ហុងកុងធ្វើប្រជាមតិបោះឆ្នោត មុនថ្ងៃបាតុកម្មប្រចាំឆ្នាំ
បណ្តាជនហុងកុងរាប់សិបពាន់នាក់ បាននាំគ្នាធ្វើប្រជាមតិក្រៅផ្លូវការមួយ ដើម្បីទាមទារឱ្យមានប្រព័ន្ធបោះឆ្នោតសកលនិងដោយផ្ទាល់ នៅហុងកុង ឡើងវិញ។ ប្រជាមតិ ដែលបានចាប់ផ្តើម តាំងពី១០ថ្ងៃមុន ត្រូវបញ្ចប់នៅថ្ងៃអាទិត្យនេះ ពីរថ្ងៃមុនខួបប្រមូលផ្តុំធ្វើបាតុកម្មប្រចាំឆ្នាំរបស់ក្រុមអ្នកប្រជាធិបតេយ្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ចំនួនអ្នកចូលរួមធ្វើប្រជាមតិ មានច្រើនជាងការប៉ាន់ប្រមាណឆ្ងាយណាស់ ! ការបោះឆ្នោតតាមប្រព័ន្ធអ៊ីនធឺណែត និងតាមការិយាល័យ បានរងការវាយប្រហារនិងរំខានយ៉ាងខ្លាំង ក្នុងទ្រង់ទ្រាយធំពីសំណាក់ចោរអ៊ីនធឺណែត Cyber-Attack។ សម្រាប់ប៉េកាំង ការធ្វើប្រជាមតិពលរដ្ឋ ស្តីអំពីរបៀបបោះឆ្នោតជ្រើសរើសថ្នាក់ដឹកនាំហុងកុង នៅឆ្នាំ២០១៧ គ្មានលក្ខណៈស្របច្បាប់ឡើយ។ ប៉ុន្តែបណ្តាជនហុងកុងមានជំនក់ចិត្តយ៉ាងខ្លាំងនឹងប្រធានបទដ៏រសើបមួយនេះ។
ដំណាក់កាលទីពីររបស់ក្រុមអ្នកប្រជាធិបតេយ្យ គឺការប្រមូលផ្តុំធ្វើបាតុកម្ម នៅថ្ងៃទី ១ កក្កដា ថ្ងៃដែលហុងកុងអតីតដែនដីអាណានិគមអង់គ្លេសបានក្លាយមកជារបស់ចិន។ ដូចជារៀងរាល់ឆ្នាំ គិតចាប់តាំងពីឆ្នាំ១៩៩៧មក បាតុករអ្នកសេ្នហាលទ្ធិប្រជាធិបតេយ្យ តែងនាំគ្នាធ្វើបាតុកម្ម ទាមទារសិទ្ធិសម្រេចជ្រើសរើសប្រមុខដឹកនាំរបស់ខ្លួន ដោយគ្មានការជ្រៀតជ្រែកពីចិនប៉េកាំង។ នៅឆ្នាំនេះការប្រមូលផ្តុំអាចនឹងមានទ្រង់ទ្រាយធំ។ មេដឹកនាំចលនាបាតុករ ប៉ាន់ប្រមាណថាមានយ៉ាងហោចណាស់កន្លះលាននាក់នឹងនាំគ្នាចុះថ្នល់ ពោលគឺស្មើនឹងចំនួនបាតុករកាលពីឆ្នាំ២០០៣ ដែលកាលណោះពួកគេទាមទារបានសម្រេច ប្រឆាំងនឹងច្បាប់ស្តីសន្តិសុខដ៏ចម្រូងចម្រាស។
តាំងពីហុងកុងត្រលប់មកជារបស់ចិន អតីតដែនដីអាណានិគមអង់គ្លេសមួយដុំនេះ មានលក្ខន្តិកៈរដ្ឋាបាលពិសេស និងជាគោលការណ៍មិនស្វ័យភាពទូលំទូលាយខ្លាំង តាមគំរូ “ប្រទេសមួយប្រព័ន្ធពីរ”។ ប្រជាពលរដ្ឋហុងកុង មានសិទ្ធិសេរីភាពក្នុងការបញ្ចេញមតិ ខុសពីបណ្តាជនចិនដីគោក ប៉ុន្តែក្នុងករណីជាក់ស្តែង ប៉េកាំងត្រួតត្រាស្ទើរទាំងស្រុងជីវិតនយោបាយរបស់ហុងកុង ដែលជាហេតុធ្វើឱ្យពលរដ្ឋមិនសប្បាយចិត្តបរិហារជាញឹកញយ។
អាជ្ញាធរប៉េកាំងបានសន្យាថានឹងស្តារឱ្យមានប្រព័ន្ធបោះឆ្នោត ដោយសកលនិងដោយផ្ទាល់ ជ្រើសរើសអំណាចប្រតិបត្តិ នៅឆ្នាំ២០១៧ សភានៅឆ្នាំ២០២០។ ប៉ុន្តែបេក្ខជនឈរឈ្មោះទាំងអស់ត្រូវតែឆ្លងការអនុម័ត ពីគណៈកម្មាធិការចុះឈ្មោះ ដែលអ្នកប្រជាធិបតេយ្យមិនអាចទទួលយកបាន។ នៅក្នុងប្រព័ន្ធបច្ចុប្បន្ន មេដឹកនាំរដ្ឋាភិបាលហុងកុង ត្រូវបានបោះឆ្នោតជ្រើសតាំងដោយ គណៈកម្មាធិការមួយ មានតំណាង១១៩៣រូប ដែលសុទ្ធសឹងជាមនុស្សជំនិតនឹងប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ