នាយករដ្ឋមន្ត្រីកម្ពុជារិះគន់គណបក្សប្រឆាំងលើការសន្យាដំឡើងប្រាក់ខែមន្ត្រីរាជការ
នៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានរិះគន់លើគណបក្សប្រឆាំង ដែលជាគូប្រជែងរបស់លោក ចំពោះនយោបាយឃោសនា សន្យាដំឡើងប្រាក់ខែមន្ត្រីរាជការ គ្រូបង្រៀន និងកងកម្លាំងប្រដាប់អាវុធ។ លោកនាយករដ្ឋមន្ត្រី ហ៊ុន សែន បានប្រដូចនយោបាយរបស់គណបក្សប្រឆាំងនៅកម្ពុជា លើការដំឡើងមន្ត្រីរាជការ ថាអាចនឹងបង្កជាវិបត្តិ នាពេលសព្វថ្ងៃ ដូចនៅប្រទេសក្រិក និងប្រទេសអេស្ប៉ាញ ជាដើម។
ចុះផ្សាយនៅថ្ងៃ៖
ស្តាប់ - ០៣:៣៧
ការបោះឆ្នោតតំណាងរាស្ត្រ អាណត្តិទី៥ ឆ្នាំ២០១៣ នឹងចូលមកដល់ នាថ្ងៃទី២៨ ខែកក្កដា។ តែពេលនេះ លោកនាយករដ្ឋមន្ត្រី ហ៊ុន សែន បានប្រកាសថា រដូវសន្យាឃោសនា ស្តីពី ការដំឡើងប្រាក់ខែ គ្រូបង្រៀន មន្ត្រីរាជការ កងកម្លាំងប្រដាប់អាវុធ បានមកដល់ទៀតហើយ។
ក្នុងពិធីបើកការដ្ឋានសាងសង់ គម្រោងស្តា និងពង្រីកកំណាត់ផ្លូវជាតិលេខ៥ ពីស្ពានជ្រោយចង្វារ រហូតដល់ស្ពានព្រែកក្តាម ប្រវែង ៣០ គីឡូម៉ែត្រ កាលពីព្រឹកថ្ងៃទី៩ ខែតុលា ឆ្នាំ២០១២ លោកនាយករដ្ឋមន្ត្រី ហ៊ុន សែន បានលើកឡើងថា កម្ពុជាសព្វថ្ងៃ មិនបានខ្ចីលុយគេ យកមកបើកប្រាក់ខែ ដូចប្រទេសក្រិក ដែលកំពុងមានវិបត្តិប្រាក់បំណុលទេ។
ប៉ុន្តែលោកនាយករដ្ឋមន្ត្រី បានលើកឡើងថា បើសិនជាដូចនយោបាយឃោសនាដំឡើងប្រាក់ខែរបស់គណបក្សប្រឆាំង នោះកម្ពុជា នឹងធ្លាក់ចូលក្នុងវិបត្តិប្រាក់បំណុល ដូចប្រទេសក្រិក នៅសហភាពអឺរ៉ុប ជាមិនខាន។ ម្យ៉ាងទៀត បើតាមលោកនាយករដ្ឋមន្ត្រី នយោបាយដំឡើងប្រាក់ខែលើមន្ត្រីរាជការរបស់គណបក្សប្រឆាំង គឺមិនគិតពីការអភិវឌ្ឍន៍ផ្លូវស្ពាន និងប្រឡាយទឹក ដែលជាតម្រូវការរបស់ពលរដ្ឋកម្ពុជា ១៤ លាននាក់ឡើយ។
លោកនាយករដ្ឋមន្ត្រី ហ៊ុន សែន៖ “ប៉ុន្តែខ្ញុំគ្រាន់តែជម្រាបបងប្អូន! បើសិនជាដំឡើងត្រឹមតែប្រាក់ខែ សម្រាប់មន្ត្រីរាជការ កងកម្លាំងប្រដាប់អាវុធ គ្រូបង្រៀន ប៉ុន្មានសិបនាក់នេះ! ហើយបោះបង់ប្រជាពលរដ្ឋ ១៤ លាននាក់ ដែលកំពុងត្រូវការផ្លូវ ដែលកំពុងត្រូវការស្ពាន កំពុងត្រូវការប្រឡាយទឹក តើត្រូវដោះស្រាយយ៉ាងម៉េច? ដំឡើងបាន ថែមបន្តិចទៀត។ ប៉ុន្តែកាលណាដំឡើងហើយ ថយមិនបានទេ។ បាតុកម្មនៅក្រិក បាតុកម្មនៅអេស្ប៉ាញ ហើយបាតុកម្មនៅប្រទេសនានាជាច្រើនទៀតនោះ ដោយសារអី? គឺមកពី ទី១-កាត់ប្រាក់ខែ និងទី២-ដំឡើងពន្ធ បានជាមានបាតុកម្មនៅអឺរ៉ុបរាល់ថ្ងៃនេះ"។
លោកនាយករដ្ឋមន្ត្រី ហ៊ុន សែន ក៏បានបន្ថែមថា បើសិនជាដំឡើងប្រាក់ខែមន្ត្រីរាជការ គណបក្សប្រឆាំង ត្រូវយកពន្ធដីពីកសិករ។ ចំណែកការលើកឡើងថា ត្រូវបំបាត់អំពើពុករលួយ ដើម្បីដំឡើងប្រាក់ខែនោះ ត្រូវបានលោកនាយករដ្ឋមន្ត្រី លើកឡើងថា មិនអាចទៅរួចទេ ព្រោះសូម្បីតែគណបក្សប្រឆាំង ក៏ប្រព្រឹត្តអំពើពុករលួយក្នុងបក្ស ដោយប្រើប្រាស់ជំនួយ ដែលបានមកពីខ្មែរនៅបរទេស។
យ៉ាងណាក៏ដោយ លោក គង់ គាំ ប្រធានស្តីទីគណបក្សសមរង្ស៊ី នៅតែមានជំនឿថា គណបក្សប្រឆាំងសង្គ្រោះជាតិ ដែលដឹកនាំដោយលោកសមរង្ស៊ី ជាអ្នកជំនាញសេដ្ឋកិច្ច បានសិក្សាគ្រប់ជ្រុងជ្រោយពីប្រភព សម្រាប់ការដំឡើងប្រាក់ខែកម្មករ និងមន្ត្រីរាជការ។
លោក គង់ គាំ បានបញ្ជាក់ថា "យើងដឹងទាំងអស់គ្នាថា នាយករដ្ឋមន្ត្រីបច្ចុប្បន្ន មិនអាចធ្វើទៅកើតទេ ( ដំឡើងប្រាក់ខែមន្ត្រីរាជការ )។ ដូច្នេះយើងនឹងធ្វើកើត។ យើងមានប្រភពច្រើន។ ការបំបាត់អំពើពុករលួយ ជាប្រភពមួយ។ តែប្រភពគ្រប់គ្រងផ្សេងៗទៀត ក៏អាចនឹងរួមចំណែកដល់ការដោះស្រាយគោលនយោបាយទាំងឡាយ ដែលគណបក្សសង្គ្រោះជាតិ បានកំណត់ដែរ"។
នៅថ្ងៃប្រារព្ធទិវាគ្រូបង្រៀនពិភពលោក ថ្ងៃ៥តុលា ក្រុមគ្រូបង្រៀនរបស់លោក រ៉ុង ឈុន បានជួបជុំលើកបដា និងដើរហែក្បួន ទាមទារឲ្យរដ្ឋាភិបាល ដំឡើងប្រាក់ខែមន្ត្រីរាជការ ពិសេសគ្រូបង្រៀន ឲ្យបាន ១ លានរៀល ឬស្មើប្រមាណ ២៥០ ដុល្លារអាមេរិក។
គ្រូបង្រៀនសព្វថ្ងៃ ចាប់ពីសាលាបឋមសិក្សា រហូតដល់វិទ្យាល័យ ទទួលបានប្រាក់ខែគោល ជាមធ្យម ចាប់ពី ២៤ ម៉ឺនរៀល ស្មើប្រមាណ ៦០ ដុល្លារ រហូតដល់ ៤៤០.០០០ រៀល ស្មើប្រមាណ ១១០ ដុល្លាអាមេរិក។ រីឯតម្លៃទំនិញលើទីផ្សារឡើងថ្លៃសព្វសារពើ ដែលមិនអាចឲ្យមន្ត្រីរាជការ គ្រូបង្រៀន និងកងកម្លាំងប្រដាប់អាវុធ យកប្រាក់ខែនោះ ទៅចំណាយ សម្រាប់ជីវភាពប្រចាំថ្ងៃ បានសមរម្យឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ