រដ្ឋអំណាចហុងកុងកំពុងបើកការស៊ើបអង្កេតលើប្រេង ឆា ដែលនំាចូលពីតៃវ៉ាន់
នៅថ្ងៃចន្ទ ទី៨ កញ្ញានេះ រដ្ឋអំណាចសុខាភិបាលនៅកោះហុងកុងបានប្រកាសឲ្យដឹងពីការស៊ើបអង្កេតលើព័ត៌មានមួយជុំវិញវត្តមានប្រេង ឆា ពុលដែលនំាចូលពីតៃវ៉ាន់។ ការស៊ើបអង្កេតដំបូងនឹងត្រូវធ្វើឡើង តាមរយៈការប្រមូលប្រេង ឆា ដែលកំពុងលក់នៅតាមទីផ្សារនានាដើម្បីធ្វើការវិភាគ។ រដ្ឋអំណាចតៃវ៉ាន់បានបញ្ជាក់ថា ប្រេង ឆា ពុលនោះត្រូវបានផលិតឡើងដោយរោងចក្រខុសច្បាប់មួយនៅតៃវ៉ាន់ រួចយកទៅលក់ឲ្យក្រុមហ៊ុនផលិតប្រេង ឆា ដ៏ល្បីមួយនៅតៃវ៉ាន់។
ចុះផ្សាយនៅថ្ងៃ៖
ស្តាប់ - ០១:៤៧
ការដែលគេនំាគ្នាហៅថា ប្រេង ឆា ពុលនោះ មិនមែនជាប្រេង ឆាដែលមានលាយជាតិគីមីពុលទេ តែជាប្រេង ឆាម្យ៉ាងដែលបានមកពីការយកប្រេង ឆា ប្រើហើយ និងចំរ៉ាញ់រួចហើយទៅលាយជាមួយនឹងប្រេង ឆាផលិតថ្មី។ យោងតាមរដ្ឋអំណាចតៃវ៉ាន់ ទង្វើនេះមិនមែនជាទង្វើរបស់ក្រុមហ៊ុនតៃវ៉ាន់ឈ្មោះ Chang Guann Co ដែលល្បីឈ្មោះខាងផលិតប្រេង ឆា នោះទេ តែជាទង្វើរបស់រោងចក្រតៃវ៉ាន់ខុសច្បាប់មួយដែលបានយកប្រេង ឆា លាយនោះទៅលក់ឲ្យរបស់ក្រុមហ៊ុន Chang Guann Co។ ជាសរុប ក្រុមហ៊ុន Chang Guann Co បានទិញប្រេង ឆាលាយពីរោងចក្រខុសច្បាប់នោះចំនួន ២៤៣តោន និងដែលជាទូទៅ សុទ្ធសឹងជាសំណល់ប្រេង ឆាសល់ពីការចំអិនម្ហូបអាហារ ឬមួយក៏សំណល់ខ្លាញ់ផ្សេងៗទៀតដែលរោងចក្រប្រមូលយកទៅលាយជាមួយប្រេង ឆាថ្មី រួចលក់ទៅឲ្យក្រុមហ៊ុន Chang Guann Co។
កន្លងមក មានភោជនីយដ្ឋាន និងហាងធ្វើនំប៉័ងយ៉ាងតិច ៩០០ បានទិញប្រេង ឆា នោះទៅប្រើ ហើយក្រុមហ៊ុន Chang Guann Co បានថ្លែងសុំទោសជាផ្លូវការដោយអះអាងថា ក្រុមហ៊ុនមិនបានដឹងពីប្រភេទ និងប្រភពវត្ថុធាតុដើមដែលរោងចក្រយកទៅផលិត។ យ៉ាងណាក៏ដោយ ថៅកែរោងចក្រតៃវ៉ាន់ខុសច្បាប់ត្រូវបានឃាត់ខ្លួន ហើយរដ្ឋអំណាចតៃវ៉ាន់បានបើកការស៊ើបអង្កេតដើម្បីចង់ដឹងថា តើប្រេង ឆា ប្រភេទនោះមានលក់នៅតាមទីផ្សារ ឬអត់?។ មួយវិញទៀត ការវិភាគក៏នឹងត្រូវធ្វើនៅលើនំមួយចំនួនដែលបានចំអិនដោយប្រេង ឆា ដើម្បីចង់ដឹងថា តើជាប្រេង ឆា ប្រភេទណា។
គួររម្លឹកជូនថា នេះជាការផ្ទុះរឿងអាស្រូវចំណីអាហារលើកទី២ ហើយនៅហុងកុងតំាងពីការផ្តើមរដូវក្តៅមក។ នៅដើមខែកក្កដាកន្លងទៅ ភោជនីយដ្ឋានអាមេរិកំាង McDonald’s បានសម្រេចផ្អាកលក់សាច់មាន់ដុំ និងសាច់ផ្សេងៗទៀតដែលខ្លួនបានទិញពីក្រុមហ៊ុនអាមេរិកំាងមួយក្នុងពេលផ្ទុះរឿងអាស្រូវជុំវិញប្រភេទសាច់ដែលក្រុមហ៊ុននោះបានទិញពីក្រុមហ៊ុនចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ