី បញ្ហាជម្លោះនៅតំបន់កាហ្សា ក៏ត្រូវបានលោក អូបាម៉ា លើកឡើងជាមួយរូបលោក ក្នុងពេលពិធីជប់លៀង កាលពីយប់ថ្ងៃទី១៩ វិច្ឆិកា នៅពេលដែលលោក អូបាម៉ាមកចូលរួមកិច្ចប្រជុំកំពូល ជាមួយមេដឹកនាំប្រទេសសមាជិកអាស៊ាននៅភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥៤
ក្នុងពិធីសម្ពោធដាក់ឲ្យប្រើប្រាស់ផ្លូវជាតិលេខ៨ នៅខេត្តព្រៃវែង ក្រោមឥណទានប្រាក់កម្ចីរបស់ប្រទេសចិន កាលពីព្រឹកថ្ងៃទី២២ ខែវិច្ឆិកា ឆ្នាំ២០១២ លោកនាយករដ្ឋមន្ត្រី ហ៊ុន សែន បានលើកឡើងថា ក្នុងពេលអាស៊ានបើកកិច្ចប្រជុំ នៅទីក្រុងភ្នំពេញ កាលពីថ្ងៃចន្ទកន្លងមក អំពើហិង្សាបានកើតឡើងយ៉ាងធ្ងន់ធ្ងរ នៅតំបន់កាហ្សា រវាងក្រុមហាម៉ាស់របស់ប៉ាឡេស្ទីន ជាមួយនឹងអ៊ីស្រាអែល ដែលពេលនោះ អាស៊ានចាំបាច់ត្រូវមានជំហររួមមួយ ដើម្បីចេញសេចក្តីប្រកាសរបស់ប្រធាន។ អាស៊ានក៏បានស្នើឲ្យសហរដ្ឋអាមេរិក ក្នុងជំនួបអាស៊ាន និងសហរដ្ឋអាមេរិកដែលមានលោកប្រធានាធិបតី អូបាម៉ាចូលរួម ដើម្បីធ្វើអន្តរាគមន៍ឲ្យទាន់ពេល លើជម្លោះនៅតំបន់កាហ្សា។
លោកនាយករដ្ឋមន្ត្រី ហ៊ុន សែនបានបន្ថែមថា ក្នុងពេលជប់លៀងកាលពីយប់ថ្ងៃទី១៩ វិច្ឆិកា លោកបានសន្ទនាយ៉ាងច្រើន ជាមួយនឹងលោកប្រធានាធិបតី អូបាម៉ា ក្នុងនោះ ក៏មានប្រធានបទសំខាន់មួយ គឺបញ្ហានៅមជ្ឈិមបូព៌ា នៅតំបន់កាហ្សា ដែលកំពុងមានការតានតឹង។
លោក ហ៊ុន សែន៖ “ពេលនោះ គាត់បានប្រាប់ខ្ញុំថា ឥឡូវនេះ គាត់បានប្រាប់ខ្ញុំថា នៅ ២០នាទីទៀត គាត់សុំចេញទៅមុន ព្រោះមន្ត្រីរបស់គាត់បានប្រាប់មកថា អាចទំនាក់ទំនងបាននៅប៉ុន្មាននាទីខាងក្រោយនេះ។ ហើយគាត់បានប្រាប់ខ្ញុំថា ប្រសិនបើមិនមានការឈប់បាញ់ក្នុងរយៈពេលពីរ ឬបីថ្ងៃទៀត សភាពការណ៍អាក្រក់ណាស់អាចនឹងមាន អន្តរាគមន៍ជើងគោកចូល ដែលសភាពការណ៍នេះ វានឹងធ្ងន់ធ្ងរ ហើយអូសបន្លាយ។ ដូច្នេះ គាត់មានការចាំបាច់ ដើម្បីធ្វើទំនាក់ទំនងនឹងប្រធានាធិបតី ជាមួយនាយករដ្ឋមន្ត្រីរបស់អ៊ីស្រាអែល និងប្រធានាធិបតីរបស់អេហ្ស៊ីប។ ទន្ទឹមគ្នា គាត់ក៏បានបញ្ជូនរដ្ឋមន្ត្រីការបរទេស ហ៊ីលឡារី គ្លីនតុន ទៅកាន់មជ្ឈិមបូព៌ាភ្លាម"។
ជាមួយនឹងប្រសាសន៍ដូច្នេះ ក្នុងនាមកម្ពុជា ជាប្រធានអាស៊ានជិតផុតអាណត្តិ លោកនាយករដ្ឋមន្ត្រី ហ៊ុន សែន បានលើកឡើង ដោយអបអរសាទរនឹងការប្រកាសបទឈប់បាញ់ ដែលបានចូលជាធរមានកាលពីយប់ថ្ងៃទី២១ វិច្ឆិកា។
លោកនាយករដ្ឋមន្ត្រី ហ៊ុន សែន បានគូសបញ្ជាក់ថា “យើងសូមយកឱកាសនេះ សម្តែងនូវការស្វាគមន៍យ៉ាងកក់ក្តៅចំពោះបទឈប់បាញ់មួយ ដែលបានកើតឡើង នៅមជ្ឈិមបូព៌ា រវាងក្រុមហាម៉ាស់របស់ប៉ាឡេស្ទីន ជាមួយនឹងអ៊ីស្រាអែល។ ហើយយើងសូមអបអរសាទរចំពោះតួនាទីស្ថាបនារបស់ប្រធានាធិបតី បារ៉ាក់ អូបាម៉ា និងរដ្ឋមន្ត្រីការបរទេស ហ៊ីលឡារី គ្លីនតុន ដែលបានធ្វើការសម្របសម្រួលឲ្យមានបទឈប់បាញ់ ព្រោះសភាពការណ៍ វាតានតឹងខ្លាំងណាស់ ប៉ាឡេស្ទីន ក៏ស្លាប់ អ៊ីស្រាអែល ក៏ស្លាប់”។
ការឈឺឆ្អាលរបស់មហាអំណាចចិន អំឡុងពេលកិច្ចប្រជុំកំពូលអាស៊ានក្នុងរឿងជម្លោះនៅមជ្ឈិមបូព៌ា ក្នុងតំបន់កាហ្សា ក៏ត្រូវបានលោកនាយករដ្ឋមន្ត្រី ហ៊ុន សែន លើកឡើងផងដែរ នៅព្រឹកមិញ។ ជាមួយគ្នានោះ លោកនាយករដ្ឋមន្ត្រី ហ៊ុន សែន ក៏បានពន្យល់បំភ្លឺដល់មហាជនថា តើហេតុអ្វី បានជាកម្ពុជា មិនមានរៀបចំពិធីត្រួតពល អមដោយត្រែទ័ពដើម្បីទទួលដំណើរមកដល់របស់លោក អូបាម៉ា ឲ្យដូចដំណើរមកកាន់កម្ពុជារបស់លោកនាយករដ្ឋមន្ត្រីចិន វេន ជាប៉ាវ ក្នុងពេលចូលរួមប្រជុំរួមគ្នា ជាមួយមេដឹកនាំកំពូលអាស៊ាន កាលពីដើមសប្តាហ៍នេះ។
តាមលោកនាយករដ្ឋមន្ត្រី ហ៊ុន សែន មានហេតុផលសំខាន់ៗជាច្រើន ដូចជា៖ ទី១ មកពីកម្មវិធីមមាញឹករបស់មេដឹកនាំពិភពលោក ទី២ មកពីដំណើរមកកាន់កម្ពុជារបស់លោកប្រធានាធិបតី អូបាម៉ា មិនមែនជាដំណើរទស្សនកិច្ចផ្លូវការ ដូចនាយករដ្ឋមន្ត្រីចិនឡើយ និងមូលហេតុមួយទៀត មកពីការរឹតបន្តឹងលើបញ្ហាសន្តិសុខសម្រាប់មេដឹកនាំពិភពលោកខ្លាំងក្លាពេក ដោយសូម្បីតែឡានដឹកលោក អូបាម៉ា ក៏ត្រូវអាមេរិកយកមកជាមួយផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ