ស្លាប់២នាក់និងបាត់ខ្លួន១២នាក់ ក្នុងហេតុការណ៍ផ្ទុះរោងចក្រហ្គាសនៅប្រទេសចិន
នាល្ងាចថ្ងៃសុក្រ ទី១៩កក្កដានេះ ការផ្ទុះមួយបានកើតឡើងនៅរោងចក្រហ្គាសមួយកន្លែង ក្នុងខេត្តហៃណាន ប្រទេសចិន។ វាការផ្ទុះដែលមានកម្លាំងខ្លាំង ជះចំហាយក្នុងរង្វង់៣គីឡូម៉ែត្រក្រឡា។ សេចក្ដីរាយការណ៍ពីសារព័ត៌មានចិន បញ្ជាក់ថាមានមនុស្ស២នាក់ស្លាប់ និង១២នាក់កំពុងបាត់ខ្លួន។
ចុះផ្សាយនៅថ្ងៃ៖
រោងចក្រដែលជួបហេតុការណ៍អាក្រក់នេះ គឺ រោងចក្រហៃណានហ្គាសធ្យូងថ្ម។ ហើយហេតុការណ៍ផ្ទុះដែលកើតឡើងនៅវេលាម៉ោង៥និង៥០នាទីល្ងាច ម៉ោងនៅក្នុងប្រទេសចិន បានបញ្ឈប់សកម្មភាពនៅក្នុងរោងចក្រនេះទាំងស្រុង។
នៅក្នុងរង្វង់បីគីឡូម៉ែត្រក្រឡា ចំហាយនៃការផ្ទុះចេញពីរោងចក្រ បានកម្ទេចទ្វារនិងបង្អួចនៃអគារជាច្រើនកន្លែង។ នេះបើតាមការចុះផ្សាយនៅលើគណនីសង្គម Weibo របស់ទូរទស្សន៍ CCTV។
ចំណែកសារព័ត៌មានចិនស៊ីនហួរ បានចុះផ្សាយវីដេអូ បង្ហាញឲ្យឃើញផ្សែងខ្មៅហុយទ្រលោមចេញពីអគាររោងចក្រហ្គាស។ វីដេអូខ្លះទៀត បង្ហាញពីការខូចខាតនៃអគារនិងផ្ទះសម្បែងដែលនៅក្បែរៗរោងចក្រនោះ។ ទ្វារបង្អួចត្រូវកម្ទេចដោយសារចំហាយនៃការផ្ទុះ ហើយមនុស្សជាច្រើននាក់ត្រូវគេថតឃើញមានរបួស ឈាមហូរស្រោចខ្លួន។ អាជ្ញាធរចិនបានបញ្ជាក់ថា មានមនុស្សច្រើននាក់ណាស់ ដែលរងរបួសដោយសារហេតុការណ៍នេះ។ ក្រុមសង្គ្រោះបានបន្តបញ្ជូនអ្នករបួសឲ្យទៅព្យាបាលខ្លួននៅឯមន្ទីរពេទ្យ។
គួរកត់សម្គាល់ថា ឧបទ្ទវហេតុអាក្រក់នៅតាមបណ្ដារោងចក្រនានា មិនមែនជារឿងចម្លែកទេ នៅប្រទេសចិន ដោយសារតែវិធានការការពារសុវត្ថិភាព នៅមិនទាន់ត្រូវបានអនុវត្តពេញលេញត្រឹមត្រូវ។ ជាក់ស្ដែង នៅខែមីនាដើមឆ្នាំ២០១៩នេះ ការផ្ទុះនៅរោងចក្រគីមីមួយកន្លែង ភាគខាងជើងខេត្តជាងស៊ូ បានសម្លាប់មនុស្សអស់៧៨នាក់ និងបណ្ដាលឲ្យមនុស្សរាប់រយនាក់ផ្សេងទៀតរងរបួស។
កាលពីខែវិច្ឆិកាឆ្នាំ២០១៨វិញ។ មានមនុស្សយ៉ាងហោចណាស់២៤នាក់ត្រូវស្លាប់ និង២១នាក់ផ្សេងទៀតរបួស ដោយសារឧបទ្ទវហេតុធ្លាយហ្គាសក្នុងរោចក្រមួយកន្លែង នៅភាគខាងជើងទីក្រុង សៀងជាគូ។ ហេតុការណ៍ធ្ងន់ធ្ងរមួយទៀតកើតឡើងនៅឆ្នាំ២០១៥។ កាលណោះ នៅភាគខាងជើងទីក្រុងធានជីន រោងចក្រគីមីមួយកន្លែងបានផ្ទុះសម្លាប់មនុស្សអស់១៦៥នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ